ನೋಮ್ ಪೆನ್(ಕಾಂಬೋಡಿಯಾ): ಎರಡು ದಶಕಗಳ ಹಿಂದೆ ಕಚ್ಚಿದ ಸೋಂಕುಳ್ಳ ಸೊಳ್ಳೆಯಿಂದಾಗಿ ಕಾಂಬೋಡಿಯಾ ಮೂಲದ ವ್ಯಕ್ತಿಯೊಬ್ಬನ ಕಾಲು ಸಾಮಾನ್ಯ ಗಾತ್ರಕ್ಕಿಂತ ಐದು ಪಟ್ಟು ಹೆಚ್ಚು ಊದಿಕೊಂಡಿದ್ದು, ನಡೆದಾಡಲು ಪರದಾಟ ನಡೆಸುವಂತಾಗಿದೆ. ಅಲ್ಲದೆ, ಇದೊಂದು ಗುಣಪಡಿಸಲಾಗದ ಪರವಾಲಂಬಿ ರೋಗವಾಗಿದೆ.
ಬೋಂಗ್ ಥೆಟ್ (27) ಸಂತ್ರಸ್ತ ಯುವಕ. ಈತ ಛನಾಂಗ್ ಪ್ರಾಂತ್ಯದ ಕಂಪೊಂಗ್ ಏರಿಯಾ ನಿವಾಸಿಯಾಗಿದ್ದು, ತನ್ನ ಮನೆಯಲ್ಲೇ ಓಡಾಡಬೇಕೆಂದರೂ ನೋವು ತುಂಬಿದ ಕಾಲುಗಳನ್ನು ಎಳೆದುಕೊಂಡು ತಿರುಗಾಡಬೇಕಿದೆ. ತಾನೋರ್ವ ಫುಟ್ಬಾಲ್ ಆಟಗಾರನಾಗಬೇಕೆಂಬ ಬೋಂಗ್ ಕನಸಿಗೆ ಅನಿರೀಕ್ಷಿತ ಕಾಯಿಲೆ ತಣ್ಣೀರೆರಚಿದೆ.
6 ವರ್ಷದವನಿದ್ದಾಗ ಕಾಲಿನ ಮೇಲೆ ಆದ ಸಣ್ಣ ಗಾಯದಿಂದ ಆರಂಭವಾದ ಗಡ್ಡೆ ಬೋಂಗ್ 12 ವರ್ಷ ಪೂರೈಸುವಷ್ಟರಲ್ಲಿ ಇಡೀ ಕಾಲನ್ನೇ ಆವರಿಸಿಕೊಂಡಿದೆ. ಮೊದಲೇ ಕುಟುಂಬದವರು ಎಚ್ಚೆತ್ತುಕೊಂಡಿದ್ದರೆ, ಬೋಂಗ್ ಬಹುಶಃ ಗುಣಮುಖನಾಗಿರುತ್ತಿದ್ದ. ಆದರೆ, ಹೊರಭಾಗದಲ್ಲಿ ಆಟವಾಡುವಾಗ ಆಗಿರುವ ತರಚು ಗಾಯವೆಂದು ಕುಟುಂಬ ನಿರ್ಲಕ್ಷಿಸಿತ್ತು. ಆದರೆ, ಇಂದು ಅದೇ ನಿರ್ಲಕ್ಷ್ಯ ಬೋಂಗ್ ಜೀವನದ ಉತ್ಸಾಹವನ್ನೇ ಕಸಿದುಕೊಂಡಿದೆ.
ಇದನ್ನೂ ಓದಿ: ಇಬ್ಬರು ಖದೀಮರು ಕದ್ದಿದ್ದು ಒಂದಲ್ಲ, ಎರಡಲ್ಲ ಬರೋಬ್ಬರಿ 108 ಬೈಕ್: ಪೊಲೀಸರ ಕೈಗೆ ಸಿಕ್ಕಿದ್ದೇ ರೋಚಕ..!
