ಬೆಂಗಳೂರು: ಅಯ್ಯೋ ಪಾಪ ಎಂದು ಒಂದೊಳ್ಳೆಯ ಕೆಲಸ ಮಾಡಲು ಹೋಗಿ ಸ್ವತಃ ಅವರೇ ಇನ್ನೊಬ್ಬರ ಬಳಿ ಅಯ್ಯೋ ಪಾಪ ಎಂದೆನಿಸಿಕೊಳ್ಳುವಂಥ ಪ್ರಕರಣವಿದು. ನೀರಲ್ಲಿ ಮುಳುಗೇಳುತ್ತಿದ್ದ ನಾಯಿಮರಿಯೊಂದನ್ನು ರಕ್ಷಿಸಲು ಹೋದ ಅಪ್ಪ-ಮಗನಿಗೇ ದುಷ್ಕರ್ಮಿಗಳು ಚೂರಿಯಿಂದ ಇರಿದು ಗಾಯಗೊಳಿಸಿದ್ದಾರೆ.
ಮನೆಗೆ ಸಮೀಪದ ಕಾಲುವೆ ಬಳಿ ನೀರಲ್ಲಿ ಮುಳುಗುತ್ತಿದ್ದ ನಾಯಿಮರಿಯೊಂದು ರಕ್ಷಣೆಗಾಗಿ ದೈನ್ಯವಾಗಿ ಬೊಗಳುತ್ತಿದ್ದುದನ್ನು ಕೇಳಿ ತಂದೆ-ಮಗ ಇಬ್ಬರೂ ಕಾರು ತೆಗೆದುಕೊಂಡು ಹೋಗಿ, ಅದರ ಹೆಡ್ಲೈಟ್ ಬೆಳಕು ನಾಯಿ ಇದ್ದ ಜಾಗದ ಮೇಲೆ ಬೀಳುವಂತೆ ರಕ್ಷಣೆಗೆ ತೆರಳಿದ್ದರು. ಆದರೆ ಕೆಲವೇ ಹೊತ್ತಿನಲ್ಲಿ ಆ ದಾರಿಯಾಗಿ ಮತ್ತೊಂದು ಕಾರ್ನಲ್ಲಿ ಬಂದ ನಾಲ್ವರು ತುಂಬ ಪದೇಪದೆ ಹಾರ್ನ್ ಮಾಡಿದ್ದಾರೆ. ಪಕ್ಕದಲ್ಲಿ ಇನ್ನೊಂದು ಕಾರು ಹೋಗುವಷ್ಟು ಜಾಗವಿದ್ದರೂ ತಕರಾರು ತೆಗೆದ ಅಪರಿಚಿತರು ಬಳಿಕ ಅಪ್ಪ-ಮಗನಿಗೆ ಚೂರಿಯಿಂದ ಇರಿದಿದ್ದಾರೆ.
ಅಂದಹಾಗೆ ಶುಕ್ರವಾರ ಮಧ್ಯರಾತ್ರಿ ಈ ಘಟನೆ ಸಂಭವಿಸಿದ್ದು, ಕುನ್ವರ್ ಸಿಂಗ್ ಹಾಗೂ ಅವರ ಪುತ್ರ ಸಾಗರ್ ಗಾಯಗೊಂಡಿದ್ದಾರೆ. ಮಧ್ಯಪ್ರದೇಶದ ಭೋಪಾಲ್ನ ಕೋಲಾರ ಎಂಬಲ್ಲಿನ ಕಾಲುವೆ ಬಳಿ ಈ ಪ್ರಕರಣ ನಡೆದಿದೆ. ತಂದೆ ಕುನ್ವರ್ ಸಿಂಗ್ಗೆ ಇರಿಯುತ್ತಿದ್ದುದನ್ನು ತಪ್ಪಿಸಲು ಮುಂದಾದ ಪುತ್ರ ಸಾಗರ್ ಎದೆಗೂ ದುಷ್ಕರ್ಮಿಗಳು ಚುಚ್ಚಿದ್ದು ಗಂಭೀರ ಗಾಯಗಳಾಗಿವೆ. ಸಿಂಗ್ ಅವರ ಬಲಗಣ್ಣು, ಬೆನ್ನು-ಹೊಟ್ಟೆಯ ಮೇಲೆ ಗಾಯಗಳಾಗಿವೆ. ಕೂಗಾಟ-ಚೀರಾಟ ಕೇಳಿ ಸೆಕ್ಯುರಿಟಿ ಗಾರ್ಡ್ಗಳಾದ ಮಿಲಿಂದ್ ಅಧ್ವಾನಿ ಹಾಗೂ ಪ್ರಕಾಶ್ ಸಿಂಗ್ ರಕ್ಷಣೆಗೆ ಧಾವಿಸುತ್ತಿದ್ದಂತೆ ದುಷ್ಕರ್ಮಿಗಳು ಪಾರಾಗಿದ್ದಾರೆ. ಇಬ್ಬರನ್ನೂ ಆಸ್ಪತ್ರೆಗೆ ಸೇರಿಸಲಾಗಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. (ಏಜೆನ್ಸೀಸ್)
ಮೈಮೇಲೆ ಕೂದಲು ಹೆಚ್ಚಿಗೆ ಇದ್ದರೆ, ಋತುಸ್ರಾವ ಏರುಪೇರಾದರೆ ಮಕ್ಕಳಾಗುವುದಿಲ್ಲವೆ?