ವಿಜಯಪುರ: ಗ್ರಾಪಂ ಚುನಾವಣೆಯ ಮೊದಲ ಹಂತದ ಮತದಾನದ ಕಾವು ಬಿಸಿಲೂರಿನ ಚಳಿ ಬಿಡಿಸಿದೆ ! ಬೆಳಗ್ಗೆ 7 ಗಂಟೆಯಿಂದಲೇ ಜನ ಚಳಿ ಲೆಕ್ಕಿಸದೇ ಮತದಾನ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ್ದರು. ಕೇವಲ ಎರಡು ಗಂಟೆಯಲ್ಲಿ ಅಂದರೆ 7 ರಿಂದ 9 ರವರೆಗೆ ಶೇ. 10.84 ರಷ್ಟು ಮತದಾನವಾಗಿದೆ.
ಪ್ರತೀ ಚುನಾವಣೆಯಂತೆ ಈ ಬಾರಿಯೂ ವಿವಿಧ ಮತಗಟ್ಟೆಗಳಲ್ಲಿ ವಿಶೇಷ ಪೂಜೆ, ಆರತಿಯೊಂದಿಗೆ ಮುತ್ತೈದೆಯರಿಂದ ಮತದಾನ ಪ್ರಕ್ರಿಯೆ ನಡೆಯಿತು. ಕರೊನಾ ಲೆಕ್ಕಿಸದೇ ನಿಯಮ ಉಲ್ಲಂಘಿಸಿ ಜನ ಮತದಾನ ಪ್ರಕ್ರಿಯೆಯಲ್ಲಿ ತೊಡಗಿದ್ದು ಕಂಡು ಬಂತು. ಮತಗಟ್ಟೆ ಎದುರು, ಹೋಟೆಲ್ ಗಳಲ್ಲಿ ಜನಜಂಗುಳಿ ಹೆಚ್ಚಿತ್ತು.
ಒಟ್ಟು ಎಂಟು ತಾಲೂಕಿನ 111 ಮತಗಟ್ಟೆಗಳಲ್ಲಿ ಶಾಂತಿಯುತ ಮತದಾನ ಪ್ರಕ್ರಿಯೆ ನಡೆಯಿತು. ಸೂಕ್ಷ್ಮ ಹಾಗೂ ಅತೀ ಸೂಕ್ಷ್ಮ ಮತಗಟ್ಟೆಗಳಲ್ಲಿ ತೀವ್ರ ಕಟ್ಟೆಚ್ಚರ ವಹಿಸಲಾಗಿತ್ತು. ಟಂಟಂ, ಕ್ರೂಸರ್, ಬೈಕ್ ಗಳ ಮೂಲಕ ಮತದಾರರನ್ನು ಕರೆತರುವ ಪ್ರಕ್ರಿಯೆ ಜೋರಾಗಿತ್ತು. ಅಲ್ಲಲ್ಲಿ ಮಾಸ್ಕ್ ವಿತರಿಸಿ ಮತದಾನ ಮಾಡಿದ್ದು ಕಂಡು ಬಂತು. ಗುಳೆ ಹೋದವರನ್ನು ವಿಶೇಷ ವಾಹನದ ಮೂಲಕ ಕರೆತಂದಿದ್ದು ವಿಶೇಷವಾಗಿತ್ತು.