ಹಾಂಗ್ರೆೌ: ಏಷ್ಯನ್ಸ್ ಗೇಮ್ಸ್ನಲ್ಲಿ ಪದಕಗಳ ಶತಕ ಸಿಡಿಸಿ ಬೀಗಿರುವ ಭಾರತ, 4ನೇ ಆವೃತ್ತಿಯ ಏಷ್ಯನ್ ಪ್ಯಾರಾ ಗೇಮ್ಸ್ನಲ್ಲೂ ಅದೇ ಸಾಧನೆಯನ್ನು ಪುನರಾವರ್ತಿಸುವತ್ತ ಮುನ್ನಡೆದಿದೆ. ಕ್ರೀಡಾಕೂಟದ ಮೊದಲ 2 ದಿನಗಳಲ್ಲೇ ಭಾರತದ ಪ್ಯಾರಾ ಕ್ರೀಡಾಪಟುಗಳು ಬರೋಬ್ಬರಿ 34 ಪದಕಗಳನ್ನು ಗೆದ್ದು ಬೀಗಿದ್ದಾರೆ. ಇದರಲ್ಲಿ 9 ಚಿನ್ನ, 12 ಬೆಳ್ಳಿ ಮತ್ತು 13 ಕಂಚಿನ ಪದಕಗಳು ಸೇರಿವೆ. ಕ್ರೀಡಾಕೂಟದ ಪದಕ ಸ್ಪರ್ಧೆಯ ಮೊದಲ ದಿನವಾದ ಸೋಮವಾರ 17 ಪದಕ ಗೆದ್ದಿದ್ದ ಭಾರತ, ಮಂಗಳವಾರ ಮತ್ತೆ 17 ಪದಕಗಳನ್ನು ಗೆದ್ದು ವಿಜೃಂಭಿಸಿತು. ಇದರಲ್ಲಿ 3 ಚಿನ್ನ, 6 ಬೆಳ್ಳಿ ಮತ್ತು 8 ಕಂಚಿನ ಪದಕಗಳು ಸೇರಿವೆ. ಇದರೊಂದಿಗೆ ಭಾರತ ಪದಕಪಟ್ಟಿಯಲ್ಲಿ 5ನೇ ಸ್ಥಾನ ಅಲಂಕರಿಸಿದೆ.
ಮಂಗಳವಾರ ನಡೆದ ಮಹಿಳೆಯರ 400 ಮೀ. ಓಟದ ಟಿ20 ವಿಭಾಗದಲ್ಲಿ ದೀಪ್ತಿ ಜೀವಂಜಿ ಮತ್ತು ಪುರುಷರ ಡಿಸ್ಕಸ್ ಥ್ರೋ ಎಫ್54/55/56 ವಿಭಾಗದಲ್ಲಿ ನೀರಜ್ ಯಾದವ್ ಚಿನ್ನದ ಪದಕಕ್ಕೆ ಮುತ್ತಿಟ್ಟರು. ನೀರಜ್ ಏಷ್ಯನ್ ದಾಖಲೆಯನ್ನೂ ನಿರ್ಮಿಸಿದರೆ, ಯೋಗೇಶ್ ಕಥುನಿಯಾ ಬೆಳ್ಳಿ ಮತ್ತು ಮುತ್ತುರಾಜ ಕಂಚು ಗೆಲ್ಲುವುದರೊಂದಿಗೆ ಭಾರತ ಈ ಸ್ಪರ್ಧೆಯಲ್ಲಿ ಪದಕಗಳ ಕ್ಲೀನ್ಸ್ವೀಪ್ ಸಾಧಿಸಿತು.
ಪುರುಷರ ಶಾಟ್ಪುಟ್ ಎಫ್40 ವಿಭಾಗದಲ್ಲಿ ರವಿ ರೊಂಗಲಿ, 1,500 ಮೀ. ಓಟದ ಟಿ46 ವಿಭಾದಲ್ಲಿ ಪ್ರಮೋದ್, 400 ಮೀ. ಓಟದ ಟಿ64 ವಿಭಾಗದಲ್ಲಿ ಅಜಯ್ ಕುಮಾರ್, ಮಹಿಳೆಯರ 100 ಮೀ. ಓಟದ ಟಿ12 ವಿಭಾಗದಲ್ಲಿ ಸಿಮ್ರಾನ್ ಶರ್ಮ ಬೆಳ್ಳಿ ಪದಕ ಜಯಿಸಿದರು. 1,500 ಮೀ. ಓಟದ ಟಿ46 ವಿಭಾಗದಲ್ಲಿ ರಾಕೇಶ್ ಬೈರಾ ಕಂಚು ಗೆದ್ದರು.
