ಮುಂಬೈ: ನ. 07ರಂದು ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ವಿಶ್ವಕಪ್ ಟೂರ್ನಿಯ 39ನೇ ಪಂದ್ಯದಲ್ಲಿ ಅಫ್ಘಾನಿಸ್ತಾನ ವಿರುದ್ಧ ಆಸ್ಟ್ರೇಲಿಯಾದ ಆಲ್ರೌಂಡರ್ ಗ್ಲೇನ್ ಮ್ಯಾಕ್ಸ್ವೆಲ್ ದ್ವಿಶತಕ (ಅಜೇಯ 201 ರನ್ 128 ಎಸೆತ 21 ಬೌಂಡರಿ 10 ಸಿಕ್ಸರ್) ಸಿಡಿಸಿದರು. 91 ರನ್ಗಳಿಗೆ 7 ಪ್ರಮುಖ ವಿಕೆಟ್ಗಳನ್ನು ಕಳೆದುಕೊಂಡು ಆಸಿಸ್ ಸೋಲಿನ ದವಡೆಯಲ್ಲಿ ಸಿಲುಕ್ಕಿತ್ತು. ಇಂತಹ ನಿರ್ಣಾಯಕ ಪಂದ್ಯದಲ್ಲಿ, ಗಾಯದ ಸಮಸ್ಯೆಯನ್ನೂ ಲೆಕ್ಕಿಸದೇ ಏಕಾಂಗಿಯಾಗಿ ನಿಂತು ಆಫ್ಘಾನ್ ಬೌಲರ್ಗಳ ವಿರುದ್ಧ ಅಬ್ಬರಿಸಿ ಬೊಬ್ಬಿರಿದ ಮ್ಯಾಕ್ಸಿ, ದ್ವಿಶತಕ ಸಾಧನೆಯ ಜತೆಗೆ ಗೆಲುವು ತಂದುಕೊಟ್ಟಿದ್ದಲ್ಲದೆ, ತಮ್ಮ ತಂಡವನ್ನು ಸೆಮೀಸ್ ಹಂತಕ್ಕೆ ತೆಗೆದುಕೊಂಡು ಹೋದರು.
ಮ್ಯಾಕ್ಸಿ ಆಡಿದ ಈ ಅದ್ಭುತ ಇನ್ನಿಂಗ್ಸ್ ಗುಂಗಿನಿಂದ ಕ್ರೀಡಾಭಿಮಾನಿಗಳು ಇನ್ನೂ ಹೊರಬಂದಿಲ್ಲ. ಕ್ರಿಕೆಟ್ ದಿಗ್ಗಜರೇ ಮ್ಯಾಕ್ಸಿ ರನ್ ಮಾರುತ್ತಕ್ಕೆ ಮನಸೋತಿದ್ದಾರೆ. ಒಂದೆಡೆ ಗಾಯದ ಸಮಸ್ಯೆಯಿಂದ ಬಳಲುತ್ತಿದ್ದರೂ ತಮ್ಮ ದೇಶಕ್ಕಾಗಿ ಬ್ಯಾಟ್ ಬೀಸಿದ ಮ್ಯಾಕ್ಸಿಗೆ ಇಡೀ ಕ್ರೀಡಾ ಬಳಗವೇ ತಲೆಬಾಗಿದ್ದು, ವಿಶ್ವಕಪ್ ಇತಿಹಾಸದಲ್ಲೇ ಇದೊಂದು ಅತ್ಯುತ್ತಮ ಇನ್ನಿಂಗ್ಸ್ ಆಗಿ ಉಳಿಯಲಿದೆ. ಇದರ ನಡುವೆ ಮ್ಯಾಕ್ಸಿ ಆಫ್ಘಾನ್ ವಿರುದ್ಧ ದ್ವಿಶತಕ ಬಾರಿಸಿದ್ದಕ್ಕೆ ಬೇಸರ ಹೊರಹಾಕಿದ್ದಾರೆ.
ಮ್ಯಾಕ್ಸಿ ಅಚ್ಚರಿ ಹೇಳಿಕೆ
ಅಫ್ಘಾನಿಸ್ತಾನ ವಿರುದ್ಧ ದ್ವಿಶತಕ ಬಾರಿಸಿದ ಇನ್ನಿಂಗ್ಸ್ ಬಗ್ಗೆ ನನಗೆ ತುಂಬಾ ಬೇಸರವಿದೆ. ಏಕೆಂದರೆ, ಈ ಇನ್ನಿಂಗ್ಸ್ನಿಂದ ವಿಶ್ವಕಪ್ನಲ್ಲಿ ನನ್ನ ಸ್ಟ್ರೈಕ್ರೇಟ್ಗೆ ತುಂಬಾ ಹೊಡೆತಬಿದ್ದಿದೆ. ಹೀಗಾಗಿ ನನ್ನ ಸ್ಟ್ರೈಕ್ರೇಟ್ ಅನ್ನು ಉನ್ನತ ಮಟ್ಟಕ್ಕೆ ಹೆಚ್ಚಿಸಿಕೊಳ್ಳಲು ನಾನೀಗ ತುಂಬಾನೇ ಕಷ್ಟಪಡಬೇಕಾಗಿದೆ ಎಂದು ಕ್ಲಬ್ ಪ್ರೈರೀ ಫೈರ್ ಸಂದರ್ಶನದಲ್ಲಿ ಮ್ಯಾಕ್ಸಿ ಹೇಳಿಕೊಂಡಿದ್ದಾರೆ.
