ನವದೆಹಲಿ: ನಾವು ಹೇಳುವುದು ನಿಮಗೆ ವಿಚಿತ್ರ ಎನಿಸಬಹುದು ಆದರೆ, ವಾಸ್ತವವಾಗಿ ನಿಜವೇ ಆಗಿದೆ. ನೀವು ಗೂಗಲ್ನಲ್ಲಿ ಅಫ್ಘಾನಿಸ್ತಾನದ ಕ್ರಿಕೆಟಿಗ ರಶೀದ್ ಖಾನ್ ಪತ್ನಿ ಯಾರೆಂದು ಸರ್ಚ್ ಮಾಡಿದರೆ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ ಹೆಸರು ನಿಮ್ಮ ಎದುರಿನ ಪರದೆಯಲ್ಲಿ ಕಾಣಿಸಿಕೊಳ್ಳುತ್ತದೆ. ನಾವು ಹೇಳುತ್ತಿರುವುದು ನಿಮಗೆ ಸುಳ್ಳು ಎನಿಸಬಹುದು, ಅದಕ್ಕಾಗಿಯೇ ಸ್ಕ್ರೀನ್ಶಾಟ್ ಸಾಕ್ಷಿಯನ್ನೂ ಸಹ ಸ್ಟೋರಿಯ ಕೆಳಗೆ ಪ್ರಸ್ತುತ ಪಡಿಸಿದ್ದೇವೆ.
ಅನುಷ್ಕಾ ಶರ್ಮಾ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಪತ್ನಿ ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ಗೂಗಲ್ನಲ್ಲಿ ಸರ್ಚ್ ಮಾಡಿದಾಗ ಅದ್ಹೇಗೆ ರಶೀದ್ ಖಾನ್ ಪತ್ನಿಯ ಹೆಸರಾಗಿ ಅನುಷ್ಕಾ ಶರ್ಮಾ ಹೆಸರು ಕಾಣಿಸಿಕೊಳ್ಳುತ್ತದೆ? ಎಂಬ ನಿಮ್ಮ ಪ್ರಶ್ನೆಗೆ ಉತ್ತರ ಮುಂದಿದೆ.
ಇದನ್ನೂ ಓದಿ: ಭಾರತದಲ್ಲಿ ಐದೇ ವರ್ಷದಲ್ಲಿ ಡಿಜಿಟಲ್ ಪಾವತಿ ಆರು ಪಟ್ಟು ಹೆಚ್ಚಳ: ಲಾಕ್ಡೌನ್ನಲ್ಲೂ ಭಾರಿ ಏರಿಕೆ!
1998ರಲ್ಲಿ ಜನಿಸಿದ ರಶೀದ್ ಖಾನ್ ಆಫ್ಘಾನ್ನ ಪ್ರಖ್ಯಾತ ಕ್ರಿಕೆಟಿಗ. ಅಲ್ಲದೆ, ಪ್ರಸ್ತುತ ತಂಡದ ಉಪನಾಯಕನು ಹೌದು. 2018ರಲ್ಲಿ ಭಾರತದ ವಿರುದ್ಧ ಆಫ್ಘಾನ್ ಆಡಿದ ಮೊದಲ ಟೆಸ್ಟ್ ಪಂದ್ಯದ ಹನ್ನೊಂದು ಆಟಗಾರರಲ್ಲಿ ರಶೀದ್ ಸಹ ಒಬ್ಬರಾಗಿದ್ದರು. ಕೇವಲ 20ನೇ ವಯಸ್ಸಿನಲ್ಲೇ ಟೆಸ್ಟ್ ಕ್ರಿಕೆಟ್ನ ನಾಯಕರಾಗುವ ಮೂಲಕ ಅತಿ ಕಿರಿಯ ನಾಯಕನೆಂಬ ಖ್ಯಾತಿಯನ್ನು ರಶೀದ್ ಗಳಿಸಿದ್ದಾರೆ. ಅಲ್ಲದೆ. ಪ್ರಸ್ತುತ ದುಬೈನಲ್ಲಿ ನಡೆಯುತ್ತಿರುವ ಐಪಿಎಲ್ ಟೂರ್ನಿಯ ಹೈದರಾಬಾದ್ ತಂಡ ಸ್ಟಾರ್ ಬೌಲರ್ ಆಗಿದ್ದಾರೆ.
ಇನ್ನು ಅನುಷ್ಕಾ ಶರ್ಮಾ ಬಾಲಿವುಡ್ ಪ್ರಸಿದ್ಧ ನಟಿ. ಯಶಸ್ಸಿನ ಪಥದಲ್ಲಿರುವಾಗಲೇ ಮೂರು ವರ್ಷಗಳ ಹಿಂದೆ ಇಟಲಿಯಲ್ಲಿ ಖಾಸಗಿ ಸಮಾರಂಭದಲ್ಲಿ ವಿರಾಟ್ ಕೊಹ್ಲಿಯನ್ನು ವರಿಸಿದರು. ಅನೇಕ ವರ್ಷಗಳವರೆಗೆ ಪ್ರೀತಿಯಲ್ಲಿ ಮುಳುಗಿದ್ದ ಜೋಡಿ ಮದುವೆ ಸಂಕೋಲೆಯಲ್ಲಿ ಬಂಧಿಯಾಗಿದ್ದಾರೆ. ಕಳೆದ ಆಗಸ್ಟ್ನಲ್ಲಿ ಸ್ಟಾರ್ ದಂಪತಿ ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವುದಾಗಿಯೂ ಘೋಷಿಸಿದೆ.