ಇನ್ನು ಮನೆಯ ಸಮೀಪದ ಕಾರ್ಖಾನೆಯಲ್ಲಿ ಬೋಂಗ್ ಕುಟುಂಬ ಕೆಲಸ ಮಾಡುತ್ತದೆ. ಬಡತನ ತಾಂಡವಾಡುತ್ತಿರುವ ದೇಶದಲ್ಲಿ ಚಿಕಿತ್ಸೆಗೆ ಬೇಕಾದಷ್ಟು ಹಣ ಒದಗಿಸಲು ಬೋಂಗ್ ಕುಟುಂಬಕ್ಕೆ ಸಾಧ್ಯವಾಗಲಿಲ್ಲ. ಹೀಗಾಗಿ ವರ್ಷದಿಂದ ವರ್ಷಕ್ಕೆ ಆತನ ಕಾಲಿನ ಸ್ಥಿತಿ ಬಿಗಡಾಯಿತ್ತಾ ಹೋಯಿತು. ಆಸ್ಪತ್ರೆಯೊಂದನ್ನು ಬಿಟ್ಟು ಬೇರೆ ಎಲ್ಲ ಮಾರ್ಗಗಳನ್ನು ಕಳೆದ ಎರಡು ದಶಕಗಳಿಂದ ಬೋಂಗ್ ಪ್ರಯತ್ನಿಸಿದ್ದಾರೆ. ಈತನ ನೋವಿನ ಕತೆ ಕೇಳಿ ಸ್ವಯಂ ಸೇವಕರು ಚಿಕಿತ್ಸೆ ಕೊಡಿಸಲು ಮುಂದೆ ಬಂದಿದ್ದಾರೆ.
ಕಾಂಬೋಡಿಯಾದ ಉದ್ಯಮಿ ಮಹಿಳೆ ದನಾ ಟ್ರೈ ಎಂಬುವರು 10,000,000 ಕಾಂಬೋಡಿಯಾ ರಿಯಲ್ (ಭಾರತೀಯ ಕರೆನ್ಸಿ 1,80,120 ರೂ.) ನೀಡಿದ್ದಾರೆ. ಇದೀಗ ಮೊದಲ ಬಾರಿಗೆ ಬೋಂಗ್ ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ರಕ್ತ ಪರೀಕ್ಷೆ ನಡೆಸಿದ ವೈದ್ಯರು ಇದೊಂದು ಲೈಂಫಟಿಕ್ ಫೈಲೇರಿಯಾಸಿಸ್ ಪರವಾಲಂಬಿ ರೋಗ ಎಂದು ಪತ್ತೆಹಚ್ಚಿದ್ದಾರೆ. ಸೋಂಕುಳ್ಳ ಸೊಳ್ಳೆಯ ಕಡಿತದಿಂದಾಗಿ ಇದು ಸಂಭವಿಸಿದೆ ಎಂದು ಹೇಳಿದ್ದಾರೆ. ಈ ರೋಗವನ್ನು ಗುಣಪಡಿಸಲು ಈವರೆಗೂ ಯಾವುದೇ ಔಷಧ ಇಲ್ಲ ಮತ್ತು ಇದು ಗುಣಪಡಿಸಲಾಗದ ಕಾಯಿಲೆ ಎಂದು ತಿಳಿಸಿದ್ದಾರೆ. ಇದನ್ನು ತಿಳಿದ ಬೋಂಗ್ ಹೃದಯ ಒಂದು ಕ್ಷಣ ಕಂಪಿಸಿತು. ಆದರೂ ನೆರವಿಗೆ ಬಂದ ಜನರಿಗೆ ಬೋಂಗ್ ಧನ್ಯವಾದ ಹೇಳಿದ್ದಾರೆ.
ನನ್ನ ಬಗ್ಗೆ ಕಾಳಜಿ ವಹಿಸುವ ವ್ಯಕ್ತಿಗಳಿದ್ದಾರೆ ಎಂದು ತಿಳಿದು ನನಗೆ ಸಂತೋಷವಾಯಿತು. ನನ್ನು ಚಿಕಿತ್ಸೆ ಮತ್ತು ಊಟಕ್ಕಾಗಿ ನೆರವು ಮಾಡಿದವರಿಗೆ ಕತಜ್ಞನಾಗಿದ್ದೇನೆಂದು ಬೋಂಗ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಚಿಕಿತ್ಸೆ ತೆಗೆದುಕೊಳ್ಳುವುದನ್ನು ಮುಂದುವರಿಸುತ್ತೇನೆ. ಅದರಿಂದಾದರೂ ಸ್ವಲ್ಪಮಟ್ಟಿಗೆ ನನಗೆ ನೆಮ್ಮದಿ ಸಿಗುವಂತಾಗಲಿ ಎಂದಿದ್ದಾರೆ. (ಏಜೆನ್ಸೀಸ್)
10 ತಿಂಗಳ ಹೆಣ್ಣು ಮಗು ರೇಪ್ ಮಾಡಿ, ಗೂಗಲ್ ಹುಡುಕಾಡಿದ ಪಾಪಿ ತಂದೆ: ಮೊಬೈಲ್ನಲ್ಲಿತ್ತು ಭಯಾನಕ ರಹಸ್ಯ