ಪಾಟ್ಚೇಫ್ಸ್ಟ್ರೋಮ್ (ದಕ್ಷಿಣ ಆಫ್ರಿಕಾ): ಇಲ್ಲಿನ ಸೆನ್ವೆಸ್ ಪಾರ್ಕ್ ಕ್ರೀಡಾಂಗಣದಲ್ಲಿ ನಡೆದ 19 ವಯೋಮಿತಿ ಏಕದಿನ ಕ್ರಿಕೆಟ್ ವಿಶ್ವಕಪ್ ಟೂರ್ನಿಯ ಸೆಮಿಫೈನಲ್ ಪಂದ್ಯದಲ್ಲಿ ಯಶಸ್ವಿ ಜೈಪಾಲ್(105* ರನ್, 113 ಎಸೆತ, 8 ಬೌಂಡರಿ, 4 ಸಿಕ್ಸರ್) ಮತ್ತು ದಿವ್ಯಾಂಶ್ ಸಕ್ಸೆನಾ(59* ರನ್, 99 ಎಸೆತ, 6 ಬೌಂಡರಿ) ಅವರ ಮುರಿಯದ ಜತೆಯಾಟದಿಂದಾಗಿ ಟೀಮ್ ಇಂಡಿಯಾ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಬಗ್ಗುಬಡಿದು ಸತತ ಮೂರನೇ ಬಾರಿ ಫೈನಲ್ಗೆ ಲಗ್ಗೆ ಇಟ್ಟಿದೆ.
ಪಾಕ್ ನೀಡಿದ್ದ 173 ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ ಟೀಮ್ ಇಂಡಿಯಾ ಯಾವುದೇ ವಿಕೆಟ್ ನೀಡದೇ ಸುಲಭವಾಗಿ ಗುರಿ ಮುಟ್ಟಿತ್ತು. ಆರಂಭಿಕರಾಗಿ ಕಣಕ್ಕಿಳಿದ ಯಶಸ್ವಿ ಜೈಪಾಲ್ ಮತ್ತು ದಿವ್ಯಾಂಶ್ ಸಕ್ಸೇನಾ ಕೊನೆಯವರೆಗೂ ವಿಕೆಟ್ ಕಾಪಾಡಿಕೊಂಡು ಪಾಕ್ ಬೌಲರ್ಗಳನ್ನು ಮನಸೋ ಇಚ್ಛೆ ದಂಡಿಸುವ ಮೂಲಕ ಸಾಕಷ್ಟು ಕಾಡಿದರು. ಶತಕಕ್ಕೆ ಒಂದು ರನ್ ಬೇಕಿದ್ದಾಗ ಸಿಕ್ಸರ್ ಸಿಡಿಸಿದ ಜೈಪಾಲ್ ಟೀಮ್ ಇಂಡಿಯಾಗೆ ಗೆಲುವು ತಂದುಕೊಟ್ಟಿದ್ದಲ್ಲದೆ ಶತಕವನ್ನು ಸಂಭಮಿಸಿದರು.
ಅಂತಿಮವಾಗಿ ಟೀಮ್ ಇಂಡಿಯಾ 43.1 ಓವರ್ಗಳಲ್ಲಿ ಯವುದೇ ವಿಕೆಟ್ ನಷ್ಟವಿಲ್ಲದೇ 176 ರನ್ ಕಲೆಹಾಕುವ ಮೂಲಕ ಪಾಕ್ ವಿರುದ್ಧ ಗೆದ್ದು ಬೀಗಿತು. ಈ ಮೂಲಕ ಸತತ ಮೂರನೇ ಬಾರಿಗೆ ಫೈನಲ್ ಲಗ್ಗೆ ಇಟ್ಟಿದೆ.
ಪಾಕ್ ಪರ ಯಾವೊಬ್ಬ ಬೌಲರ್ಗಳು ಕೂಡ ಪರಿಣಾಮಕಾರಿಯಾಗಲಿಲ್ಲ. ಎದುರಾಳಿ ಆಟಗಾರರ ವಿಕೆಟ್ ಪಡೆಯುವಲ್ಲಿ ಪಾಕ್ ಬೌಲರ್ಗಳು ತಿಣುಕಾಡಿದರು. ಈ ಮೂಲಕ ಪಂದ್ಯವನ್ನು ಕೈಚೆಲ್ಲುವ ಮೂಲಕ ಭಾರತದ ಎದುರು ಪಾಕ್ ಮತ್ತೊಮ್ಮೆ ಮುಖಭಂಗ ಅನುಭವಿಸಿದೆ. (ಏಜೆನ್ಸೀಸ್)
ಐಸಿಸಿ ಅಂಡರ್ 19 ವಿಶ್ವಕಪ್ ಸೆಮಿಫೈನಲ್: ಭಾರತದ ಬೌಲಿಂಗ್ ದಾಳಿಗೆ ಬೆದರಿದ ಪಾಕ್ ಪಡೆಯಿಂದ ಸಾಧಾರಣ ಗುರಿ