ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) 2024ರ ಆವೃತ್ತಿಗೆ ಈಗಾಗಲೇ ದಿನಗಣನೆ ಆರಂಭಗೊಂಡಿದ್ದು, ಇತ್ತೀಚೆಗಷ್ಟೇ ಬಿಸಿಸಿಐ ಕೂಡ ಮೊದಲ ಹಂತದಲ್ಲಿ ನಡೆಯಲಿರುವ 21 ಪಂದ್ಯಗಳ ವೇಳಾಪಟ್ಟಿಯನ್ನು ಬಿಡುಗಡೆಗೊಳಿಸಿತು. ತಮ್ಮ ನೆಚ್ಚಿನ ತಂಡಗಳು ಆಡಲಿರುವ ಮೊದಲ ಪಂದ್ಯಗಳ ದಿನಕ್ಕಾಗಿ ಕುತೂಹಲದಿಂದ ಕಾಯುತ್ತಿರುವ ಕ್ರಿಕೆಟ್ ಅಭಿಮಾನಿಗಳು, ಇದೀಗ ವಿರಾಟ್ ಕೊಹ್ಲಿ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮತ್ತು ಮಹೇಂದ್ರ ಸಿಂಗ್ ಧೋನಿ ಕ್ಯಾಪ್ಟನ್ಸಿಯ ಚೆನ್ನೈ ಸೂಪರ್ ಕಿಂಗ್ಸ್ ನಡುವಿನ ಹೈವೋಲ್ಟೇಜ್ ಪಂದ್ಯ ವೀಕ್ಷಿಸಲು ಕಾತರದಿಂದ ಎದುರುನೋಡುತ್ತಿದ್ದಾರೆ.
ಐಪಿಎಲ್ ಆವೃತ್ತಿ ಪ್ರಾರಂಭವಾಗುತ್ತಿದೆ ಎಂಬ ಸುದ್ದಿ ಹೊರಬೀಳುತ್ತಿದ್ದಂತೆ ಕ್ರಿಕೆಟ್ ಅಭಿಮಾನಿಗಳಲ್ಲಿ ಅದೇನೋ ಉತ್ಸಾಹ, ಭಾರೀ ಕೌತುಕ. ಕಾರಣ ಈ ಲೀಗ್ನಲ್ಲಿ ನಡೆಯಲಿರುವ ಪ್ರತಿಯೊಂದು ಪಂದ್ಯಗಳು ಕೂಡ ಅಷ್ಟೇ ರೋಚಕ, ರೋಮಾಂಚನ, ಭರಪೂರ ಮನರಂಜನೆಯನ್ನು ನೀಡುತ್ತದೆ. ಈ ಹಿಂದೆ 8 ತಂಡಗಳು ಅಖಾಡಕ್ಕೆ ಇಳಿದು ಭರ್ಜರಿ ಪೈಪೋಟಿ ಕೊಡುತ್ತಿತ್ತು. ಆದರೆ ಈಗ 10 ಟೀಮ್ಗಳಿದ್ದು, ಕ್ರಿಕೆಟ್ ಫ್ಯಾನ್ಸ್ಗೆ ಭರಪೂರ ಮನರಂಜನೆಯ ರಸದೌತಣ ನೀಡಲು ಸಜ್ಜಾಗಿವೆ.
