ಬೆಂಗಳೂರು: ಕರೊನಾದಿಂದಾಗಿ ಇಡೀ ವಿಶ್ವವೇ ತತ್ತರಿಸಿದೆ. ದೇಶಾದ್ಯಂತ ಲಾಕ್ಡೌನ್ನಿಂದಾಗಿ ಆರ್ಥಿಕ ಚಟುವಟಿಕೆಗಳು ಕುಸಿದಿವೆ. ಸದ್ಯ ಲಾಕ್ಡೌನ್ ನಿರ್ಬಂಧಗಳು ತೆರವಾಗಿದ್ದರೂ, ಆರ್ಥಿಕ ಪರಿಸ್ಥಿತಿ ಸುಧಾರಿಸಲು ಇನ್ನು ಹಲವು ತಿಂಗಳುಗಳೇ ಬೇಕೆಂದು ತಜ್ಞರು ಲೆಕ್ಕಾಚಾರ ಹಾಕಿದ್ದಾರೆ. ಆದಾಯವೇ ಇಲ್ಲದ ಕಾರಣ ಹಲವು ಕಂಪನಿಗಳು ಉದ್ಯೋಗಿಗಳನ್ನು ವಜಾ ಮಾಡಿವೆ, ಸಂಬಳ ಕಡಿತ ಮಾಡಿವೆ, ಬಡ್ತಿಯನ್ನು ಮುಂದೂಡಿವೆ. ಆದರೆ, ಇನ್ಫೋಸಿಸ್ ಮುನ್ನಡೆಸುತ್ತಿರುವವರಿಗೆ ಇದ್ಯಾವುದು ಪರಿಣಾಮ ಬೀರಿಲ್ಲ ಕಾಣುತ್ತದೆ.
ಇನ್ಫೋಸಿಸ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಯಾಗಿರುವ ಸಲೀಲ್ ಪಾರೇಖ್ ಸಂಬಳ ಶೇ.27 ಏರಿಕೆ ಕಂಡಿದೆ. 2018-19ರಲ್ಲಿ 4.8 ಮಿಲಿಯನ್ ಡಾಲರ್ (ಅಂದಾಜು 36.25 ಕೋಟಿ ರೂ.) ಗಳಾಗಿದ್ದ ಅವರ ವೇತನ ಮೊತ್ತ 2019-20 ರಲ್ಲಿ 6.1 ಮಿಲಿಯನ್ ಡಾಲರ್ಗೆ (ಅಂದಾಜು 46.06 ಕೋಟಿ ರೂ.) ಏರಿಕೆಯಾಗಿದೆ. ಅಮೆರಿಕದ ಷೇರು ಮಾರುಕಟ್ಟೆ ನಿಯಂತ್ರಣ ಮಂಡಳಿಗೆ ನೀಡಿದ ವರದಿಯಲ್ಲಿ ಈ ಮಾಹಿತಿ ಇದೆ. ಇದರಲ್ಲಿ ಸಂಬಳ, ಬೋನಸ್, ಕಂಪನಿಯ ಷೇರುಗಳು ಸೇರಿವೆ.
ಇದನ್ನೂ ಓದಿ; ಮೊಬೈಲ್ ಸಂಖ್ಯೆಗಿನ್ನು 11 ಅಂಕಿಗಳು, ಟ್ರಾಯ್ ಶಿಫಾರಸು
ಮುಖ್ಯ ನಿರ್ವಹಣಾ ಅಧಿಕಾರಿ ಯು.ಬಿ. ಪ್ರವೀಣ್ ರಾವ್ ಸಂಬಳದಲ್ಲೂ ಶೇ.29 ಏರಿಕೆ ಕಂಡಿದ್ದು, 2.2 ಮಿಲಿಯನ್ ಡಾಲರ್ಗೆ (ಅಂದಾಜು 16.61 ಕೋಟಿ ರೂ.) ಹೆಚ್ಚಳವಾಗಿದೆ. ಇನ್ನಿಬ್ಬರು ಅಧ್ಯಕ್ಷರಾದ ರವಿಕುಮಾರ್ ಹಾಗೂ ಮೋಹಿತ್ ಜೋಶಿ ಸಂಬಳದಲ್ಲೂ ಕ್ರಮವಾಗಿ ಶೇ.25 ಹಾಗೂ ಶೇ.24.6 ಏರಿಕೆಯಾಗಿ 3 ಮಿಲಿಯನ್ ಡಾಲರ್ (ಅಂದಾಜು 22.65 ಕೋಟಿ ರೂ.) ಹಾಗೂ 3.2 ಮಿಲಿಯನ್ ಡಾಲರ್ (24.16 ಕೋಟಿ ರೂ.) ಆಗಿದೆ.
ಕಂಪನಿಯ ಚೇರ್ಮನ್ ನಂದನ್ ನಿಲೇಕಣಿ ಯಾವುದೇ ಸಂಬಳವನ್ನು ಸ್ವೀಕರಿಸದಿರಲು ನಿರ್ಧರಿಸಿದ್ದಾರೆ. ಕರೊನಾದಿಂದಾಗಿ ಕಂಪನಿಯ ಆದಾಯ ಹಾಗೂ ಲಾಭಾಂಶದ ಮೇಲೆ ಪರಿಣಾಮ ಉಂಟಾಗಿದೆ. ಗ್ರಾಹಕ ಕಂಪನಿಗಳ ಆರ್ಥಿಕ ಸಂಕಷ್ಟ ಕೂಡ ಕಂಪನಿ ಮೇಲೆ ಪ್ರಭಾವ ಬೀರುತ್ತಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.
ಬಾಹ್ಯಾಕಾಶಯಾನಿಗಳನ್ನೂ ಬಿಡಲಿಲ್ಲ ಕರೊನಾ, ಕ್ವಾರಂಟೈನ್ ಬಳಿಕವೇ ಆಗಸಕ್ಕೆ ಚಿಮ್ಮಿದ ಗಗನಯಾನಿಗಳು