ಟ್ವಿಟರ್​ ಬರ್ಡ್​ಗೆ ವಿದಾಯ: ಲೋಗೋ ಬದಲಾಯಿಸಿ ರೀಬ್ರ್ಯಾಂಡ್​ ಮಾಡಲು ಎಲನ್​ ಮಸ್ಕ್​ ಪ್ಲ್ಯಾನ್​

ನವದೆಹಲಿ: ವಿಶ್ವದ ನಂ 1 ಶ್ರೀಮಂತ ಎಲನ್​ ಮಸ್ಕ್​ ಇಂದು (ಜುಲೈ 23) ಸ್ಫೋಟಕ ಮಾಹಿತಿಯೊಂದನ್ನು ಹಂಚಿಕೊಂಡಿದ್ದಾರೆ. ಟ್ವಿಟರ್​ ಮಾಲೀಕರಾಗಿರುವ ಮಸ್ಕ್​, ಟ್ವಿಟರ್​ ಜಾಲತಾಣ ವೇದಿಕೆಯಲ್ಲಿ ಮಹತ್ವದ ಬದಲಾವಣೆಗೆ ಮುಂದಾಗಿದ್ದಾರೆ. ಟ್ವಿಟರ್​ ಲೋಗೋ ಬದಲಾಯಿಸಿ, ಟ್ವಿಟರ್​ ಬರ್ಡ್​ಗೆ ವಿದಾಯ ಹೇಳುವ ಮೂಲಕ ಇಡೀ ವೇದಿಕೆಯನ್ನು ರೀಬ್ರ್ಯಾಂಡ್​ ಮಾಡಲು ಸಜ್ಜಾಗಿದ್ದಾರೆ.

ಟ್ವಿಟರ್ ಬರ್ಡ್​​ ಬದಲು ಎಕ್ಷ್​ (X) ಲೋಗೋ ಮೊರೆ ಹೋಗುವ ಸುಳಿವನ್ನು ವಿಡಿಯೋ ಮೂಲಕ ನೀಡಿದ್ದಾರೆ. ಶೀಘ್ರದಲ್ಲೇ ನಾವು ಟ್ವಿಟರ್ ಬ್ರಾಂಡ್‌ಗೆ ವಿದಾಯ ಹೇಳುತ್ತೇವೆ. ಇಂದು ರಾತ್ರಿ ಉತ್ತಮವಾದ ಎಕ್ಷ್​ ಲೋಗೋವನ್ನು ಪೋಸ್ಟ್​ ಮಾಡಿದ್ದಲ್ಲಿ, ನಾಳೆಯಿಂದ ಅದೇ ಲೋಗೋದೊಂದಿಗೆ ಮುಂದುವರಿಯಲಿದ್ದೇವೆ ಎಂದು ಮಸ್ಕ್​ ಟ್ವೀಟ್​ ಮೂಲಕ ತಿಳಿಸಿದ್ದಾರೆ. ಆದರೆ, ಈ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ಮಸ್ಕ್​ ಹಂಚಿಕೊಂಡಿಲ್ಲ.

ಇದನ್ನೂ ಓದಿ: 1 ದಿನದ ರಜೆಗೆ 500, ಇಷ್ಟದ ಡ್ಯೂಟಿಗೆ 10,000 ರೂಪಾಯಿ: ಕೆಲ KSRP ಅಧಿಕಾರಿಗಳ ಲಂಚಾವತಾರ ಬಯಲು

