ನವದೆಹಲಿ: ಲಡಾಖ್ನ ಪೂರ್ವಭಾಗದ ವಾಸ್ತವ ಗಡಿರೇಖೆಯ ಬಳಿ ಉದ್ವಿಗ್ನ ಪರಿಸ್ಥಿತಿ ಮುಂದುವರಿದಿರುವಂತೆ ಭಾರತ ರಷ್ಯಾದಿಂದ 12 ಸುಖೋಯಿ 30ಎಂಕೆಐ ಮತ್ತು 21 ಮಿಗ್-29 ಯುದ್ಧವಿಮಾನಗಳನ್ನು ಖರೀದಿಸಲು ಮುಂದಾಗಿದೆ. ಇದಲ್ಲದೆ, ಹಾಲಿ ಇರುವ 59 ಮಿಗ್ ಯುದ್ಧವಿಮಾನಗಳ ಅಪ್ಗ್ರೇಡೇಷನ್ ಅನ್ನೂ ಪಡೆದುಕೊಳ್ಳುತ್ತಿದೆ.
ರಷ್ಯಾದಿಂದ ಮಿಗ್-29 ಅಪ್ಗ್ರೇಡೇಷನ್ ಅನ್ನು ಪಡೆದುಕೊಳ್ಳಲಾಗುತ್ತಿದ್ದು ಇದಕ್ಕಾಗಿ 7.4 ಸಾವಿರ ಕೋಟಿ ರೂಪಾಯಿ ವೆಚ್ಚ ಮಾಡಲಾಗುತ್ತಿದೆ. ಎಚ್ಎಎಲ್ಗೆ 10.7ಸಾವಿರ ಕೋಟಿ ರೂ. ಕೊಟ್ಟು 12 ಸುಖೋಯಿ ವಿಮಾನಗಳನ್ನು ಖರೀದಿಸಲಾಗುತ್ತಿದೆ.
ಇದನ್ನೂ ಓದಿ: ರಾಜೀನಾಮೆ ತೂಗುಗತ್ತಿಯಿಂದ ತಪ್ಪಿಸಿಕೊಳ್ಳಲು ಅಧಿವೇಶವನ್ನೇ ಮುಂದೂಡಿದ ಓಲಿ
ಯುದ್ಧವಿಮಾನಗಳ ಸ್ಕ್ವಾಡ್ರನ್ ಅನ್ನು ಹೆಚ್ಚಿಸಬೇಕು ಎಂದು ಭಾರತೀಯ ವಾಯುಪಡೆ ತುಂಬಾ ಕಾಲದಿಂದಲೂ ಕೇಳಿಕೊಳ್ಳುತ್ತಿತ್ತು. ಕೇಂದ್ರ ಸರ್ಕಾರ ಇದೀಗ ಈ ಮನವಿಗೆ ಸ್ಪಂದಿಸಿದೆ.
ದೇಶಿಯ ಕ್ಷಿಪಣಿ ಖರೀದಿಗೂ ಅಸ್ತು: ದೇಶಿಯವಾಗಿ ತಯಾರಿಸಲ್ಪಟ್ಟಿರುವ ಅಸ್ತ್ರಾ ಗಗನದಿಂದ ಗಗನಕ್ಕೆ ಚಿಮ್ಮುವ ಕ್ಷಿಪಣಿಗಳ ಖರೀದಿಗೂ ಕೇಂದ್ರ ಸರ್ಕಾರ ಹಸಿರು ನಿಶಾನೆ ತೋರಿದೆ. ಇದು ಡಿಆರ್ಡಿಒ ಪಾಲಿಗೆ ಅತಿದೊಡ್ಡ ಯಶಸ್ಸು ಆಗಿದೆ. ಇದೇ ಸಂದರ್ಭದಲ್ಲಿ ಶಸ್ತ್ರಾಸ್ತ್ರ ಖರೀದಿ ಮಂಡಳಿ (ಡಿಎಸಿ) ದೇಶಿಯವಾಗಿ ನಿರ್ಮಿಸಲಾಗಿರುವ ದೂರಗಾಮಿ ಗಗನದಿಂದ ಗಗನಕ್ಕೆ ಚಿಮ್ಮುವ ಕ್ಷಿಪಣಿಗಳನ್ನು ಭಾರತೀಯ ಸೇನಾಪಡೆ ಮತ್ತು ಭಾರತೀಯ ವಾಯುಪಡೆಗಳಿಗಾಗಿ ಖರೀದಿಸಲು ಅನುಮತಿ ನೀಡಿದೆ.