ಪ್ಯಾರಾ ಶೂಟಿಂಗ್ನಲ್ಲಿ ರುದ್ರಾಂಕ್ಷ್ ಖಂಡೇಲ್ವಾಲ್ ಮತ್ತು ಮನೀಷ್ ನರ್ವಾಲ್ ಪಿ1 ಪುರುಷರ 10 ಮೀ. ಏರ್ ಪಿಸ್ತೂಲ್ ಎಸ್ಎಚ್1 ವಿಭಾಗದಲ್ಲಿ ಬೆಳ್ಳಿ, ಕಂಚು ಗೆದ್ದರೆ, ರುಬಿನಾ ಫ್ರಾನ್ಸಿಸ್ ಮಹಿಳೆಯರ 10 ಮೀ. ಏರ್ಪಿಸ್ತೂಲ್ನಲ್ಲಿ, ಅಶೋಕ್ ಪುರುಷರ 65 ಕೆಜಿ ಪವರ್ಲಿಫ್ಟಿಂಗ್ನಲ್ಲಿ ಏಕ್ತಾ ಭಯಾನ್ ಮಹಿಳೆಯರ ಕ್ಲಬ್ ಥ್ರೋ ಎ್32/51 ವಿಭಾಗದಲ್ಲಿ ಕಂಚು ಜಯಿಸಿದರು.
ಪ್ರಾಚಿಗೆ ಅವಳಿ ಪದಕ
ಪ್ರಾಚಿ ಯಾದವ್ ಮಹಿಳೆಯರ ಕನೋಯಿಂಗ್ ಸ್ಪರ್ಧೆಯಲ್ಲಿ ಮೊದಲ ದಿನ ವಿಎಲ್2 ವಿಭಾಗದಲ್ಲಿ ಬೆಳ್ಳಿ ಪದಕ ಗೆದ್ದುಕೊಂಡರೆ, 2ನೇ ದಿನ ಕೆಎಲ್2 ವಿಭಾಗದಲ್ಲಿ ಸ್ವರ್ಣ ಪದಕಕ್ಕೆ ಕೊರಳೊಡ್ಡಿದರು. ಈ ಮೂಲಕ ಪ್ಯಾರಾ ಏಷ್ಯನ್ ಗೇಮ್ಸ್ನಲ್ಲಿ ಅವಳಿ ಪದಕ ಗೆಲುವಿನ ಸಾಧನೆ ಮಾಡಿದರು. ಪ್ರಾಚಿ ಅವರ ಪತಿ ಮನೀಷ್ ಕೌರವ್ ಪುರುಷರ ಕನೋಯಿ ಕೆಎಲ್3 ವಿಭಾಗದಲ್ಲಿ ಕಂಚು ಜಯಿಸಿದರು.
ಶರತ್ ಕೈಜಾರಿದ ಚಿನ್ನ
ಪುರುಷರ ಟಿ13 ಓಟದ 5 ಸಾವಿರ ಮೀ. ಓಟದಲ್ಲಿ ಶರತ್ ಶಂಕರಪ್ಪ ಮಕನಹಳ್ಳಿ ಅಗ್ರಸ್ಥಾನಿಯಾಗಿ ಸ್ಪರ್ಧೆ ಮುಗಿಸಿದರೂ, ಚಿನ್ನದ ಪದಕ ನೀಡಲಿಲ್ಲ. ಸ್ಪರ್ಧೆಯಲ್ಲಿ ಕೇವಲ ಇಬ್ಬರೇ ಓಟಗಾರರು ಭಾಗವಹಿಸಿದ್ದು ಇದಕ್ಕೆ ಕಾರಣ, ಏಷ್ಯನ್ ಪ್ಯಾರಾಲಿಂಪಿಕ್ ಸಮಿತಿಯ ನಿಯಮಾವಳಿ ಪ್ರಕಾರ, 2ಕ್ಕಿಂತ ಕಡಿಮೆ ಸ್ಪರ್ಧಿಗಳಿದ್ದಾಗ ಪದಕ ನೀಡುವುದು ಅಥವಾ ನೀಡದಿರುವುದು ತಾಂತ್ರಿಕ ಸಮಿತಿಯ ನಿರ್ಧಾರಕ್ಕೆ ಸೇರಿದ್ದಾಗಿರುತ್ತದೆ.
