ಹೊಸಪೇಟೆ: ಬಳ್ಳಾರಿ ಜಿಲ್ಲಾ ಸಹಕಾರಿ ಕೇಂದ್ರ ಬ್ಯಾಂಕ್ 2022-23ನೇ ಸಾಲಿಗೆ 12.31 ಕೋಟಿ ರೂ. ಲಾಭ ಗಳಿಸಿದೆ ಎಂದು ಬ್ಯಾಂಕ್‌ನ ಪ್ರಭಾರ ಅಧ್ಯಕ್ಷ ಕೆ.ತಿಪ್ಪೇಸ್ವಾಮಿ ಹೇಳಿದರು.
ನಗರದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು. ಕಳೆದ ವರ್ಷ 9.56 ಕೋಟಿ ರೂ. ಇದ್ದ ಲಾಭವಾಗಿತ್ತು. ಈ ವರ್ಷ 3 ಕೋಟಿ ರೂ. ಲಾಭ ಹೆಚ್ಚಾಗಿದೆ ಎಂದರು. 2022-23ನೇ ಸಾಲಿಗೆ ಬ್ಯಾಂಕಿನ ಒಟ್ಟು ದುಡಿಮೆಯ ಬಂಡವಾಳ 2362.87 ಕೋಟಿ ರೂ. ಹೊಂದಿತ್ತು. 125.53 ಕೋಟಿ ರೂ. ಷೇರು ಬಂಡವಾಳ, 209.04 ಕೋಟಿ ರೂ. ಸ್ವಂತ ಬಂಡವಾಳ, 1437.11 ಕೋಟಿ ರೂ. ಠೇವಣಿ ಬಂದಿದ್ದು, 1440.54 ಕೋಟಿ ರೂ. ಸಾಲ ವಿತರಿಸಲಾಗಿದೆ. ಆ ಪೈಕಿ ಕೃಷಿ, ಕೃಷಿಯೇತರರು ಸೇರಿದಂತೆ ಒಟ್ಟಾರೆ ಸಾಲ ವಸೂಲಾತಿಯಲ್ಲಿ ಶೇ.94.12 ಪ್ರಗತಿ ಸಾಧಿಸಿದೆ. ಎನ್‌ಪಿಎ 4.15 ರಷ್ಟಿದ್ದು, ಇನ್ನುಳಿದಂತೆ ಬ್ಯಾಂಕ್ ವ್ಯವಹಾರದಲ್ಲಿ 12.31 ಕೋಟಿ ರೂ. ಲಾಭ ಗಳಿಸಿದೆ ಎಂದು ವಿವರಿಸಿದರು.
ಬಳ್ಳಾರಿ 5, ವಿಜಯನಗರ ಜಿಲ್ಲೆಯ 6 ಸೇರಿದಂತೆ ಒಟ್ಟು 11 ತಾಲೂಕು ವ್ಯಾಪ್ತಿಯ 33 ಶಾಖೆಗಳಲ್ಲಿ 294 ನೌಕರರಿದ್ದು, ಸಿಬಿಎಸ್ ಪದ್ಧತಿಯಲ್ಲಿ ಕಾರ್ಯನಿರ್ವಹಿಸುತ್ತಿದೆ. ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿ ದೊರೆಯುವ ಬಹುತೇಕ ಸೇವೆಗಳನ್ನು ಬಿಡಿಸಿಸಿ ಒದಗಿಸುತ್ತಿದೆ. ಈ ಮೂಲಕ ಅವಳಿ ಜಿಲ್ಲೆಯ ಗ್ರಾಹಕರ ವಿಶ್ವಾಸ ಉಳಿಸಿಕೊಂಡಿದ್ದು, ಯಶಸ್ಸಿನ ಹಾದಿಯಲ್ಲಿ ಸಾಗಿದೆ ಎಂದರು.
ಬ್ಯಾಂಕ್ ಸಿಇಒ ಬಿ.ಎಸ್.ಹರಿಶ್, ನಿರ್ದೇಶಕರಾದ ಜೆ.ಎಂ.ವೃಷಭೇಂದ್ರಯ್ಯ, ಟಿ.ಎಂ.ಚಂದ್ರಶೇಖರಯ್ಯ, ಡಿ.ಭೋಗಾರೆಡ್ಡಿ, ಎಂ.ಗುರುಸಿದ್ದನಗೌಡ, ಕೋಳೂರು ಮಲ್ಲಿಕಾರ್ಜುನ ಗೌಡ, ಎಲ್.ಎಸ್.ಆನಂದ, ಕೆ.ರವೀಂದ್ರನಾಥ, ಚಿದಾನಂದ ಐಗೋಳ, ಬಿ.ಕೆ.ಪ್ರಕಾಶ ಇದ್ದರು.