ನವದೆಹಲಿ: ಭಾರತೀಯ ವಾಯುಪಡೆಗೆ ಮಧ್ಯಮ ಪ್ರಮಾಣದ “ಸಿ-295 ಎಂಡಬ್ಲೂ’ ಬಹೋಪಯೋಗಿ ವಿಮಾನಗಳ ಖರೀದಿಗೆ ಸ್ಪೇನ್ನ ಏರ್ಬಸ್ ಡಿಫೆನ್ಸ್ ಮತ್ತು ಸ್ಪೇಸ್ ಕಂಪನಿ ಜತೆಗೆ ರಕ್ಷಣಾ ಸಚಿವಾಲಯ ಶುಕ್ರವಾರ ಒಪ್ಪಂದ ಮಾಡಿಕೊಂಡಿದೆ. 20 ಸಾವಿರ ಕೋಟಿ ರೂಪಾಯಿಯ ವೆಚ್ಚದಲ್ಲಿ 56 ವಿಮಾನಗಳನ್ನು ಖರೀದಿಸಲಾಗುತ್ತಿದೆ. ಪ್ರಧಾನಿ ನೇತೃತ್ವದ ಭದ್ರತೆ ಕುರಿತ ಸಂಪುಟ ಉಪಸಮಿತಿ ಎರಡು ವಾರದ ಹಿಂದೆ ಈ ಯೋಜನೆಗೆ ಒಪ್ಪಿಗೆ ನೀಡಿತ್ತು.
ಒಟ್ಟು 56 ವಿಮಾನಗಳ ಪೈಕಿ 16 ವಿಮಾನಗಳು ಸ್ಪೇನ್ನಿಂದ ಪೂರೈಕೆ ಆಗಲಿದ್ದು, ಉಳಿದ 40 ವಿಮಾನಗಳನ್ನು “ಮೇಕ್ ಇನ್ ಇಂಡಿಯಾ’ ಕಾರ್ಯಕ್ರಮದಡಿಯಲ್ಲಿ ಟಾಟಾ ಅಡ್ವಾನ್ಸ್ಡ್ ಸಿಸ್ಟಂ ಲಿಮಿಟೆಡ್ (ಟಿಎಎಸ್ಎಲ್) ಸಹಯೋಗದಲ್ಲಿ ಭಾರತಲ್ಲೇ ತಯಾರಿಸಲಾಗುತ್ತದೆ. ಇದು 10 ವರ್ಷದ ಗುತ್ತಿಗೆ ಯೋಜನೆ ಆಗಿದ್ದು, ಈ ವಿಮಾನಗಳು ಈಗಾಗಲೇ ಐಎಎ್ನಲ್ಲಿ ಕಾರ್ಯನಿರ್ವಹಿಸುತ್ತಿರುವ “ಅವ್ರೊ-748′ ವಿಮಾನಗಳ ಬದಲು ಕಾರ್ಯನಿರ್ವಹಿಸಲಿವೆ.
ಎಲ್ಲ 56 ವಿಮಾನಗಳಲ್ಲೂ ದೇಶೀಯ ತಂತ್ರಜ್ಞಾನದ ಎಲೆಕ್ಟ್ರಾನಿಕ್ ಯುದ್ಧ ಸನ್ನದ್ಧ ಉಪಕರಣ ಅಳವಡಿಕೆ ಮಾಡಲಾಗುತ್ತದೆ. “ಸಿ-295 ಎಂಡಬ್ಲೂ’ ವಿಮಾನಕ್ಕೆ ಅಗತ್ಯವಾದ ಬಿಡಿಭಾಗಗಳಲ್ಲಿ ಹೆಚ್ಚಿನವು ಭಾರತದಲ್ಲೇ ಉತ್ಪಾದನೆ ಆಗಲಿದೆ. ವಿಮಾನಗಳು ಪೂರೈಕೆ ಆರಂಭವಾಗುವುದಕ್ಕೂ ಮುನ್ನ ಸರ್ವೀಸಿಂಗ್ ಕೇಂದ್ರಗಳನ್ನು ಭಾರತದಲ್ಲಿ ತೆರೆಯಲಾಗುತ್ತದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.
ಏರ್ಬಸ್ ಡಿಫೆನ್ಸ್ಮತ್ತು ಟಾಟಾ ಅಡ್ವಾನ್ಸಡ್ ಸಿಸ್ಟಂ ಹಾಗೂ ರಕ್ಷಣಾ ಸಚಿವಾಲಯದ ಮಧ್ಯೆ ಐತಿಹಾಸಿಕ ಒಪ್ಪಂದವಾಗಿದೆ. ಇದಕ್ಕಾಗಿ ಎರಡೂ ಕಂಪನಿಗಳಿಗೆ ಅಭಿನಂದನೆ ಮತ್ತು ಇದನ್ನು ಸಾಧ್ಯ ಮಾಡಿದ ಸರ್ಕಾರ, ಸೇನೆಗೆ ಧನ್ಯವಾದ. ಈ ಯೋಜನೆಯಿಂದ ಭಾರತದಲ್ಲಿ ವಿಮಾನ ತಯಾರಿಕಾ ವಲಯದ ಪ್ರಗತಿ ಹೆಚ್ಚಲಿದೆ. ಜತೆಗೆ ದೇಶೀಯ ಪೂರೈಕೆ ಸಾಮರ್ಥ್ಯ ಅಂತಾರಾಷ್ಟ್ರೀಯ ಗುಣಮಟ್ಟಕ್ಕೆ ಏರಲಿದೆ ಎನ್ನುತ್ತಾರೆ ಟಾಟಾ ಸಮೂಹದ ಅಧ್ಯಕ್ಷ ರತನ್ ಟಾಟಾ,
ವಿಮಾನ ವಿಶೇಷ
* 5ರಿಂದ 10 ಟನ್ ತೂಕದ ಸಾಮಗ್ರಿಗಳ ಸಾಗಣೆ.
* ಸೆಮಿ-ಏರ್ಸ್ಟ್ರಿಪ್ಗಳಿಂದಲೂ ಹಾರಾಟ
* ಹಿಂಬದಿಯಲ್ಲಿ ಇಳಿಜಾರಿನ ಬಾಗಿಲಿರುವುದರಿಂದ ಸೇನಾ ಸಿಬ್ಬಂದಿ, ಸಲಕರಣೆಗಳ ಏರ್ಡ್ರಾಪ್ಗೆ ಅನುಕೂಲ
* ಸರ್ವಋತು ಕಾರ್ಯಾಚರಣೆ
* 2000 ನಾಟಿಕಲ್ ಮೈಲಿ ದೂರ ಕ್ರಮಿಸುವ ಸಾಮರ್ಥ್ಯ
* ನಿರಂತರ 11 ತಾಸು ಹಾರಾಟ