ಹುಬ್ಬಳ್ಳಿ: ಸದ್ಯದಲ್ಲೇ ಈ ಹುಬ್ಬಳ್ಳಿ ಹುಡುಗಿಯ ಹೆಸರನ್ನು ಹಲವರು ‘ಸ್ತುತಿ’ಸಿದರೂ ಅಚ್ಚರಿಯೇನಿಲ್ಲ. ಏಕೆಂದರೆ ಈ ಬಾಲಕಿ ಗಿನ್ನೆಸ್ ದಾಖಲೆಯ ಪ್ರಯತ್ನವೊಂದನ್ನು ಮಾಡಿದ್ದು, ಸದ್ಯದಲ್ಲೇ ಈಕೆಯ ಹೆಸರು ಗಿನ್ನೆಸ್ ಬುಕ್ ಆಫ್ ರೆಕಾರ್ಡ್ಸ್ನಲ್ಲಿ ದಾಖಲಾಗುವ ಸಾಧ್ಯತೆಗಳು ಗೋಚರಿಸಿವೆ.
ಹೀಗೆ ದಾಖಲೆ ಪ್ರಯತ್ನವನ್ನು ಮಾಡಿರುವ ಬಾಲಕಿಯ ಹೆಸರು ಸ್ತುತಿ ಕುಲಕರ್ಣಿ. ಈಗೆ ಮೂರು ಹ್ಯೂಲಾ ಹೂಪ್ ರಿಂಗ್ಗಳನ್ನು ಹಾಕಿಕೊಂಡು ಸ್ಕೇಟಿಂಗ್ ಮಾಡುವ ಮೂಲಕ ನೂರು ಮೀಟರ್ ದೂರವನ್ನು 23.35 ಸೆಕೆಂಡ್ನಲ್ಲಿ ಕ್ರಮಿಸಿ ಸೈ ಎನಿಸಿಕೊಂಡಿದ್ದಾಳೆ. ಈ ಮೂಲಕ ಈಕೆ ಗಿನ್ನೆಸ್ ದಾಖಲೆ ಮಾಡುವ ಸಾಧ್ಯತೆ ನಿಚ್ಚಳವಾಗಿದೆ. ಏಕೆಂದರೆ ಇಂಥದ್ದೊಂದು ಪ್ರಯತ್ನದಲ್ಲಿ ಆಸ್ಟ್ರೇಲಿಯದ ಮಾರ್ವಾ ಎಂಬಾಕೆ 27 ಸೆಕೆಂಡ್ನಲ್ಲಿ ಗುರಿ ತಲುಪಿದ್ದು, ಅದನ್ನು ಅದಕ್ಕೂ ಕಡಿಮೆ ಅವಧಿಯಲ್ಲಿ ಸ್ತುತಿ ಮಾಡಿ ಮುಗಿಸಿದ್ದಾಳೆ. ಹೀಗಾಗಿ ಇದು ಗಿನ್ನೆಸ್ ಬುಕ್ ಆಫ್ ರೆಕಾರ್ಡ್ಸ್ನಲ್ಲಿ ದಾಖಲಾಗುತ್ತದೆ ಎಂಬ ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಈಕೆಯ ಕೋಚ್ ಅಕ್ಷಯ ಸೂರ್ಯವಂಶಿ.
ಇದನ್ನೂ ಓದಿ: ಬ್ಯಾಚಲರ್ ಹುಡುಗರಿದ್ದ ಮನೆಯಲ್ಲಿ ವಿವಾಹಿತೆಯ ಶವ!; ಕೆಲಸಕ್ಕೆಂದು ಹೋಗಿದ್ದವಳು ಅಲ್ಲೇಕೆ ಹೋದಳು?
ಶುಕ್ರವಾರ ಬೆಳಗ್ಗೆ ಹುಬ್ಬಳ್ಳಿಯ ಶಿರೂರ ಪಾರ್ಕ್ ಟೆಂಡರ್ ಶ್ಯೂರ್ ರಸ್ತೆಯಲ್ಲಿ ಸ್ತುತಿ ಈ ಸಾಧನೆ ಮಾಡಿದ್ದಾಳೆ. ಈ ದಾಖಲೆಯ ವಿವರವನ್ನು ಗಿನ್ನೆಸ್ ರೆಕಾರ್ಡ್ಗೆ ಕಳುಹಿಸಲಾಗುವುದು ಎಂದು ಸ್ತುತಿ ಪಾಲಕರಾದ ಕಿಶೋರ ಹಾಗೂ ರಶ್ಮಿ ತಿಳಿಸಿದ್ದಾರೆ.