ನವದೆಹಲಿ: ಇತ್ತೀಚೆಗಷ್ಟೇ ಸುಪ್ರೀಂಕೋರ್ಟ್ ರದ್ದು ಮಾಡಿದ ಚುನಾವಣಾ ಬಾಂಡ್ ಯೋಜನೆ ಅಡಿಯಲ್ಲಿ ವಿವಿಧ ರಾಜಕೀಯ ಪಕ್ಷಗಳು ಪಡೆದ ನಿಧಿಗೆ ಸಂಬಂಧಿಸಿದ ಹೊಸ ಮಾಹಿತಿಯನ್ನು ಕೇಂದ್ರ ಚುನಾವಣಾ ಆಯೋಗ ಭಾನುವಾರ ಬಿಡುಗಡೆ ಮಾಡಿದೆ. ಮುಚ್ಚಿದ ಲಕೋಟೆಯಲ್ಲಿ ಹೊಸ ಮಾಹಿತಿಯನ್ನು ಸುಪ್ರೀಂಕೋರ್ಟ್ಗೆ ಆಯೋಗ ಸಲ್ಲಿಸಿದ್ದು, ಸುಪ್ರೀಂಕೋರ್ಟ್‌ನ ರಿಜಿಸ್ಟ್ರಿ ಭೌತಿಕ ಪ್ರತಿಗಳನ್ನು ಹಿಂದಿರುಗಿಸಿದ ಬಳಿಕ ಚುನಾವಣಾ ಆಯೋಗವು ಡೇಟಾವನ್ನು ತನ್ನ ವೆಬ್‌ಸೈಟ್ಗೆ ಅಪ್‌ಲೋಡ್ ಮಾಡಿದೆ.
ಹೊಸ ಡೇಟಾದಲ್ಲಿ ಚುನಾವಣಾ ಬಾಂಡ್ಗಳನ್ನು ವಿತರಿಸಿದ ದಿನಾಂಕ, ನಿಧಿಗಳ ವರ್ಗ, ಬಾಂಡ್ಗಳ ಸಂಖ್ಯೆ ಮತ್ತು ಬಾಂಡ್ಗಳನ್ನು ವಿತರಿಸಿದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ದ ಶಾಖೆಯ ಮಾಹಿತಿ ಇದೆ. ಅಲ್ಲದೆ, ಬಾಂಡ್ಗಳನ್ನು ಸ್ವೀಕರಿಸಿದ ದಿನಾಂಕ ಮತ್ತು ಪಕ್ಷಗಳ ಬ್ಯಾಂಕ್ ಖಾತೆಗಳಿಗೆ ಹಣ ಕ್ರೆಡಿಟ್ ಆದ ಮಾಹಿತಿಯನ್ನು ಹೊಸ ಡೇಟಾ ಒಳಗೊಂಡಿದೆ.
ಆದಾಗ್ಯೂ, ಹೊಸ ಡೇಟಾದಲ್ಲಿ ಚುನಾವಣಾ ಬಾಂಡ್ ಸಂಖ್ಯೆಗಳನ್ನು ಒಳಗೊಂಡಿಲ್ಲ. ಬಾಂಡ್ಗಳ ಸಂಖ್ಯೆ ಮುಖ್ಯವಾಗಿದ್ದು, ಇದು ದಾನಿಗಳು ಮತ್ತು ಸ್ವೀಕರಿಸುವವರಿಗೆ ಲಿಂಕ್ ಮಾಡುತ್ತದೆ. ಚುನಾವಣಾ ಆಯೋಗಕ್ಕೆ ಸಲ್ಲಿಸಿದ ಡೇಟಾದಲ್ಲಿ ಕೆಲವು ಪಕ್ಷಗಳು ತಮ್ಮ ದಾನಿಗಳ ಮಾಹಿತಿಗಳನ್ನು ಸಹ ನೀಡಿವೆ.