ಪ್ರತಿಯೊಂದು ತಂಡ ಅದರದ್ದೇ ಆದ ವಿಶೇಷ ಅಭಿಮಾನಿ ಬಳಗವನ್ನು ಹೊಂದಿದ್ದು, ಆಯಾ ಟೀಮ್ನ ಸ್ಟಾರ್ ಆಟಗಾರರೇ ಫ್ಯಾನ್ಸ್ಗಳಿಗೆ ಪ್ರಮುಖ ಆಕರ್ಷಣೆ. ವಿರಾಟ್ ಕೊಹ್ಲಿ, ಡೇವಿಡ್ ವಾರ್ನರ್, ಎಂ.ಎಸ್. ಧೋನಿ, ಜಡೇಜಾ, ಫಾಫ್ ಡುಪ್ಲೇಸಿಸ್, ರೋಹಿತ್ ಶರ್ಮಾ, ಕೀರಾನ್ ಪೋಲಾರ್ಡ್, ಹಾರ್ದಿಕ್ ಪಾಂಡ್ಯ, ಡೇವಿಡ್ ಮಿಲ್ಲರ್ ಹೀಗೆ ಮುಂತಾದವರು ಸ್ಟಾರ್ ಆಕರ್ಷಣೆ. ಇವರೆಲ್ಲರೂ ತಮ್ಮ ತಮ್ಮ ಟೀಮ್ನಲ್ಲಿದ್ದರೆ ಒಂದೊಳ್ಳೆ ಪೈಪೋಟಿಯಿರುವ ಮ್ಯಾಚ್ ನೋಡಬಹುದು ಎಂಬುದು ನೋಡುಗರ ಲೆಕ್ಕಾಚಾರ.
ಇದನ್ನೂ ಓದಿ: ಲೋಕಸಭಾ ಚುನಾವಣೆ 2024: ಚಿನ್ನದನಾಡಲ್ಲಿ ಸ್ಪರ್ಧೆಗೆ ಪೈಪೋಟಿ
ಈ ರೀತಿ ಎಲ್ಲಾ ತಂಡದಲ್ಲಿಯೂ ಒಬ್ಬೊಬ್ಬರು ಸ್ಟಾರ್ ಆಟಗಾರರಿದ್ದಾರೆ. ಆ ಪೈಕಿ ಹೆಚ್ಚು ಪ್ರಚಲಿತದಲ್ಲಿರುವುದು ಎಂದರೆ ಅದು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ, ಕ್ಯಾಪ್ಟನ್ ಕೂಲ್ ಮಹೇಂದ್ರ ಸಿಂಗ್ ಧೋನಿ. ಹೌದು, ಐಪಿಎಲ್ ಇತಿಹಾಸದಲ್ಲೇ ಅತೀ ಹೆಚ್ಚಿನ ದಾಖಲೆಗಳನ್ನು ಹೊಂದಿರುವ ಸಿಎಸ್ಕೆ ತಂಡ ಐದು ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸಲು ನಾಯಕನಾಗಿ ಪ್ರಮುಖ ಪಾತ್ರ ವಹಿಸಿರುವ ಧೋನಿಗೆ ವಿಶೇಷ ಹಾಗೂ ಅಪಾರ ಸಂಖ್ಯೆಯ ಅಭಿಮಾನಿಗಳಿದ್ದಾರೆ.
2008ರಿಂದ ಐಪಿಎಲ್ ಆಡುತ್ತಿರುವ ಕ್ಯಾಪ್ಟನ್ ಕೂಲ್, ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಯಶಸ್ವಿ ನಾಯಕರಾಗಿ ಮುನ್ನಡೆಸಿಕೊಂಡು ಬಂದಿದ್ದಾರೆ. ತಮ್ಮ ತಾಳ್ಮೆ ಹಾಗೂ ಬುದ್ದಿವಂತಿಕೆ ಆಟದಿಂದಲೇ ಹೆಚ್ಚು ಜನಪ್ರಿಯತೆ ಪಡೆದಿರುವ ಧೋನಿ, ಇದೀಗ ತಮ್ಮ 42ನೇ ವಯಸ್ಸಿನಲ್ಲೂ ಅಖಾಡಕ್ಕೆ ಇಳಿಯುವ ಮೂಲಕ ಅಭಿಮಾನಿಗಳ ಕ್ರೇಜ್ ಅನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ.
