ಕಾಂಗ್ರಾ : ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆಯಲ್ಲಿ ಸುರಿದ ಧಾರಾಕಾರ ಮಳೆಯಿಂದಾಗಿ ಎತ್ತರದ ಪ್ರದೇಶದಲ್ಲಿರುವ ಗ್ರಾಮವಾದ ಬೋಹ್ನಲ್ಲಿ ಭೂಕುಸಿತವುಂಟಾಗಿದೆ. ಕನಿಷ್ಠ ಆರು ಮನೆಗಳು ಕೊಚ್ಚಿಹೋಗಿದ್ದು, 10 ಕ್ಕೂ ಹೆಚ್ಚು ಜನರು ಸಿಕ್ಕಿಹಾಕಿಕೊಂಡಿದ್ದಾರೆ ಎಂದು ಭಾವಿಸಲಾಗಿದೆ.
ಧರಂಶಾಲಾದಿಂದ 45 ಕಿಲೋಮೀಟರ್ ದೂರದಲ್ಲಿರುವ ಶಹಪುರ ಉಪವಿಭಾಗ ವ್ಯಾಪ್ತಿಯ ಬೋಹ್ ಗ್ರಾಮಕ್ಕೆ ರೆಸ್ಕ್ಯೂ ಟೀಂಗಳು ತೆರಳಿವೆ. ಆದರೆ ಭೂಕುಸಿತದಿಂದ ರಸ್ತೆಗಳು ಬ್ಲಾಕ್ ಆಗಿರುವುದರಿಂದ ತಲುಪುವಲ್ಲಿ ವಿಳಂಬವಾಗುತ್ತಿದೆ ಎಂದು ಕಾಂಗ್ರಾ ಜಿಲ್ಲೆ ಡಿಸಾಸ್ಟರ್ ಮ್ಯಾನೇಜ್ಮೆಂಟ್ ಅಥಾರಿಟಿಯ ಸಂಚಾಲಕ ಭಾನು ಶರ್ಮ ಹೇಳಿದ್ದಾರೆ.
ಇದನ್ನೂ ಓದಿ: ಕ್ಯಾನ್ಸರ್ನಿಂದ ಬಳಲುತ್ತಿದ್ದ ನಾಯಿಯನ್ನು ಟ್ರಿಪ್ ಕರೆದೊಯ್ದು ಅಂತಿಮ ಆಸೆ ಪೂರೈಸಿದ ಮಾಲೀಕ
“ವಾಯುಯಾನದ ಮೂಲಕ ಸಂರಕ್ಷಕ ತಂಡವನ್ನು ಕಳುಹಿಸಲು ಇಂಡಿಯನ್ ಏರ್ ಫೋರ್ಸ್ಗೆ ಮನವಿ ಮಾಡಿದ್ದೇವೆ. ಆದರೆ ಕೆಟ್ಟ ಹವಾಮಾನದಿಂದಾಗಿ ಅದು ಹಾಲಿ ಸಾಧ್ಯವಾಗುವುದಿಲ್ಲ” ಎಂದಿರುವ ಶರ್ಮ, ಪೊಲೀಸ್ ತಂಡವೊಂದು ನಡೆದುಕೊಂಡೇ ಬೋಹ್ ಗ್ರಾಮವನ್ನು ತಲುಪುವ ಪ್ರಯತ್ನ ಮಾಡುತ್ತಿದೆ. ಅಲ್ಲಿ ಉಂಟಾಗಿರುವ ಯಾವುದೇ ಸಾವುನೋವಿನ ಬಗ್ಗೆ ಆ ತಂಡ ತಲುಪಿದ ಮೇಲೆ ತಿಳಿದುಬರಲಿದೆ ಎಂದಿದ್ದಾರೆ. (ಏಜೆನ್ಸೀಸ್)