ಬೆಂಗಳೂರು: ಮದುವೆ ಹೆಸರಲ್ಲಿ ದುಷ್ಕರ್ಮಿಯೊಬ್ಬ ಬೀಸಿದ ವಂಚನೆಯ ಬಲೆಗೆ ಸಿಲುಕಿದ ಯುವತಿ 4 ಲಕ್ಷ ರೂ. ಕಳೆದುಕೊಂಡಿದ್ದಾಳೆ.
ಮ್ಯಾಟ್ರಿಮೋನಿ ಜಾಲತಾಣದಲ್ಲಿ ಯುವತಿಗೆ ಪರಿಚಯವಾಗಿದ ವ್ಯಕ್ತಿ ಮದುವೆಯಾಗುವುದಾಗಿ ನಂಬಿಸಿ ಹಣ ಪಡೆದು ವಂಚಿಸಿದ್ದಾನೆ. ಜೆ.ಪಿ.ನಗರದ ನಟರಾಜ್ ಲೇಔಟ್ ನಿವಾಸಿ 27 ವರ್ಷದ ಯುವತಿ ವಂಚನೆಗೊಳಗಾದವರು. ಈಕೆ ಕೊಟ್ಟ ದೂರಿನ ಮೇರೆಗೆ ಅಪರಿಚಿತರ ವಿರುದ್ಧ ದಕ್ಷಿಣ ವಿಭಾಗ ಸಿಇಎನ್ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
ಇದನ್ನೂ ಓದಿರಿ ಶಾಸಕ ಶರತ್ ಬಚ್ಚೇಗೌಡ ದಂಪತಿಗೆ ಕರೊನಾ ಸೋಂಕು
ಯುವತಿ ಕಳೆದ ತಿಂಗಳು ಜಾಲತಾಣದಲ್ಲಿ ಸ್ವವಿವರ ಅಪ್ಲೋಡ್ ಮಾಡಿದ್ದಳು. ಈ ವೇಳೆ ಪರಿಚಯವಾಗಿದ್ದ ವ್ಯಕ್ತಿಯೊಬ್ಬ, ‘ನಾನು ಇಂಗ್ಲೆಂಡ್ನಲ್ಲಿ ಕೆಲಸ ಮಾಡುತ್ತಿದ್ದೇನೆ. ನಿಮ್ಮ ಪೊಫೈಲ್ ಇಷ್ಟವಾಗಿದ್ದು ಮದುವೆ ಆಗುವೆ’ ಎಂದು ಹೇಳಿದ್ದ.
ಬಳಿಕ ಇಬ್ಬರು ಪರಸ್ಪರ ಫೋನ್ ನಂಬರ್ ವಿನಿಮಯ ಮಾಡಿಕೊಂಡಿದ್ದು, ಪ್ರತಿನಿತ್ಯ ವ್ಯಾಟ್ಸ್ಆ್ಯಪ್ನಲ್ಲಿ ಚಾಟಿಂಗ್ ಮಾಡುತ್ತಿದ್ದರು. ಜೂ.15ರಂದು ಮೆಸೇಜ್ ಮಾಡಿದ್ದ ವೇಳೆ ಶೀಘ್ರವೇ ಇಂಗ್ಲೆಂಡ್ನಿಂದ ಭಾರತಕ್ಕೆ ಬರುತ್ತಿದ್ದು, ಮೊದಲಿಗೆ ಲಗೇಜ್ ಕಳುಹಿಸುತ್ತಿದ್ದೇನೆ ಎಂದಿದ್ದ. ಲಗೇಜ್ ಸ್ವೀಕರಿಸಿಟ್ಟುಕೊಳ್ಳುವಂತೆ ಯುವತಿಗೆ ಹೇಳಿದ್ದ.
ಜೂ.22ರಂದು ಯುವತಿಗೆ ಕರೆ ಮಾಡಿದ್ದ ಅಪರಿಚಿತರು, ‘ಫಾಸ್ಟ್ ಲಿಂಕ್ ಕೋರಿಯರ್ ಸರ್ವೀಸ್’ನಿಂದ ಮಾತನಾಡುತ್ತಿರುವುದಾಗಿ ಹೇಳಿದ್ದರು. ‘ನಿಮ್ಮ ಹೆಸರಿಗೆ ಇಂಗ್ಲೆಂಡ್ನಿಂದ ಕೋರಿಯರ್ ಬಂದಿದೆ. ತೆರಿಗೆ ಕಟ್ಟಿ ಸ್ವೀಕರಿಸಿ’ ಎಂದಿದ್ದರು. ಅವರ ಮಾತನ್ನು ನಂಬಿದ ಯುವತಿ ಹಂತಹಂತವಾಗಿ 4 ಲಕ್ಷ ರೂ. ಸಂದಾಯ ಮಾಡಿದ್ದಾಳೆ. ಈವರೆಗೂ ಕೋರಿಯರ್ ಪಾರ್ಸಲ್ ನೀಡಿಲ್ಲ. ಇನ್ನಷ್ಟು ಹಣ ಹಾಕುವಂತೆ ಬೇಡಿಕೆ ಇಟ್ಟಿದ್ದು, ಸೈಬರ್ ಕಳ್ಳರು ವಂಚಿಸುತ್ತಿರುವುದು ಗೊತ್ತಾಗಿ ಠಾಣೆಗೆ ಯುವತಿ ದೂರು ಕೊಟ್ಟಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.