ನವದೆಹಲಿ: ಜಾಗತಿಕ ತಾಪಮಾನ ಹೆಚ್ಚಳದಿಂದ ಹಿಮಪರ್ವತಗಳು ತುಂಬಾ ತ್ವರಿತವಾಗಿ ಕರಗುತ್ತಿವೆ. ಇದನ್ನು ತಡೆಗಟ್ಟಲು ಜಾಗತಿಕ ತಾಪಮಾನ ಹೆಚ್ಚಳ ತಡೆಯಲು ಕ್ರಮ ಕೈಗೊಳ್ಳಲಾಗುತ್ತಿದೆ. ಆದರೂ ಕರಗುವಿಕೆ ನಿರಂತರವಾಗಿ ಮುಂದುವರಿದಿದೆ. ಈ ಹಿನ್ನೆಲೆಯಲ್ಲಿ ಹಿಮಪರ್ವತಗಳಿಗೆ ಬೃಹತ್ ಟಾರ್ಪಲಿನ್ ಹೊದಿಕೆ ಹಾಕುವ ಮೂಲಕ ಮಂಜು ಕರಗದಂತೆ ತಡೆಯಲು ಕ್ರಮ ಕೈಗೊಳ್ಳಲಾಗುತ್ತಿದೆ.
ಇದು ಭಾರತದಲ್ಲಿ ಅಲ್ಲ, ಬದಲಿಗೆ ಉತ್ತರ ಇಟಲಿಯಲ್ಲಿರುವ ಹಿಮಪರ್ವತಗಳಿಗೆ ಈ ರೀತಿ ಬೃಹತ್ ಟಾರ್ಪಲಿನ್ ಹೊದಿಕೆಗಳನ್ನು ಹೊದಿಸಲಾಗುತ್ತಿದೆ. ಪ್ರೆಸೆನ್ನಾ ಗ್ಲೇಸಿಯರ್ನಲ್ಲಿ ಹಿಮ ಕರಗುವಿಕೆ ಹೆಚ್ಚಾಗಿದೆ. ಇದನ್ನು ತಡೆಯಲು 1 ಲಕ್ಷ ಚದರ ಮೀಟರ್ ವ್ಯಾಪ್ತಿಯ ಹಿಮಪರ್ವತಗಳಿಗೆ ಟಾರ್ಪಲಿನ್ ಹೊದಿಕೆ ತೊಡಿಸಲಾಗುತ್ತಿದೆ.
ಈ ಪ್ರದೇಶ ಸ್ಕೀಯಿಂಗ್ಗೆ ತುಂಬಾ ಪ್ರಸಿದ್ಧವಾಗಿದೆ. ಈ ಹಿನ್ನೆಲೆಯಲ್ಲಿ ಹಿಮಪರ್ವತಗಳಲ್ಲಿನ ಮಂಜು ಕರಗದಂತೆ ತಡೆಯಲು ಇಟಲಿ ಈ ಕ್ರಮ ಕೈಗೊಳ್ಳುತ್ತಿದೆ. ಸ್ಕೀಯಿಂಗ್ ಋತು ಕೊನೆಗೊಂಡು, ಬೇಸಿಗೆ ತುರುಸುಗೊಳ್ಳುತ್ತಿರುವಂತೆ ಅಲ್ಲಿನ ಅಧಿಕಾರಿಗಳು ಪ್ರತಿವರ್ಷವೂ ಹಿಮಪರ್ವತಗಳಿಗೆ ಟಾರ್ಪಲಿನ್ ಹೊದಿಗೆ ಹೊದಿಸುತ್ತಾರೆ.
ಇಟಲಿಯ ಕಾರೊಸೆಲ್ಲೋ-ಟೊನಾಲೆ ಸಂಸ್ಥೆ 2008ರಲ್ಲಿ ಹಿಮಪರ್ವತಗಳ ರಕ್ಷಣೆಗೆ ಮುಂದಾಗಿತ್ತು. 30 ಸಾವಿರ ಚದರ ಮೀಟರ್ ಹಿಮಪರ್ವತಗಳಿಗೆ ಇದು ಮೊದಲ ಬಾರಿಗೆ ಟಾರ್ಪಲಿನ್ ಹೊದಿಕೆ ಹಾಕಿ ರಕ್ಷಿಸಿತ್ತು. 1993ರಿಂದ ಪ್ರೆಸೆನ್ನಾ ಗ್ಲೇಸಿಯರ್ ಮೂರನೇ ಒಂದು ಭಾಗದಷ್ಟು ಹಿಮವನ್ನು ಕಳೆದುಕೊಂಡಿದೆ. ಇದನ್ನು ರಕ್ಷಿಸುವುದು ನಮ್ಮ ಉದ್ದೇಶವಾಗಿದೆ ಎಂದು ಕಾರೊಸೆಲ್ಲೋ-ಟೊನಾಲೆಯ ಮುಖ್ಯಸ್ಥ ಡೇವಿಡ್ ಪಾನಿಜಾ ಹೇಳಿದ್ದಾರೆ.