ಡೇಟಾ ಪ್ರಕಾರ ಬಿಜೆಪಿ ಪಕ್ಷವು ಬಾಂಡ್ಗಳ ಮೂಲಕ ಅತಿ ಹೆಚ್ಚು ನಿಧಿಯನ್ನು ಸ್ವೀಕರಿಸಿದೆ. 6,986.5 ಕೋಟಿ ರೂ.ಗಳನ್ನು ಸ್ವೀಕರಿಸಿದೆ. ನಂತರದ ಸ್ಥಾನದಲ್ಲಿ ಪಶ್ಚಿಮ ಬಂಗಾಳದ ತೃಣಮೂಲ ಕಾಂಗ್ರೆಸ್ (1,397 ಕೋಟಿ ರೂ.), ಕಾಂಗ್ರೆಸ್ (1,334 ಕೋಟಿ ರೂ.) ಮತ್ತು ಭಾರತ ರಾಷ್ಟ್ರ ಸಮಿತಿ (1,322 ಕೋಟಿ ರೂ.) ಪಕ್ಷಗಳಿವೆ. ಒಡಿಶಾದ ಆಡಳಿತಾರೂಢ ಬಿಜೆಡಿ ಕೂಡ 944.5 ಕೋಟಿ ರೂ.ಗಳನ್ನು ಪಡೆದಿದೆ. ಡಿಎಂಕೆ 656.5 ಕೋಟಿ ಸ್ವೀಕರಿಸಿದರೆ, ಆಂಧ್ರದ ಆಡಳಿತಾರೂಢ ವೈಎಸ್ಆರ್ ಕಾಂಗ್ರೆಸ್ 442.8 ಮತ್ತು ಜೆಡಿಎಸ್ ಪಕ್ಷ 89.75 ಕೋಟಿ ಸ್ವೀಕರಿಸಿದೆ.
ಸ್ಯಾಂಟಿಯಾಗೋ ಮಾರ್ಟಿನ್ ನೇತೃತ್ವದ ಲಾಟರಿ ಕಂಪನಿ ಫ್ಯೂಚರ್ ಗೇಮಿಂಗ್ ಮತ್ತು ಹೋಟೆಲ್ ಸರ್ವಿಸಸ್ ಪ್ರೈವೇಟ್ ಲಿಮಿಟೆಡ್ 1,368 ಕೋಟಿ ರೂಪಾಯಿಗಳ ಎಲೆಕ್ಟೋರಲ್ ಬಾಂಡ್ಗಳನ್ನು ಖರೀದಿ ಮಾಡುವ ಮೂಲಕ ಅತಿದೊಡ್ಡ ಖರೀದಿದಾರ ಎಂದು ಈ ಹಿಂದೆ ಬಿಡುಗಡೆಯಾದ ಡೇಟಾದಲ್ಲಿ ಬಹಿರಂಗವಾಯಿತು. ಹೊಸ ಡೇಟಾ ಪ್ರಕಾರ ಇದೇ ಕಂಪನಿಯಿಂದ ಡಿಎಂಕೆ 509 ಕೋಟಿ ರೂ.ಗಳನ್ನು ಸ್ವೀಕರಿಸಿದೆ. ಕಂಪನಿಯ ಒಟ್ಟು ದೇಣಿಗೆಯಲ್ಲಿ ಸುಮಾರು 37 ರಷ್ಟು ಎಂದು ತಿಳಿದುಬಂದಿದೆ.
