ಮ್ಯಾಂಚೆಸ್ಟರ್: ಕರೊನಾ ವೈರಸ್ ಭೀತಿ ನಡುವೆಯೂ 117 ದಿನಗಳ ಬಳಿಕ ಕ್ರಿಕೆಟ್ ಪುನರಾರಂಭಕ್ಕೆ ಸಾಕ್ಷಿಯಾದ ಕ್ರಿಕೆಟ್ ಜನಕರ ನಾಡು ಇಂಗ್ಲೆಂಡ್ ನೆಲದಲ್ಲೇ ಮತ್ತೊಂದು ಟೆಸ್ಟ್ ಸರಣಿಗೆ ವೇದಿಕೆ ಸಿದ್ಧವಾಗಿದೆ. ಕಳೆದ ವಾರವಷ್ಟೇ ಜೈವಿಕ ಸುರಾಕ್ಷ ವಾತಾವರಣದಲ್ಲಿ ಮುಕ್ತಾಯಗೊಂಡ ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ ತಂಡ 2&1 ರಿಂದ ವೆಸ್ಟ್ ಇಂಡೀಸ್ ತಂಡವನ್ನು ಮಣಿಸಿತ್ತು. ಸರಣಿ ಗೆದ್ದ ಹುಮ್ಮಸ್ಸಿನಲ್ಲಿರುವ ಇಂಗ್ಲೆಂಡ್, ಬುಧವಾರದಿಂದ ಓಲ್ಡ್ ಟ್ರಾಫೋರ್ಡ್ ಮೈದಾನದಲ್ಲಿ ನಡೆಯಲಿರುವ ಪ್ರವಾಸಿ ಪಾಕಿಸ್ತಾನ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಸನ್ನದ್ಧವಾಗಿದೆ.
ಆತ್ಮವಿಶ್ವಾಸದಲ್ಲಿ ಉಭಯ ತಂಡಗಳು
2016, 2018ರಲ್ಲಿ ಇಂಗ್ಲೆಂಡ್ ಪ್ರವಾಸ ಕೈಗೊಂಡಿದ್ದ ವೇಳೆ ಸರಣಿಯಲ್ಲಿ ಸಮಬಲ ಸಾಧಿಸಿದ್ದ ಪಾಕಿಸ್ತಾನ ತಂಡ, ಇಂಗ್ಲೆಂಡ್ ಎದುರು ಕಳೆದ 10 ವರ್ಷಗಳಿಂದ ಸರಣಿ ಸೋತಿಲ್ಲ. ಇದು ಪಾಕಿಸ್ತಾನ ಆತ್ಮವಿಶ್ವಾಸ ಹೆಚ್ಚಲು ಕಾರಣವಾದರೆ, ಕಳೆದ ವಾರವಷ್ಟೇ ವೆಸ್ಟ್ ಇಂಡೀಸ್ ಎದುರು ಸರಣಿ ಗೆದ್ದ ವಿಶ್ವಾಸದಲ್ಲಿ ಆತಿಥೇಯ ತಂಡವಿದೆ. ಅದರಲ್ಲೂ ಮೊದಲ ಟೆಸ್ಟ್ ಪಂದ್ಯದಲ್ಲಿ ಸೋತರೂ ಇಂಗ್ಲೆಂಡ್, ವೇಗಿಗಳಾದ ಜೇಮ್ಸ್ ಆಂಡರ್ಸನ್, ಸ್ಟುವರ್ಟ್ ಬ್ರಾಡ್, ಕ್ರಿಸ್ ವೋಕ್ಸ್ ದಾಳಿಯಿಂದಾಗಿ ಕಡೇ ಎರಡು ಪಂದ್ಯ ಗೆದ್ದುಕೊಂಡಿತ್ತು. ಕಡೇ ಟೆಸ್ಟ್ನಲ್ಲಿ 500 ವಿಕೆಟ್ ಪೂರೈಸಿದ್ದ ಸ್ಟುವರ್ಟ್ ಬ್ರಾಡ್ ಮತ್ತೊಮ್ಮೆ ಕೇಂದ್ರಬಿಂದುವಾಗಲಿದ್ದಾರೆ.
