ದಕ್ಷಿಣ ಭಾರತದ ಹಿಟ್ಟ ಚಿತ್ರಗಳ ರೀಮೇಕ್ ಹಕ್ಕುಗಳನ್ನು ಪಡೆದು, ಹಿಂದಿಯಲ್ಲಿ ನಿರ್ಮಾಣ ಮಾಡುವುದರಲ್ಲಿ ಹಿರಿಯ ನಿರ್ಮಾಪಕ ಬೋನಿ ಕಪೂರ್ ಎತ್ತಿದ ಕೈ. ತೆಲುಗು ಮತ್ತು ತಮಿಳಿನ ಹಲವು ಚಿತ್ರಗಳನ್ನು ಅವರು ಹಿಂದಿಗೆ ರೀಮೇಕ್ ಮಾಡಿದ್ದಾರೆ. ಈಗ ತಮ್ಮ ಮುದ್ದಿನ ಮಗಳು ಜಾಹ್ನವಿಗಾಗಿ ಅವರು ಮಲಯಾಳಂನ ಹಿಟ್ ಚಿತ್ರ ‘ಹೆಲೆನ್’ ಹಿಂದಿ ರೀಮೇಕ್ ಹಕ್ಕುಗಳನ್ನು ತಗೆದಿಟ್ಟುಕೊಂಡಿದ್ದಾರೆ.
ಬೋನಿ ಕಪೂರ್ ಮತ್ತು ಶ್ರೀದೇವಿ ಅವರ ಮುದ್ದಿನ ಮಗಳು ಜಾಹ್ನವಿ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಾರೆ ಎಂಬ ಸುದ್ದಿಯಾದಾಗ, ಬೋನಿ ಕಪೂರ್ ಅವರೇ ಯಾವುದಾದರೊಂದು ಚಿತ್ರದ ಮೂಲಕ ಪರಿಚಯಿಸುತ್ತಾರೆ ಎಂದು ಎಲ್ಲರೂ ಅಂದುಕೊಂಡಿದ್ದರು. ಆದರೆ, ಇದು ಸುಳ್ಳಾಯಿತು. ಬೋನಿ ಬದಲು ಕರಣ್ ಜೋಹರ್, ಜಾಹ್ನವಿಯನ್ನು ‘ಧಡಕ್’ ಮೂಲಕ ಚಿತ್ರರಂಗಕ್ಕೆ ಪರಿಚಯಿಸಿದರು.
ಇದನ್ನೂ ಓದಿ: ಈ ಹೆಸರೇ ನನ್ನ ಗುರುತು … ಅಭಿಮಾನಿಗಳಿಗೆ ಥ್ಯಾಂಕ್ಸ್ ಹೇಳಿದ ಸುದೀಪ್
ಈ ಚಿತ್ರ ಬಾಕ್ಸ್-ಆಫೀಸ್ನಲ್ಲಿ ಯಶಸ್ವಿಯಾಗಿ, ಜಾಹ್ನವಿಗೆ ಬೇಡಿಕೆ ಹೆಚ್ಚಾಯಿತು. ‘ಧಡಕ್’ ನಂತರ ಜಾಹ್ನವಿ ಬೇರೆ ನಿರ್ಮಾಪಕರಿಗೆ ಕಾಲ್ಶೀಟ್ ಕೊಟ್ಟರೂ, ಮನೆಯಲ್ಲಿರುವ ನಿರ್ಮಾಪಕರಿಗೆ ಕೊಟ್ಟಿರಲಿಲ್ಲ. ಇತ್ತ ಬೋನಿ ಸಹ ತಮ್ಮ ಮಗಳ ಅಭಿನಯದಲ್ಲಿ ಒಂದು ಚಿತ್ರ ನಿರ್ಮಿಸಬೇಕು ಎಂದು ಯೋಚಿಸುತ್ತಿದ್ದರು. ಸೂಕ್ತ ಕಥೆಗಾಗಿ ಹುಡುಗಾಟ ನಡೆಸಿದ್ದರು. ಈ ವರ್ಷದ ಆರಂಭದಲ್ಲಿ ಬೋನಿ ತಮ್ಮ ಮಗಳಿಗಾಗಿ ‘ಬಾಂಬೆ ಗರ್ಲ್’ ಎಂಬ ಚಿತ್ರವನ್ನು ನಿರ್ಮಿಸುವುದಕ್ಕೆ ಯೋಚಿಸಿದ್ದರು ಎಂದು ಹೇಳಲಾಗುತ್ತಿದೆ.