ಚುನಾವಣಾ ಬಾಂಡ್ ವಿಚಾರದಲ್ಲಿ ಫೆಬ್ರವರಿ 15ರಂದು ಸುಪ್ರೀಕೋರ್ಟ್ ಮಹತ್ವದ ತೀರ್ಪು ಪ್ರಕಟಿಸಿತು. ರಾಜಕೀಯ ಪಕ್ಷಗಳು ಪಡೆಯುವ ಚುನಾವಣಾ ಬಾಂಡ್ ಅನ್ನು ಅಸಂವಿಧಾನಿಕ ಎಂದಿರುವ ಉನ್ನತ ನ್ಯಾಯಾಲಯ ಅದನ್ನು ರದ್ದು ಮಾಡಿ, ಬಾಂಡ್ ವಿವರಗಳನ್ನು ವೆಬ್ಸೈಟ್ನಲ್ಲಿ ಪ್ರಕಟಿಸುವಂತೆ ಚುನಾವಣಾ ಆಯೋಗಕ್ಕೆ ಸೂಚನೆ ನೀಡಿತು. 2019 ರಿಂದ ಪ್ರಸ್ತುತ ದಿನಾಂಕದವರೆಗೆ ಚುನಾವಣಾ ಬಾಂಡ್ ಕೊಡುಗೆಗಳನ್ನು ಪಡೆದ ಪಕ್ಷಗಳ ವಿವರಗಳನ್ನು ಸಲ್ಲಿಸಲು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI)ಗೂ ಸುಪ್ರೀಂಕೋರ್ಟ್ ತಿಳಿಸಿತ್ತು. ಅಲ್ಲದೆ, ಚುನಾವಣಾ ಬಾಂಡ್ಗಳನ್ನು ನೀಡುವುದನ್ನು ನಿಲ್ಲಿಸಿ ಎಂದು ಬ್ಯಾಂಕ್ಗಳಿಗೆ ಸೂಚನೆ ನೀಡಿತು. ಇದರ ಮಧ್ಯೆ ಗಡುವು ವಿಸ್ತರಣೆ ಕೋರಿ ಎಸ್ಬಿಐ ಕೋರ್ಟ್ ಮೆಟ್ಟಿಲೇರಿತ್ತು. ಆದರೆ, ಛೀಮಾರಿ ಹಾಕಿದ ಕೋರ್ಟ್ ಮಾರ್ಚ್ 12ರಂದು ವಿವರ ಸಲ್ಲಿಸುವಂತೆ ಆದೇಶ ಹೊರಡಿಸಿತು. ಇದರ ಬೆನ್ನಲ್ಲೇ ಎಸ್ಬಿಐ ಚುನಾವಣಾ ಆಯೋಗಕ್ಕೆ ವಿವರವನ್ನು ಸಲ್ಲಿಸಿದ್ದು, ಇದನ್ನು ಚುನಾವಣಾ ಆಯೋಗ ತನ್ನ ವೆಬ್ಸೈಟ್ನಲ್ಲಿ ಪ್ರಕಟಿಸಿತು. ಅದರ ಪ್ರಕಾರ 2019ರ ಏಪ್ರಿಲ್ 1ರಿಂದ 2024ರ ಫೆಬ್ರವರಿ 15ರವರೆಗೆ 22,217 ಬಾಂಡ್ಗಳನ್ನು ಖರೀದಿಸಲಾಗಿದ್ದು, ಇದರಲ್ಲಿ 22,030 ಬಾಂಡ್ಗಳನ್ನು ಬಿಡಿಸಿಕೊಳ್ಳಲಾಗಿದೆ ಎಂದು ಎಸ್ಬಿಐ ತಿಳಿಸಿದೆ. 15 ದಿನಗಳ ಮಾನ್ಯತೆಯ ಅವಧಿಯಲ್ಲಿ ಚುನಾವಣಾ ಪಕ್ಷಗಳು ನಗದೀಕರಿಸದ ಉಳಿದ 187 ಬಾಂಡ್ಗಳ ಮೊತ್ತವನ್ನು ಪ್ರಧಾನ ಮಂತ್ರಿಗಳ ಪರಿಹಾರ ನಿಧಿಗೆ ವರ್ಗಾಯಿಸಲಾಗಿದೆ ಎಂದು ಎಸ್ಬಿಐ ಹೇಳಿದೆ. (ಏಜೆನ್ಸೀಸ್)
WPL 2024 RCBvsDC: ಗ್ಯಾರಂಟಿ ಆಗಲಿದ್ಯಾ ‘ಈ ಸಲ ಕಪ್ ನಮ್ದೇ’? ಮೊಳಗಿತು ಆರ್ಸಿಬಿ ಫ್ಯಾನ್ಸ್ ಕಹಳೆ
ಮನವೊಲಿಸುವ ಪ್ರಯತ್ನ ಒಮ್ಮೆಯೂ ಮಾಡಲಿಲ್ಲ; ಹಾರ್ದಿಕ್ ಬಗ್ಗೆ ಜಿಟಿ ಕೋಚ್ ಹೇಳಿದ್ದಿಷ್ಟು!