ಮ್ಯಾಕ್ಸಿಯ ಈ ಹೇಳಿಕೆಯನ್ನು ಕೇಳಿ, ಮಾಜಿ ಆಟಗಾರರಾದ ಆ್ಯಡಂ ಗಿಲ್ಕ್ರಿಸ್ಟ್ (ಆಸ್ಟ್ರೇಲಿಯಾ), ಮೈಕೆಲ್ ವಾನ್ (ಇಂಗ್ಲೆಂಡ್) ಸೇರಿದಂತೆ ಅನೇಕ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಪಂದ್ಯದ ವಿಚಾರಕ್ಕೆ ಬರುವುದಾದರೆ, ನ.7ರಂದು ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಆಫ್ಘಾನ್ ಪಡೆ ನಿಗದಿತ 50 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 291 ರನ್ಗಳನ್ನು ಕಲೆಹಾಕಿತು. ಗುರಿ ಬೆನ್ನತ್ತಿದ ಆಸಿಸ್ ಪಡೆ ಟ್ರೆವಿಸ್ ಹೆಡ್ (0), ಮಿಚೆಲ್ ಮಾರ್ಷ್ (24) ಡೇವಿಡ್ ವಾರ್ನರ್ (18), ಜೋಶ್ ಇಂಗ್ಲಿಸ್ (0), ಮಾರ್ನಸ್ ಲಬುಶೇನ್ (14), ಮಾರ್ಕ್ ಸ್ಟೋನಿಸ್ (6) ಮತ್ತು ಮಿಚೆಲ್ ಸ್ಟಾರ್ಕ್ (3) ಕೇವಲ 91 ರನ್ಗೆ ಪ್ರಮುಖ 7 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಅಕ್ಷರಶಃ ಸೋಲಿನ ದವಡೆಯಲ್ಲಿ ಸಿಲುಕಿಕೊಂಡಿತ್ತು. ಈ ವೇಳೆ ತಂಡಕ್ಕೆ ಆಸರೆಯಾದ ಗ್ಲೇನ್ ಮ್ಯಾಕ್ಸ್ವೆಲ್ ಅಬ್ಬರಿಸಿ ಬೊಬ್ಬಿರಿದರು. ಮ್ಯಾಕ್ಸಿ ಮಾರುತಕ್ಕೆ ಆಫ್ಘಾನ್ ಬೌಲರ್ಗಳು ತತ್ತರಿಸಿದರು. ಮ್ಯಾಕ್ಸಿ ತಾನು ಎದುರಿಸಿದ 128 ಎಸೆತಗಳಲ್ಲಿ 21 ಬೌಂಡರಿ ಮತ್ತು 10 ಸಿಕ್ಸರ್ ನೆರವಿನೊಂದಿಗೆ 201 ರನ್ ಗಳಿಸಿ ಅಜೇಯರಾಗಿ ಉಳಿದರು. ಗಮನಾರ್ಹ ಸಂಗತಿ ಏನೆಂದರೆ, ಮ್ಯಾಕ್ಸಿ ಆಸಿಸ್ ಪಡೆಯ ಸಮೀಸ್ ಪ್ರವೇಶವನ್ನು ಖಚಿತಪಡಿಸಿದರು. ಮ್ಯಾಕ್ಸಿ ಆಟಕ್ಕೆ ಸಾಥ್ ನೀಡಿದ ನಾಯಕ ಪ್ಯಾಟ್ ಕ್ಯುಮಿನ್ಸ್ 68 ಎಸೆತಗಳಲ್ಲಿ ಕೇವಲ 12 ರನ್ ಗಳಿಸುವ ಮೂಲಕ ತಾಳ್ಮೆಯ ಆಟದೊಂದಿಗೆ ವಿಕೆಟ್ ಕಾಪಾಡಿಕೊಂಡರು. ಅವರು ಕೂಡ ಅಜೇಯರಾಗಿ ಉಳಿದರು. ಅಂತಿಮವಾಗಿ 46.5 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 293 ರನ್ ಗಳಿಸುವ ಮೂಲಕ 3 ವಿಕೆಟ್ಗಳ ಅಂತರದಿಂದ ವಿರೋಚಿತ ಗೆಲುವು ದಾಖಲಿಸಿತು. (ಏಜೆನ್ಸೀಸ್)
ಮ್ಯಾಕ್ಸಿ ದ್ವಿಶತಕ ಸಿಡಿಸಿಲು ಕಾಲಿನ ಗಾಯವೇ ಕಾರಣ! ಸಚಿನ್ ಕೊಟ್ಟ ಅಚ್ಚರಿಯ ವಿವರಣೆ ಹೀಗಿದೆ…