ಮೊದಲ ದಿನವೇ 17 ಪದಕಗಳ ಸಾಧನೆ
ಭಾರತದ ಕ್ರೀಡಾಪಟುಗಳು ಪ್ಯಾರಾ ಏಷ್ಯನ್ ಗೇಮ್ಸ್ನ ಮೊದಲ ದಿನವೇ 17 ಪದಕಗಳನ್ನು ಗೆದ್ದು ಭರ್ಜರಿ ಆರಂಭ ನೀಡಿದ್ದರು. ಈ ಪೈಕಿ 6 ಚಿನ್ನ, 6 ಬೆಳ್ಳಿ, 5 ಕಂಚಿನ ಪದಕಗಳು ಸೇರಿದ್ದವು. ಈ ಪೈಕಿ 11 ಪದಕಗಳು (5 ಚಿನ್ನ) ಅಥ್ಲೆಟಿಕ್ಸ್ನಲ್ಲೇ ಒಲಿದವು. ಶೂಟಿಂಗ್ನಲ್ಲಿ ಅವನಿ ಲೇಖರ ಮಹಿಳೆಯರ 10 ಮೀ. ಏರ್ ಸ್ಟ್ಯಾಂಡ್ ಎಸ್ಎಚ್1 ವಿಭಾಗದಲ್ಲಿ ಕೂಟದಾಖಲೆಯೊಂದಿಗೆ ಚಿನ್ನ ಗೆದ್ದುಕೊಂಡರೆ ಅಥ್ಲೆಟಿಕ್ಸ್ನಲ್ಲಿ ಪ್ರಣವ್ ಸೂರ್ಮ ಕ್ಲಬ್ ಥ್ರೋ (ಎಫ್51), ಅಂಕುರ್ ಧಾಮಾ 5 ಸಾವಿರ ಮೀ. (ಟಿ11) ಓಟದಲ್ಲಿ ಚಿನ್ನದ ಪದಕ ಗೆದ್ದರು. ಪುರುಷರ ಹೈಜಂಪ್ನಲ್ಲಿ ಶೈಲೇಶ್ ಕುಮಾರ್ (ಟಿ63), ನಿಶಾದ್ ಕುಮಾರ್ (ಟಿ47), ಪ್ರವಿಣ್ ಕುಮಾರ್ (ಟಿ64) ಪ್ರತ್ಯೇಕ ವಿಭಾಗಗಳಲ್ಲಿ ಚಿನ್ನ ಜಯಿಸಿದರು. ಕ್ಲಬ್ ಥ್ರೋನಲ್ಲಿ ಧರಂವೀರ್ ಬೆಳ್ಳಿ ಮತ್ತು ಅಮಿತ್ ಕುಮಾರ್ ಕಂಚು ಗೆಲ್ಲುವುದರೊಂದಿಗೆ ಭಾರತ ಪದಕಗಳ ಕ್ಲೀನ್ಸ್ವೀಪ್ ಸಾಧಿಸಿತು. ಪುರುಷರ ಪಿ4 ಮಿಶ್ರ 50 ಮೀ. ಪಿಸ್ತೂಲ್ ಎಸ್ಎಚ್1 ವಿಭಾಗದಲ್ಲಿ ರುದ್ರಾಂಕ್ಷ್ ಖಂಡೇಲ್ವಲ್ ಬೆಳ್ಳಿಗೆ ಕೊರಳೊಡ್ಡಿದರು. ಹೈಜಂಪ್ ಟಿ63 ವಿಭಾಗದಲ್ಲಿ ಮರಿಯಪ್ಪನ್ ತಂಗವೇಲು ಮತ್ತು ಟಿ47 ವಿಭಾಗದಲ್ಲಿ ರಾಮ್ಪಾಲ್ ಬೆಳ್ಳಿ ಒಲಿಸಿಕೊಂಡರು. ಜುಡೋದಲ್ಲಿ ಪುರುಷರ 60 ಕೆಜಿ ವಿಭಾಗದಲ್ಲಿ ಕಪಿಲ್ ಪಾರ್ಮರ್ ಬೆಳ್ಳಿ ಜಯಿಸಿದರು. ಹೈಜಂಪ್ ಟಿ64 ವಿಭಾಗದಲ್ಲಿ ಉನ್ನಿ ರೇಣು ಕಂಚಿನ ಪದಕ ಗೆದ್ದರು. ಶಾಟ್ಪುಟ್ ಎಫ್11 ವಿಭಾಗದಲ್ಲಿ ಮೋನು ಂಘಾಸ್, ಜುಡೋ ಮಹಿಳೆಯರ 48 ಕೆಜಿ ವಿಭಾಗದಲ್ಲಿ ಕೋಕಿಲಾ, ಟೇಕ್ವಾಂಡೊದಲ್ಲಿ ಮಹಿಳೆಯರ 47 ಕೆಜಿ ವಿಭಾಗದಲ್ಲಿ ಅರುಣಾ ಕಂಚಿನ ಪದಕ ಜಯಿಸಿದರು.
ಪ್ರಧಾನಿ ಮೋದಿ ಅಭಿನಂದನೆ
ಏಷ್ಯನ್ ಪ್ಯಾರಾ ಗೇಮ್ಸ್ನಲ್ಲಿ ಭರ್ಜರಿ ಪದಕ ಬೇಟೆಯಾಡುತ್ತಿರುವ ಭಾರತದ ಕ್ರೀಡಾಪಟುಗಳನ್ನು ಪ್ರಧಾನಿ ನರೇಂದ್ರ ಮೋದಿ ಸಾಮಾಜಿಕ ಜಾಲತಾಣದಲ್ಲಿ ಅಭಿನಂದಿಸಿದ್ದಾರೆ. 2 ದಿನಗಳಿಂದ ಸರಣಿ ಪೋಸ್ಟ್ಗಳ ಮೂಲಕ ಭಾರತದ ಪ್ರತಿ ಸ್ಪರ್ಧಿಗೂ ಅವರು ಅಭಿನಂದನೆ ಸಲ್ಲಿಸುತ್ತಿದ್ದಾರೆ.
ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಸೆಮೀಸ್ ಹಾದಿ ದುರ್ಗಮ; ಇನ್ನು ಪ್ರತಿ ಪಂದ್ಯವೂ ಕ್ವಾರ್ಟರ್ಫೈನಲ್!