ಈ ಮಧ್ಯೆ, ಅದ್ಯಾರೋ ಮಲಯಾಳಂನ ‘ಹೆಲೆನ್’ ಚಿತ್ರವನ್ನು ಈ ಅಪ್ಪ-ಮಗಳಿಗೆ ತೋರಿಸಿದ್ದಾರೆ. ಚಿತ್ರ ನೋಡಿದ ಅಪ್ಪ-ಮಗಳು ಖುಷಿಯಾಗಿದ್ದಷ್ಟೇ ಅಲ್ಲ, ಯಾಕೆ ಈ ಚಿತ್ರವನ್ನು ಹಿಂದಿಯಲ್ಲಿ ರೀಮೇಕ್ ಮಾಡಬಾರದು ಎಂದು ಇಬ್ಬರಿಗೂ ಅನಿಸಿತಂತೆ. ಯಾವಾಗ ಮಗಳು ‘ಹೆಲೆನ್’ನ ಹಿಂದಿ ರೀಮೇಕ್ನಲ್ಲಿ ನಟಿಸುವ ಆಸಕ್ತಿ ತೋರಿಸಿದಳೋ, ಬೋನಿ ಸೀದಾ ತಮ್ಮ ಕಾಂಟ್ಯಾಕ್ಟ್ ಉಪಯೋಗಿಸಿ, ಚಿತ್ರದ ರೀಮೇಕ್ ಹಕ್ಕುಗಳನ್ನು ತರಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ತೆಲುಗು ಬಿಗ್ಬಾಸ್ ಕೆಲಸಗಳು ಶುರು; ಪ್ರೋಮೋ ಶೂಟ್ನಲ್ಲಿ ನಾಗಾರ್ಜುನ್ ಬಿಜಿ
ಸದ್ಯಕ್ಕೆ ಮುಂಬೈನಲ್ಲಿ ಕರೊನಾ ಹಾವಳಿ ಜಾಸ್ತಿ ಇರುವುದರಿಂದ, ಈ ಚಿತ್ರ ಸದ್ಯಕ್ಕೆ ಪ್ರಾರಂಭವಾಗುವುದಿಲ್ಲ ಎನ್ನುವುದು ಗೊತ್ತಿರಲಿ. ಮೊದಲಿಗೆ ಕರೊನಾ ಹಾವಳಿ ಕೊಂಚ ಕಡಿಮೆಯಾಗಬೇಕು. ಆ ನಂತರ, ಜಾಹ್ನವಿ ಈಗಾಗಲೇ ಒಪ್ಪಿಕೊಂಡಿರುವ ಚಿತ್ರಗಳನ್ನೆಲ್ಲಾ ಮುಗಿಸಬೇಕು. ಅದರ ನಂತರವಷ್ಟೇ ಹಿಂದಿಯ ‘ಹೆಲೆನ್’ ಶುರು. ಅದು ಮುಂದಿನ ವರ್ಷವಾದರೂ ಆಗಬಹುದು. ಅದರ ಮುಂದಿನ ವರ್ಷ ಬೇಕಾದರೂ ಆಗಬಹುದು.
‘ಹೆಲೆನ್’ ಚಿತ್ರ ಕನ್ನಡದಲ್ಲೂ ರೀಮೇಕ್ ಆಗಲಿದೆ ಆಗುತ್ತಿದೆ ಎಂಬುದು ವಿಶೇಷ. ವರ್ಷದ ಆರಂಭದಲ್ಲಿ, ರೀಮೇಕ್ ಆಗುತ್ತಿರುವ ವಿಷಯ ಸುದ್ದಿಯಾಗಿತ್ತು. ಲಾಸ್ಯಾ ನಾಗರಾಜ್ ನಾಯಕಿಯಾಗಿ ನಟಿಸುತ್ತಿದ್ದಾರೆ ಎಂದು ಸಹ ಹೇಳಲಾಗಿತ್ತು. ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ಇಷ್ಟರಲ್ಲಿ ಚಿತ್ರೀಕರಣ ಸಹ ಶುರುವಾಗಬೇಕಿತ್ತು. ಆದರೆ, ಕರೊನಾ ಹಾವಳಿ ನೋಡಿದರೆ, ಸದ್ಯಕ್ಕೆ ಚಿತ್ರ ಶುರುವಾಗುವುದು ಸಂಶಯ.