ಮೂವರು ವೇಗಿಗಳು, 2 ಸ್ಪಿನ್ನರ್ಗಳನ್ನು ಕಣಕ್ಕಿಳಿಸುವ ಯೋಜನೆಯಲ್ಲಿರುವ ಪಾಕಿಸ್ತಾನ ತಂಡ ಇತಿಹಾಸ ಮರುಕಳಿಸುವ ಇರಾದೆಯಲ್ಲಿದೆ. 2016ರ ಪ್ರವಾಸದಲ್ಲಿ ತಂಡದ ಭಾಗವಾಗಿದ್ದ ಮುಖ್ಯಕೋಚ್ ಮಿಸ್ಬಾ ಉಲ್ ಹಕ್ಗೆ ಬೌಲರ್ಗಳ ಮೇಲೆಯೇ ಹೆಚ್ಚು ನಂಬಿಕೆ. 2018ರ ಪ್ರವಾಸದಲ್ಲಿ ತಂಡದಲ್ಲಿದ್ದ ಮೊಹಮದ್ ಅಬ್ಬಾಸ್, ಎಡಗೈ ವೇಗಿ ಶಾಹೀನ್ ಶಾ ಅಫ್ರಿದಿ ಹಾಗೂ ನಸೀಮ್ ಶಾ ತ್ರಿಮೂತಿರ್ಗಳ ಮೇಲೆ ಮಿಸ್ಬಾ ಅತಿಯಾದ ಭರವಸೆಯನ್ನುಟ್ಟುಕೊಂಡಿದ್ದಾರೆ.
ಟೀಮ್ ನ್ಯೂಸ್
ಇಂಗ್ಲೆಂಡ್:
ವೆಸ್ಟ್ ಇಂಡೀಸ್ ವಿರುದ್ಧ ಕಡೇ ಟೆಸ್ಟ್ನಲ್ಲಿ ಆಡಿದ ತಂಡವನ್ನೇ ಇಂಗ್ಲೆಂಡ್ ಉಳಿಸಿಕೊಳ್ಳಲಿದೆ. ಆಲ್ರೌಂಡರ್ ಬೆನ್ ಸ್ಟೋಕ್ಸ್ ಸಹಿತ ನಾಲ್ಕೂ ವೇಗಿಗಳು ಕಣಕ್ಕಿಳಿಯಲಿದ್ದಾರೆ. ಆಂಡರ್ಸನ್, ಬ್ರಾಡ್, ಜೋಫ್ರಾ ಆರ್ಚರ್ ಕಣಕ್ಕಿಳಿದರೆ, ಕ್ರಿಸ್ ವೋಕ್ಸ್ ಆಯ್ಕೆಯನ್ನು ತಳ್ಳಿಹಾಕುವಂತಿಲ್ಲ. ವೇಗಿಗಳ ಆಯ್ಕೆ ನಾಯಕ ಜೋ ರೂಟ್ಗೆ ತಲೆನೋವಾಗಿರುವುದಂತು ನಿಜ. ನಾಲ್ಕೂ ವೇಗಿಗಳಿಗೆ ಅವಕಾಶ ಕಲ್ಪಿಸಿದರೆ ಸ್ಪಿನ್ನರ್ ಡೊಮಿನಿಕ್ ಬೆಸ್ ಸ್ಥಾನ ಉಳಿಸಿಕೊಳ್ಳಲಿದ್ದಾರೆ. ಉಳಿದಂತೆ ತಂಡದಲ್ಲಿ ಹೆಚ್ಚಿನ ಬದಲಾವಣೆ ಕಷ್ಟ.
ಸಂಭಾವ್ಯ ತಂಡ: ರೋರಿ ಬರ್ನ್ಸ್, ಡೊಮಿನಿಕ್ ಸಿಬ್ಲೆ, ಜಾಕ್ ಕ್ರೌಲಿ, ಜೋ ರೂಟ್, ಬೆನ್ ಸ್ಟೋಕ್ಸ್, ಒಲಿ ಪೋಪ್ ಜೋಸ್ ಬಟ್ಲರ್, ಡೊಮಿನಿಕ್ ಬೆಸ್, ಜೋ್ರಾ ಆರ್ಚರ್/ಕ್ರಿಸ್ ವೋಕ್ಸ್, ಸ್ಟುವರ್ಟ್ ಬ್ರಾಡ್, ಜೇಮ್ಸ್ ಆಂಡರ್ಸನ್.