ಹೀಗಿರುವಾಗ ಗೂಗಲ್ನಲ್ಲಿ ರಶೀದ್ ಖಾನ್ ಪತ್ನಿ ಯಾರೆಂದು ಸರ್ಚ್ ಮಾಡಿದರೆ ಅನುಷ್ಕಾ ಶರ್ಮಾ ಹೆಸರು ಬರುತ್ತದೆ. ಅಲ್ಲದೆ, ಹೆಸರಿನ ಬಳಿಕ ರಶೀದ್ ಅವರ ಒಂದು ಸಣ್ಣ ಬಯೋಡೇಟಾವೂ ಕಾಣಿಸಿಕೊಳ್ಳುತ್ತದೆ. ಅದರಲ್ಲಿ ವೈವಾಹಿಕ ಸ್ಥಾನಮಾನದಲ್ಲಿ ವಿವಾಹಿತ ಎಂದು ಉಲ್ಲೇಖವಾಗಿದೆ. ಪತ್ನಿಯ ಹೆಸರು ಅನುಷ್ಕಾ ಶರ್ಮಾ ಎಂದು ಬರೆಯಲಾಗಿದೆ. ಮದುವೆ ದಿನಾಂಕದ ಕಾಲಂನಲ್ಲಿ ಡಿಸೆಂಬರ್ 11, 2017 ಎಂದು ಬರೆಯಲಾಗಿದೆ. ಆದರೆ, ಈ ದಿನಾಂಕ ಬಂದು ಅನುಷ್ಕಾ, ವಿರಾಟ್ ಕೊಹ್ಲಿ ವಿವಾಹವಾದ ದಿನವಾಗಿದೆ.
ಇದನ್ನೂ ಓದಿ: ಮೈಸೂರಿನಲ್ಲಿ ನಾಪತ್ತೆಯಾಗಿದ್ದ ಯುವ ವಿಜ್ಞಾನಿ ಆಂಧ್ರದ ವಿಜಯವಾಡದಲ್ಲಿ ಪತ್ತೆ..!
ಅನುಷ್ಕಾ ಶರ್ಮಾ ಹೆಸರೇಕೆ ಬರುತ್ತಿದೆ?
ಗೂಗಲ್ನ ಈ ಎಡವಟ್ಟಿಗೆ ಒಂದು ಕಾರಣವಿದೆ. 2018ರಲ್ಲಿ ರಶೀದ್ ಅವರು ಇನ್ಸ್ಟಾಗ್ರಾಂನಲ್ಲಿ ಅಭಿಮಾನಿಗಳೊಂದಿಗೆ ಚಾಟ್ ಸೆಸ್ಸನ್ ಮಾಡುವಾಗ ಬಾಲಿವುಡ್ ನೆಚ್ಚಿನ ನಟಿಯರ ಬಗ್ಗೆ ಮಾತನಾಡಿದ್ದರು. ಪ್ರಶ್ನೆಯೊಂದಕ್ಕೆ ನೆಚ್ಚಿನ ನಟಿಯರಾಗಿ ಅನುಷ್ಕಾ ಶರ್ಮಾ ಮತ್ತು ಪ್ರೀತಿ ಜಿಂಟಾ ಹೆಸರನ್ನು ಹೇಳಿದ್ದರು. ಹೀಗಾಗಿ ಅನುಷ್ಕಾ ಮತ್ತು ರಶೀದ್ ನಡುವೆ ಇರುವುದು ಇದೊಂದೆ ಕನೆಕ್ಸನ್. ರಶೀದ್ ಅವರ ನೆಚ್ಚಿನ ನಟಿ ಅನುಷ್ಕಾ ಎಂಬುದು ಸುದ್ದಿಯಾದಾಗಿನಿಂದ ಗೂಗಲ್ ರಶೀದ್ ಅವರ ಪತ್ನಿಯಾಗಿ ಅನುಷ್ಕಾ ಹೆಸರನ್ನು ತೋರಿಸುತ್ತಿದೆ.
ರಶೀದ್ ವಿವಾಹಿತರೇ?
ಅಂದಹಾಗೆ ಅನುಷ್ಕಾ ರಶೀದ್ ಅವರ ಪತ್ನಿಯಲ್ಲ. ನಿಜ ಹೇಳಬೇಕೆಂದರೆ ರಶೀದ್ಗೆ ಮದುವೆಯೇ ಆಗಿಲ್ಲ. ಕಳೆದ ಜುಲೈನಲ್ಲಿ ನಡೆದ ಸಂದರ್ಶನವೊಂದರಲ್ಲಿ ಮದುವೆ ವಿಚಾರ ಪ್ರಸ್ತಾಪಿಸಿದ್ದ ರಶೀದ್, ಆಫ್ಘಾನಿಸ್ತಾನ ತಂಡ ವಿಶ್ವಕಪ್ ಗೆಲ್ಲುವವರೆಗೂ ಮದುವೆ ಅಥವಾ ಎಂಗೇಜ್ ಆಗುವುದಿಲ್ಲ ಎಂದು ಹೇಳಿದ್ದರು. (ಏಜೆನ್ಸೀಸ್)
ಕೋವಿಡ್ನಿಂದ ಟ್ರಂಪ್ ಗುಣವಾಗಲೆಂದು ಉಪವಾಸ ವ್ರತ ಮಾಡ್ತಿದ್ದ ಅಭಿಮಾನಿ ಸಾವು..!