ಇದನ್ನೂ ಓದಿ: ಬಿಜಿನೆಸ್ ಕಾನಕ್ಲೇವ್ ಗೆ ಅದ್ದೂರಿ ತರೆ, ಉದ್ಯಮ ದಿಗ್ಗಜರು, ಗಣ್ಯರಿಂದ ಪ್ರದರ್ಶನ ವೀಕ್ಷಣೆ
ಅಂತಾರಾಷ್ಟ್ರೀಯ ಕ್ರಿಕೆಟ್ ಫಾರ್ಮೆಟ್ಗಳಿಗೆ ಧೋನಿ ನಿವೃತ್ತಿ ಘೋಷಿಸಿದ ದಿನದಿಂದಲೂ ಇದೇ ಕಡೆಯ ಬಾರಿಗೆ ಕ್ಯಾಪ್ಟನ್ ಕೂಲ್ ಸಿಎಸ್ಕೆ ತಂಡವನ್ನು ಮುನ್ನಡೆಸಲಿದ್ದಾರೆ. ಮುಂಬರುವ ಐಪಿಎಲ್ನಲ್ಲಿ ಧೋನಿ ಆಡುವುದಿಲ್ಲ ಎಂದು ಹೇಳಲಾಗುತ್ತಿದೆ. ಆದರೆ, ಇದೆಲ್ಲವನ್ನೂ ತಮ್ಮ ಪುನರ್ ಆಗಮನದ ಮೂಲಕ ಹುಸಿ ಮಾಡುತ್ತಿದ್ದಾರೆ ಮಾಹಿ. ಒಂದೆಡೆ ಇದೇ ಲಾಸ್ಟ್ ಐಪಿಎಲ್ ಇರಬಹುದು ಎಂದು ಅತೀವ ಬೇಸರದಿಂದಲೇ ಕೊನೆಯ ಪಂದ್ಯದವರೆಗೂ ಕಾಯುವ ಅಭಿಮಾನಿಗಳಿಗೆ ಮುಂದಿನ ವರ್ಷವೂ ಕ್ಯಾಪ್ಟನ್ ಕೂಲ್ ಫೀಲ್ಡ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಅಧಿಕೃತವಾದಾಗ ಆಗುವ ಸಂತಸ ಅಷ್ಟಿಷ್ಟಲ್ಲ.
ಕಳೆದ ವರ್ಷವೇ ಧೋನಿ ಮುಂದಿನ ಸೀಸನ್ನಲ್ಲಿ ಕಾಣಿಸಿಕೊಳ್ಳುವುದಿಲ್ಲ ಎಂದು ಹೇಳಿದಾಗ ಕ್ರಿಕೆಟ್ ಅಭಿಮಾನಿಗಳು ನೀವಿಲ್ಲದಿದ್ದರೇ ಐಪಿಎಲ್ ನೋಡಲು ಬಲುಕಷ್ಟ ಎಂದಿದ್ದರು. ಇದೀಗ ಈ ವಿಷಯ ಈ ಬಾರಿಯೂ ಮುನ್ನೆಲೆಗೆ ಬಂದಿದ್ದು, 2024ರ ಸೀಸನ್ ಧೋನಿ ಅವರ ಕಡೆಯ ಐಪಿಎಲ್ ಆವೃತ್ತಿ ಎಂದು ಹೇಳಲಾಗುತ್ತಿದೆ. ಆದರೆ ಈ ಬಗ್ಗೆ ಅಧಿಕೃತವಾಗಿ ತಿಳಿಯಲು ಈ ಸೀಸನ್ನ ಕೊನೆಯ ಪಂದ್ಯದವರೆಗೂ ಕಾಯಬೇಕಿದೆ.
ಈ ನಟ ಯಾರೆಂದು ಗೊತ್ತಿಲ್ಲದಿದ್ದರೂ ಇವರ ಡೈಲಾಗ್ ಮಾತ್ರ ಪಕ್ಕಾ ನೆನಪಿರುತ್ತೆ!