ವಾಷಿಂಗ್ಟನ್: ಅಮೆರಿಕ ಹೊತ್ತಿ ಉರಿಯುತ್ತಿರಲು ಕಾರಣ ಜಾರ್ಜ್ ಫ್ಲಾಯ್ಡ್ ಎಂಬ ಕಪ್ಪುವರ್ಣೀಯನನ್ನು ಮಿನ್ನೆಪೊಲಿಸ್ ಸಿಟಿಯಲ್ಲಿ ಅಲ್ಲಿನ ಮೂವರು ಶ್ವೇತವರ್ಣೀಯ ಪೊಲೀಸರು ಹತ್ಯೆ ಮಾಡಿದ್ದು. ಅಂದು ಅಂಗಡಿಯೊಂದರಲ್ಲಿ ಸಿಗರೇಟ್ ಕೊಂಡಿದ್ದ ಜಾರ್ಜ್, ನಕಲಿ ನೋಟು ಕೊಟ್ಟಿದ್ದ. ಅಂಗಡಿಯವರು ಪೊಲೀಸರಿಗೆ ಕರೆ ಮಾಡಿದ್ದರು. ಸ್ಥಳಕ್ಕಾಗಮಿಸಿದ್ದ ಪೊಲೀಸರು ಅಮಾನುಷವಾಗಿ ವರ್ತಿಸಿ, ಆತನನ್ನು ಕೊಂದೇಬಿಟ್ಟರು.
ಇದನ್ನೂ ಓದಿ: ಮಹಾಯುದ್ಧದ ಕಾಲದಲ್ಲೇ ಲಾಕ್ಡೌನ್ ಇರಲಿಲ್ಲ…ಅಂಥದ್ದರಲ್ಲಿ ಈಗ್ಯಾಕೆ? ಕೇಂದ್ರಕ್ಕೆ ರಾಗಾ ಪ್ರಶ್ನೆ
ಜಾರ್ಜ್ ಫ್ಲಾಯ್ಡ್ನನ್ನು ನೆಲಕ್ಕೆ ಒತ್ತಿ ಮಲಗಿಸಿ, ಆತನ ಕತ್ತಿನ ಮೇಲೆ ಓರ್ವ ಪೊಲೀಸ್ ಅಧಿಕಾರಿ ತನ್ನ ಮೊಣಕಾಲನ್ನು ಗಟ್ಟಿಯಾಗಿ ಊರಿದ್ದ. ಎಂಟು ನಿಮಿಷಕ್ಕೂ ಅಧಿಕ ಕಾಲ ಹೀಗೆ ಒತ್ತಿ ಹಿಡಿದಿದ್ದ..ಆಗ ಜಾರ್ಜ್ ನನಗೆ ಉಸಿರಾಡಲು ಆಗುತ್ತಿಲ್ಲ ಎಂದು ನರಳುತ್ತಿದ್ದ. ಈ ಹತ್ಯೆಯನ್ನು ವಿರೋಧಿಸಿ ಪ್ರತಿಭಟನೆ ನಡೆಸಿದ ಕಪ್ಪು ವರ್ಣೀಯರು, ಐ ಕಾಂಟ್ ಬ್ರೀದ್ (ನನಗೆ ಉಸಿರಾಡಲು ಆಗುತ್ತಿಲ್ಲ) ಎಂಬ ಪೋಸ್ಟರ್ಗಳನ್ನೇ ಹಿಡಿದಿದ್ದರು.
ಮೇ 25ರಂದು ಪೊಲೀಸರ ಕೈಯಲ್ಲಿ ಕಗ್ಗೊಲೆಯಾದ ಜಾರ್ಜ್ ಫ್ಲಾಯ್ಡ್ ವೈದ್ಯಕೀಯ ವರದಿ ಬಂದಿದೆ. ಆತನ ಕುಟುಂಬದವರ ಒಪ್ಪಿಗೆ ಪಡೆದೇ ವೈದ್ಯರು ಬಹಿರಂಗ ಪಡಿಸಿದ್ದಾರೆ. ಜಾರ್ಜ್ ಫ್ಲಾಯ್ಡ್ಗೆ ಏ.3ರಂದು ಕರೊನಾ ಪಾಸಿಟಿವ್ ಆಗಿತ್ತು. ಫ್ಲಾಯ್ಡ್ ಸೋಂಕು ರಹಿತ ಕರೊನಾಕ್ಕೆ ತುತ್ತಾಗಿದ್ದರು ಎಂದೂ ಹೇಳಿದ್ದಾರೆ. ಪೊಲೀಸ್ ಅಧಿಕಾರಿ ಫ್ಲಾಯ್ಡ್ ಕುತ್ತಿಗೆಯನ್ನು ಒತ್ತಿ ಹಿಡಿದಾಗ ತೀವ್ರ ಹೃದಯಾಘಾತಕ್ಕೆ ಒಳಗಾಗಿ ಸಾವನ್ನಪ್ಪಿದ್ದಾರೆ ಎಂದು ಹೆನ್ನೆಪಿನ್ ಕೌಂಟಿಯಲ್ಲಿರುವ ವೈದ್ಯಕೀಯ ಪರೀಕ್ಷಕರ ಕಚೇರಿ ಅಧಿಕಾರಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಜನಾಂಗೀಯ ದ್ವೇಷದ ನಡುವೆ ಭಗ್ನವಾಯ್ತು ಗಾಂಧಿ ಪ್ರತಿಮೆ
ಕೊವಿಡ್-19 ಅಟ್ಯಾಕ್ ಆಗಿದ್ದರೂ ಅವರ ಶ್ವಾಸಕೋಶಗಳು ಆರೋಗ್ಯಕರವಾಗಿಯೇ ಇದ್ದವು. ಆದರೆ ಹೃದಯದಲ್ಲಿ ಅಪಧಮನಿಗಳು ಕಿರಿದಾಗಿದ್ದವು ಎಂದು ಹೇಳಿದ್ದಾರೆ. (ಏಜೆನ್ಸೀಸ್)