ಇದನ್ನೂ ಓದಿ: ಟೆಂಟ್ ತೆಗೆಯಿರಿ ಎಂದು ಹೇಳಲು ಹೋದ ಭಾರತೀಯ ಯೋಧರ ಮೇಲೆ ಚೀನಿಯರ ದಾಳಿ
ಲೊಂಬಾರ್ಡಿ ಮತ್ತು ಟ್ರೆಂಟಿನೊ ಆಲ್ಟೋ ಆಡಿಜ್ ವಲಯದಲ್ಲಿ 2,700ರಿಂದ 3 ಸಾವಿರ ಮೀಟರ್ ಎತ್ತರದಲ್ಲಿ ಡೇವಿಡ್ ಪಾನಿಜಾ ಅವರ ತಂಡ ಟಾರ್ಪಲಿನ್ ಹೊದಿಕೆ ಹೊದಿಸಲಾರಂಭಿಸಿದೆ. ಇದು ಜಿಯೋಟೆಕ್ಸ್ಟೈಲ್ ಟಾರ್ಪಲಿನ್ಗಳಾಗಿದ್ದು, ಸೂರ್ಯನ ಬೆಳಕು ತಾಗದಂತೆ ನೋಡಿಕೊಳ್ಳುತ್ತವೆ. ಜತೆಗೆ ಹೊರಗಿನ ತಾಪಮಾನಕ್ಕಿಂತಲೂ ಕಡಿಮೆ ತಾಪಮಾನ ಕೆಳಭಾಗದಲ್ಲಿ ಇರುವಂತೆ ಮಾಡುತ್ತವೆ ಎಂದು ಅವರು ವಿವರಿಸಿದ್ದಾರೆ.
ಆಸ್ಟ್ರಿಯಾದ ಗ್ಲೇಸಿಯರ್ಗಳಿಗೂ ಇದೇ ರೀತಿಯ ಟಾರ್ಪಲಿನ್ ಹೊದಿಕೆಗಳನ್ನು ಹಾಕಲಾಗುತ್ತದೆ. ಆದರೆ, ಅವು ಗಾತ್ರದಲ್ಲಿ ತುಂಬಾ ಸಣ್ಣದಾಗಿವೆ. ಆದರೆ, ಅಂದಾಜು 34,091 ರೂ. ಮೌಲ್ಯದ ಟಾರ್ಪಲಿನ್ ಸ್ಟ್ರಿಪ್ಗಳನ್ನು 70 ಮೀಟರ್ X 5 ಮೀಟರ್ ಅಳತೆಯ ಸ್ಟ್ರಿಪ್ಗಳನ್ನು ಹೊಲಿದು ಪ್ರೆಸನ್ನಾ ಗ್ಲೇಸಿಯರ್ಗೆ ಹಾಕಲಾಗುತ್ತದೆ. ಅವುಗಳು ಹಾರದಂತೆ ಮರಳಿನ ಚೀಲಗಳನ್ನು ಇರಿಸಲಾಗುತ್ತದೆ ಎಂದು ವಿವರಿಸಿದ್ದಾರೆ.
ಸೆಪ್ಟೆಂಬರ್ನಲ್ಲಿ ಟಾರ್ಪಲಿನ್ ಅನ್ನು ತೆರೆಯಲು ಆರಂಭಿಸಲಾಗುತ್ತದೆ. ಈ ಕಾರ್ಯಾಚರಣೆ ಪೂರ್ಣಗೊಳಿಸಲು ಆರು ತಿಂಗಳು ಬೇಕಾಗುತ್ತದೆ. ಟಾರ್ಪಲಿನ್ ತೆಗೆದ ಬಳಿಕವೂ ಹಿಮ ಹಾಗೆಯೇ ಇರುವುದನ್ನು ನೋಡಲು ಖುಷಿಯಾಗುತ್ತದೆ ಎಂದು ಹೇಳಿದ್ದಾರೆ.
ಪರಿಸ್ಥಿತಿ ಕೈಮೀರುವಂತಿದ್ದರೆ ಮುಲಾಜಿಲ್ಲದೆ ಶಸ್ತ್ರಾಸ್ತ್ರ ಬಳಸಿ