ಅಹಮದಾಬಾದ್: ಆಲ್ರೌಂಡರ್ ರವೀಂದ್ರ ಜಡೇಜಾ (15*ರನ್, 6 ಎಸೆತ, 1 ಬೌಂಡರಿ, 1 ಸಿಕ್ಸರ್ ಹಾಗೂ 38ಕ್ಕೆ 1 ವಿಕೆಟ್) ಕೊನೇ ಓವರ್ನಲ್ಲಿ ನಡೆಸಿದ ದಿಟ್ಟ ಬ್ಯಾಟಿಂಗ್ ನೆರವಿನಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಐಪಿಎಲ್-16ರಲ್ಲಿ ಚಾಂಪಿಯನ್ ಪಟ್ಟವೇರಿದೆ. ಮಳೆಬಾಧಿತ ಫೈನಲ್ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ ಎದುರು 5 ವಿಕೆಟ್ಗಳಿಂದ ರೋಚಕ ಗೆಲುವು ದಾಖಲಿಸಿದ ಎಂಎಸ್ ಧೋನಿ ಪಡೆ 5ನೇ ಬಾರಿಗೆ ಪ್ರಶಸ್ತಿ ಗೆದ್ದು ದಾಖಲೆ ಬರೆಯಿತು. ಟೂರ್ನಿಯಲ್ಲಿ ಹಾಲಿ ಚಾಂಪಿಯನ್ ಆಗಿ ಅಭಿಯಾನ ಆರಂಭಿಸಿದ್ದ ಗುಜರಾತ್ ಟೈಟಾನ್ಸ್ ತವರಿನಲ್ಲಿ ಮುಗ್ಗರಿಸಿ ರನ್ನರ್ ಅಪ್ಗೆ ತೃಪ್ತಿಪಟ್ಟಿತು.
ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಮೀಸಲು ದಿನವಾದ ಸೋಮವಾರ ನಡೆದ ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಗುಜರಾತ್ ಟೈಟಾನ್ಸ್ ತಂಡ, ತಮಿಳುನಾಡಿನ ಯುವ ಬ್ಯಾಟರ್ ಸಾಯಿ ಸುದರ್ಶನ್ (96 ರನ್, 47 ಎಸೆತ, 8 ಬೌಂಡರಿ, 6 ಸಿಕ್ಸರ್) ಸ್ಪೋಟಕ ಬ್ಯಾಟಿಂಗ್ ಹಾಗೂ ವಿಕೆಟ್ ಕೀಪರ್- ಬ್ಯಾಟರ್ ವೃದ್ಧಿಮಾನ್ ಸಾಹ (54 ರನ್, 39 ಎಸೆತ,5 ಬೌಂಡರಿ, 1 ಸಿಕ್ಸರ್) ಅರ್ಧಶತಕ ಸಿಡಿಸಿ ಉತ್ತಮ ಆರಂಭ ಒದಗಿಸಿದ ನೆರವಿನಿಂದ 4 ವಿಕೆಟ್ಗೆ 214 ರನ್ಗಳ ಸವಾಲಿನ ಮೊತ್ತ ಕಲೆಹಾಕಿತು. ನಂತರ ಸಿಎಸ್ಕೆ ಚೇಸಿಂಗ್ ಆರಂಭಿಸಿದಾಗ 3 ಎಸೆತಗಳಲ್ಲಿ 4 ರನ್ ಕಲೆಹಾಕಿದಾಗ ಸುರಿದ ಮಳೆಯಿಂದಾಗಿ ಆಟ ನಿಂತಿತು. 2 ಗಂಟೆಗಳ ಬಳಿಕ ಆಟ ಪುನರಾರಂಭಗೊಂಡಾಗ ಡಕ್ವರ್ತ್-ಲೂಯಿಸ್ ನಿಯಮದನ್ವಯ 15 ಓವರ್ಗಳಲ್ಲಿ 171 ರನ್ಗಳ ಪರಿಷ್ಕೃತ ಗುರಿ ನೀಡಲಾಯಿತು. ಇದಕ್ಕೆ ಪ್ರತಿಯಾಗಿ ಸಿಎಸ್ಕೆ 15 ಓವರ್ಗಳಲ್ಲಿ 5 ವಿಕೆಟ್ಗೆ 171 ರನ್ ಕಲೆಹಾಕಿ ಗೆಲುವಿನ ಕೇಕೆ ಹಾಕಿತು.
ಇದನ್ನೂ ಓದಿ: ನಮೋ ಸರ್ಕಾರಕ್ಕೆ 9 ವರ್ಷ: ಅಭಿವೃದ್ಧಿ ಹೊಂದಿದ ಭಾರತ ನಿರ್ಮಿಸಲು ಹೆಚ್ಚು ಶ್ರಮಿಸುತ್ತೇವೆಂದ ಪ್ರಧಾನಿ
ಫೈನಲ್ ಮುಕ್ತಾಯದ ನಂತರ, ಐಪಿಎಲ್ನಿಂದ ಎಲ್ಲ ವಿಜೇತರ ಹೆಸರನ್ನು ಘೋಷಿಸಲಾಯಿತು. ಪ್ರಶಸ್ತಿ ಗೆದ್ದವರು ಸಂಪೂರ್ಣ ಪಟ್ಟಿ ಈ ಕೆಳಕಂಡಂತಿದೆ.