ಪಾಕಿಸ್ತಾನ:
ಕೋಚ್ ಸಲಹೆ ಮೇರೆಗೆ ತಂಡದಲ್ಲಿ ಇಬ್ಬರು ಸ್ಪಿನ್ನರ್ಗಳಿಗೆ ಅವಕಾಶ ಕಲ್ಪಿಸುವ ಸಾಧ್ಯತೆಗಳಿವೆ. ಇದರಿಂದಗಿ ಹ್ಯಾರಿಸ್ ಸೊಹೈಲ್ಗೆ ಅವಕಾಶ ಸಿಗುವುದು ಅನುಮಾನ. ಲೆಗ್ ಸ್ಪಿನ್ನರ್ ಶಾಬಾದ್ ಖಾನ್, 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗಿಳಿದರೆ, ವಿಕೆಟ್-ಕೀಪರ್ ಮೊಹಮದ್ ರಿಜ್ವಾನ್ 6ನೇ ಕ್ರಮಾಂಕದಲ್ಲಿ ಇಳಿಯಲಿದ್ದಾರೆ.
ಸಂಭಾವ್ಯ ತಂಡ: ಶಾನ್ ಮೊಹಸೂದ್, ಅಬಿದ್ ಅಲಿ, ಅಜರ್ ಅಲಿ, ಬಾಬರ್ ಅಜಂ, ಅಸಾದ್ ಶಫೀಕ್, ಮೊಹಮದ್ ರಿಜ್ವಾನ್, ಶಾದಾಬದ್ ಖಾನ್, ಯಾಸೀರ್ ಷಾ, ಮೊಹಮದ್ ಅಬ್ಬಾಸ್, ಶಾಹೀನ್ ಆಫ್ರಿದಿ, ನಸೀಮ್ ಷಾ.
10 : ಪಾಕಿಸ್ತಾನ ತಂಡ ಕಳೆದ 10 ವರ್ಷಗಳಿಂದ ಇಂಗ್ಲೆಂಡ್ ಎದುರು ಟೆಸ್ಟ್ ಸರಣಿ ಸೋತಿಲ್ಲ, 2010ರಲ್ಲಿ 1-3 ರಿಂದ ಕಡೇ ಬಾರಿಗೆ ಸರಣಿ ಸೋತಿತ್ತು. ಪಾಕ್ ಆತಿಥ್ಯದಲ್ಲಿ ಯುಎಇಯಲ್ಲಿ 2011-12, 2015-16ರಲ್ಲಿ ನಡೆದ ಎರಡೂ ಸರಣಿಗಳಲ್ಲಿ ಪಾಕಿಸ್ತಾನವೇ ಜಯ ದಾಖಲಿಸಿತ್ತು, 2016 ಹಾಗೂ 2018ರಲ್ಲಿ ಇಂಗ್ಲೆಂಡ್ ಪ್ರವಾಸ ಕೈಗೊಂಡಿದ್ದ ಪಾಕಿಸ್ತಾನ ಕ್ರಮವಾಗಿ 2-2, 1-1 ರಿಂದ ಸರಣಿಯಲ್ಲಿ ಸಮಬಲ ಸಾಧಿಸಿತ್ತು.
83: ಉಭಯ ತಂಡಗಳು ಇದುವರೆಗೂ 83 ಟೆಸ್ಟ್ ಪಂದ್ಯಗಳನ್ನಾಡಿದ್ದು, 21ರಲ್ಲಿ ಪಾಕಿಸ್ತಾನ, 25 ಪಂದ್ಯಗಳಲ್ಲಿ ಇಂಗ್ಲೆಂಡ್ ಜಯ ದಾಖಲಿಸಿದ್ದು, ಉಳಿದ 37 ಪಂದ್ಯಗಳು ಡ್ರಾಗೊಂಡಿವೆ.
25: ಎರಡು ತಂಡಗಳ ನಡುವೆ ಇದುವರೆಗೂ 25 ಸರಣಿಗಳು ನಡೆದಿದ್ದು, 8ರಲ್ಲಿ ಪಾಕ್, 9ರಲ್ಲಿ ಇಂಗ್ಲೆಂಡ್ ಹಾಗೂ 8 ಸರಣಿಗಳು ಡ್ರಾಗೊಂಡಿವೆ.
ಪಂದ್ಯ ಆರಂಭ: ಮಧ್ಯಾಹ್ನ 3.30ಕ್ಕೆ
ನೇರ ಪ್ರಸಾರ: ಸೋನಿ ಸಿಕ್ಸ್, ಜಿಯೋ ಟಿವಿ