ಮ್ಯಾಡ್ರಿಡ್ : ಕರೊನಾ COVID19 ವೈರಸ್ ಸೋಂಕು ಜಗತ್ತನ್ನು ಕಾಡುತ್ತಿರುವ ವೇಳೆ ಬಹುತೇಕ ಎಲ್ಲರೂ ಒಗ್ಗಟ್ಟಾಗಿ ಅದರ ವಿರುದ್ಧ ಹೋರಾಟ ನಡೆಸುತ್ತಿದ್ದಾರೆ. ಈ ಸಂಕಷ್ಟದ ನಡುವೆ ಅಲ್ಲಲ್ಲಿ ಕೆಲವು ಹೃದಯಸ್ಪರ್ಶಿ ಘಟನೆಗಳು, ಅನುಭವಗಳು ಅನೇಕರಿಗೆ ಆಗುತ್ತದೆ. ಅಂಥದ್ದೇ ಒಂದು ಅನುಭವ ಇದು. ಇದೊಂದು ರೀತಿಯಲ್ಲಿ ಪ್ರೇರಣೆಯೂ ಹೌದು..
ಸ್ಪೇನ್ನ ಮಲಗಾದಲ್ಲಿನ ರೀಜಿನಲ್ ಹಾಸ್ಪಿಟಲ್ನಲ್ಲಿ ನಡೆದ ಘಟನೆ ಇದು. ಕರೊನಾ ಸೋಂಕು ತಗುಲಿದ ನಾಲ್ಕು ತಿಂಗಳ ಪಾಪು ಈ ಘಟನೆಯ ಕೇಂದ್ರ ಬಿಂದು. ಈ ಗಂಡು ಮಗು ಮಾರ್ಬೆಲ್ಲಾದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿತ್ತು. ಸೋಂಕು ತೀವ್ರಗೊಂಡ ಕಾರಣ ಮಲಗಾದಲ್ಲಿನ ರೀಜನಲ್ ಹಾಸ್ಪಿಟಲ್ಗೆ ಮಗುವನ್ನು ಮಾರ್ಚ್ 16ರಂದು ಸ್ಥಳಾಂತರಿಸಲಾಗಿತ್ತು. ಮಗು ಉಸಿರಾಟದ ತೊಂದರೆ ಅನುಭವಿಸುತ್ತಿದ್ದ ಕಾರಣ ವೆಂಟಿಲೇಟರ್ ಸಪೋರ್ಟ್ ಒದಗಿಸಲಾಗಿತ್ತು. ಮಗುವಿನ ಆರೋಗ್ಯದಲ್ಲಿ ಸುಧಾರಣೆ ಕಂಡ ಬಳಿಕ ವೆಂಟಿಲೇಟರ್ ಅನ್ನು ತೆಗೆಯುತ್ತಿದ್ದ ಸಂದರ್ಭದಲ್ಲಿ ಆ ಹಾಸ್ಪಿಟಲ್ನ ಎಲ್ಲ ವೈದ್ಯ ಸಿಬ್ಬಂದಿ ಐಸಿಯು ಹೊರಗೆ ನಿಂತು ಚಿಯರ್ ಅಪ್ ಮಾಡಿದ್ದರು.
ಆ ಸಂದರ್ಭದ ವಿಡಿಯೋ ಕ್ಲಿಪ್ ಒಂದು ಇದೀಗ ವೈರಲ್ ಆಗಿದೆ. ಈ ಕುರಿತು ಹಾಸ್ಪಿಟಲ್ನ ಐಸಿಯು ಘಟಕದ ಮುಖ್ಯಸ್ಥ ಜೋಸ್ ಕಮಚೋ ಪ್ರತಿಕ್ರಿಯಿಸಿದ್ದು, ಮಗು ಚಿಕಿತ್ಸೆಗೆ ಉತ್ತಮ ರೀತಿಯಲ್ಲಿ ಸ್ಪಂದಿಸಿದೆ. ಇನ್ನು ಆ ಮಗುವಿನ ವೆಂಟಿಲೇಟರ್ ಸಪೋರ್ಟ್ನ ಅಗತ್ಯವಿಲ್ಲ. ಶೀಘ್ರವೇ ನಾರ್ಮಲ್ ವಾರ್ಡ್ಗೆ ಸ್ಥಳಾಂತರಿಸಲಾಗುವುದು ಎಂದು ಹೇಳಿದ್ದಾರೆ.
ಇತ್ತೀಚಿನ ಮಾಹಿತಿ ಪ್ರಕಾರ, ಸ್ಪೇನ್ನ ಜಾನ್ಸ್ ಹಾಪ್ಕಿನ್ಸ್ ಯೂನಿವರ್ಸಿಟಿಯಲ್ಲಿ 1,31,646 ಕರೊನಾ ಕೇಸ್ಗಳು ದಾಖಲಾಗಿವೆ. 12,641 ಸಾವು ಸಂಭವಿಸಿದ್ದರೆ, 38,050 ಜನ ಸೋಂಕು ಮುಕ್ತರಾಗಿದ್ದಾರೆ. ಕಳೆದ ತಿಂಗಳಷ್ಟೇ ಶಿಶುಗಳು ಮತ್ತು ಮಕ್ಕಳು ಕೂಡ ಈ ಸೋಂಕಿಗೆ ಒಳಗಾಗುವ ಸಾಧ್ಯತೆ ಇದೆ ಎಂದು ಎಚ್ಚರಿಸಿದ್ದರು. ಹೀಗಾಗಿ ಈ ಮಗುವಿನ ಬಗ್ಗೆ ಮಲಗಾದ ಹಾಸ್ಪಿಟಲ್ ಸಿಬ್ಬಂದಿ ಹೆಚ್ಚಿನ ಮುತುವರ್ಜಿ ವಹಿಸಿದ್ದರು. (ಏಜೆನ್ಸೀಸ್)