ನಾಳೆಯಿಂದ ಜೊತೆ ಜೊತೆಯಲಿ ಧಾರಾವಾಹಿ ದಿನಕ್ಕೆ ಎರಡು ಗಂಟೆ ಪ್ರಸಾರ; ಏಪಿಸೋಡ್​ ಬ್ಯಾಂಕ್​ ಖಾಲಿ ಆಯ್ತು, ಮರುಪ್ರಸಾರ ಶುರುವಾಯ್ತು..

ಬೆಂಗಳೂರು: ಕರೊನಾ ಹಿನ್ನೆಲೆಯಲ್ಲಿ ಸಿನಿಮಾ ರಂಗ ಸೇರಿ ಕಿರುತರೆ ಕ್ಷೇತ್ರ ಸ್ಥಬ್ಧವಾಗಿವೆ. ಚಿತ್ರೀಕರಣ ನಿಂತಿದೆ. ಕಲಾವಿದರೆಲ್ಲ ಕ್ವಾರಂಟೈನ್​ಲ್ಲಿದ್ದಾರೆ. ಇದೆಲ್ಲ ಒಂದು ಕಡೆಯಾದರೆ, ​ಲಾಕ್​ಡೌನ್​​ ಘೋಷಣೆಯಾಗಿದ್ದರಿಂದ ಮುಂಚಿತವಾಗಿ ಧಾರಾವಾಹಿಗಳ ಕಂತುಗಳ ಬ್ಯಾಂಕ್​​ನ್ನು ಸಿದ್ಧಪಡಿಸಿಕೊಳ್ಳುವಂತೆ ಸರ್ಕಾರ ಮೂರು ದಿನಗಳ ಹೆಚ್ಚುವರಿ ಗಡುವು ನೀಡಿತ್ತು. ಅದರಂತೆ ಇದೀಗ ಬಹುತೇಕ ಎಲ್ಲ ಧಾರಾವಾಹಿಗಳ ಕಂತುಗಳು ಮುಗಿಯುತ್ತ ಬಂದಿವೆ. ಆ ಪೈಕಿ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜೊತೆ ಜೊತೆಯಲಿ ಧಾರಾವಾಹಿ ಇವತ್ತೇ ಕೊನೆಯ ಕಂತನ್ನು ಪ್ರಸಾರಮಾಡಲಿದ್ದು, ನಾಳೆಯಿಂದ ಮರುಪ್ರಸಾರ ಆರಂಭವಾಗಲಿದೆ. ಹಾಗಂತ ಈ ಹಿಂದಿನಂತೆ ಅರ್ಧ ಗಂಟೆ ಪ್ರಸಾರ ಆಗುವುದಿಲ್ಲ. ಬದಲಿಗೆ ಸತತ ನಾಲ್ಕು ಕಂತುಗಳಲ್ಲಿ ಧಾರಾವಾಹಿ ಬಿತ್ತರವಾಗಲಿದೆ. ಸುದೀರ್ಘ ಎರಡು ಗಂಟೆ ಪ್ರಸಾರವಾಗಲಿದೆ. ಸಂಜೆ 6ಗಂಟೆಯಿಂದ 8ಗಂಟೆವರೆಗೆ ಮರುಪ್ರಸಾರವಾಗಲಿದೆ. ಅನಿರುದ್ಧ, ಮೇಘಶ್ರೀ ಮುಖ್ಯಭೂಮಿಕೆಯಲ್ಲಿದ್ದಾರೆ.