* ಐಪಿಎಲ್ 2023 ವಿಜೇತ ತಂಡ: ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ)
* ರನ್ನರ್ ಅಪ್ ತಂಡ: ಗುಜರಾತ್ ಟೈಟಾನ್ಸ್ (ಜಿಟಿ)
* ಮೂರನೇ ಸ್ಥಾನ ಪಡೆದ ತಂಡ: ಮುಂಬೈ ಇಂಡಿಯನ್ಸ್ (ಎಂಐ)
* ನಾಲ್ಕನೇ ಸ್ಥಾನ ಪಡೆದ ತಂಡ: ಲಖನೌ ಸೂಪರ್ ಜೇಂಟ್ಸ್ (ಎಲ್ಎಸ್ಜಿ)
* ಈ ಸೀಸನ್ನ ಅತ್ಯುತ್ತಮ ಸ್ಥಳಗಳು: ಕೋಲ್ಕತದ ಈಡನ್ ಗಾರ್ಡನ್ ಮತ್ತು ಮುಂಬೈನ ವಾಂಖೆಡೆ ಸ್ಟೇಡಿಯಂ
* ಐಪಿಎಲ್ ಫೇರ್ ಪ್ಲೇ ಅವಾರ್ಡ್: ಡೆಲ್ಲಿ ಕ್ಯಾಪಿಟಲ್ಸ್ (ಡಿಸಿ)
* ಆರೆಂಜ್ ಕ್ಯಾಪ್ (ಅತ್ಯಧಿಕ ರನ್ ಗಳಿಸಿದ ಆಟಗಾರ): ಶುಭಮನ್ ಗಿಲ್ (ಜಿಟಿ) 890 ರನ್
* ಪರ್ಪಲ್ ಕ್ಯಾಪ್ (ಅತ್ಯಧಿಕ ವಿಕೆಟ್ ಪಡೆದ ಬೌಲರ್): ಮೊಹಮ್ಮದ್ ಶಮಿ (ಜಿಟಿ) 28 ವಿಕೆಟ್ಸ್
* ಟೂರ್ನಮೆಂಟ್ನ ಸೂಪರ್ ಸ್ಟ್ರೈಕರ್: ಗ್ಲೇನ್ ಮ್ಯಾಕ್ಸ್ವೆಲ್ (ಆರ್ಸಿಬಿ)
* ಟೂರ್ನಮೆಂಟ್ನ ಗೇಮ್ ಚೇಂಜರ್: ಶುಭಮನ್ ಗಿಲ್ (ಜಿಟಿ)
* ಟೂರ್ನಮೆಂಟ್ನ ಅತ್ಯಮೂಲ್ಯ ಆಸ್ತಿ: ಶುಭಮನ್ ಗಿಲ್ (ಜಿಟಿ)
* ಹೆಚ್ಚು ಬೌಂಡರಿ (4) ಬಾರಿಸಿದ ಆಟಗಾರ: ಶುಭಮನ್ ಗಿಲ್ (ಜಿಟಿ)
* ಅತಿ ಉದ್ದದ ಸಿಕ್ಸರ್ ಬಾರಿಸಿದ ಆಟಗಾರ: ಫಾಫ್ ಡುಪ್ಲಿಸಿಸ್ (ಆರ್ಸಿಬಿ) (115 ಮೀಟರ್)
* ಟೂರ್ನಮೆಂಟ್ ಅತ್ಯುತ್ತಮ ಕ್ಯಾಚ್ ಪ್ರಶಸ್ತಿ: ರಶೀದ್ ಖಾನ್ (ಜಿಟಿ)
* ಈ ಸೀಸನ್ನ ಉದಯೋನ್ಮುಖ ಆಟಗಾರ: ಯಶಸ್ವಿ ಜೈಸ್ವಾಲ್ (ರಾಜಸ್ಥಾನ ರಾಯಲ್ಸ್)
ಈ ಸೀಸನ್ನ ಉದಯೋನ್ಮುಖ ಆಟಗಾರ ಪ್ರಶಸ್ತಿಯನ್ನು ಗೆದ್ದಿರುವ ಜೈಸ್ವಾಲ್ ಅವರು ಭಾರತದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಅಂತಿಮ ತಂಡದಲ್ಲಿ ಸ್ಥಾನವನ್ನು ಸಹ ಪಡೆದಿದ್ದಾರೆ.
ದುಪ್ಪಟ್ಟ ಹಾಕದವರೇ ಟಾರ್ಗೆಟ್: ಸಿಕ್ಕಿಬಿದ್ದ ಸೈಕೋ ಶರವಣನ್, ನಿಟ್ಟುಸಿರು ಬಿಟ್ಟ ಮಹಿಳೆಯರು
ನಟ ಬಾಲಯ್ಯ ವಿಡಿಯೋ ಮೂಲಕ ಪೊಲೀಸರಿಗೆ ತಿರುಗೇಟು ಕೊಟ್ಟ ನಟಿ ಡಿಂಪಲ್ ಹಯಾತಿ!
ಪಠ್ಯ ಪುಸ್ತಕ ಪರಿಷ್ಕರಣೆ ಮಾಡಲು ಮುಂದಾಗಿದ್ಯಾ ಸರ್ಕಾರ? ಶಿಕ್ಷಣ ಸಚಿವರ ಪ್ರತಿಕ್ರಿಯೆ ಹೀಗಿದೆ…