ಬಹಳ ಹಿಂದಿನಿಂದಲೂ ಮಸ್ಕ್​ ಅವರು ಎಕ್ಷ್​ ಎಂಬ ಹೆಸರನ್ನು ಮನಸ್ಸಿನಲ್ಲಿ ಇಟ್ಟುಕೊಂಡಿದ್ದರು. ಏಪ್ರಿಲ್​ನಲ್ಲಿ ಟ್ವಿಟರ್​ನ ಹೊಸ ಸಿಇಒ ಲಿಂಡಾ ಯಾಕರಿನೊ ಅವರನ್ನು ಸ್ವಾಗತಿಸುವಾಗ, ಟ್ವಿಟರ್​ ವೇದಿಕೆಯನ್ನು X ದಿ ಎವೆರಿಥಿಂಗ್​ ಆ್ಯಪ್​ ಆಗಿ ಪರಿವರ್ತಿಸಲು ಲಿಂಡಾ ಅವರೊಂದಿಗೆ ಕೆಲಸ ಮಾಡಲು ಎದುರು ನೋಡುತ್ತಿದ್ದೇನೆ ಎಂದು ಮಸ್ಕ್​ ಟ್ವೀಟ್​ ಮಾಡಿದ್ದರು.

ಮಸ್ಕ್​ ಅವರು ಕಳೆದ ವರ್ಷ ಟ್ವಿಟರ್​ ಅನ್ನು ಖರೀದಿ ಮಾಡಿ ಅನೇಕ ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡಿದ ಬಳಿಕ ಟ್ವಿಟರ್​ ನಿರಂತರವಾಗಿ ತಾಂತ್ರಿಕ ವೈಫಲ್ಯವನ್ನು ಅನುಭವಿಸುತ್ತಿದೆ. ಜಾಹೀರಾತು ಆದಾಯವು ಸ್ಥಿರವಾಗಿ ಕ್ಷೀಣಿಸುತ್ತಿರುವಾಗ ಸಾಮಾಜಿಕ ಜಾಲತಾಣ ಕಂಪನಿಯು ತನ್ನ ವೇದಿಕೆಯನ್ನು ಪುನರುಜ್ಜೀವನಗೊಳಿಸಲು ಅನೇಕ ಪ್ರಯತ್ನಗಳನ್ನು ಮಾಡುತ್ತಿದೆ.

ಈಗಲೂ ಟ್ವಿಟರ್​ ಕಂಪನಿ ಹಣವನ್ನು ಕಳೆದುಕೊಳ್ಳುತ್ತಿದ್ದು, ಜಾಹೀರಾತಿಗೆ ಪರ್ಯಾಯವಾದ ವ್ಯಾಪಾರ ಮಾದರಿಗಳೊಂದಿಗೆ ಬರಲು ಪ್ರಯತ್ನಿಸುತ್ತಿದೆ. ಟ್ವಿಟರ್​ ಬ್ಲ್ಯೂಟಿಕ್​ ಸಬ್​ಸ್ಕ್ರಿಪ್ಸನ್​ ಪರಿಚಯಿಸಿದೆ. ತಿಂಗಳಿಗೆ 8 ಡಾಲರ್​ ನೀಡಿ ಬ್ಲ್ಯೂಟಿಕ್​ ಪಡೆಯುವ ವ್ಯವಸ್ಥೆ ಇದಾಗಿದೆ. ಈಗಾಗಲೇ ಹಲವರು ಈ ಸೇವೆ ಪಡೆಯುತ್ತಿದ್ದು, ಇದರಿಂದ ಟ್ವಿಟರ್​ಗೆ ಕೊಂಚ ಹಣ ಬರುತ್ತಿದೆ. ಈ ತಿಂಗಳಿಂದ ಟ್ವಿಟರ್​ ಕಂಪನಿ ಕೆಲವು ಟ್ವಿಟರ್​ ಚಂದಾದಾರರಿಗೆ ಜಾಹೀರಾತು ಆದಾಯದ ಪಾಲನ್ನು ಪಾವತಿಸಲು ಪ್ರಾರಂಭಿಸಿತು.

ಇದನ್ನೂ ಓದಿ: SSLC ಫೇಲಾದ ಬಳಿಕ ಕೃಷಿಯತ್ತ ಮುಖ: ಕೈಹಿಡಿದ ಟೊಮ್ಯಾಟೋ, ಒಂದೇ ತಿಂಗಳಲ್ಲಿ 1.8 ಕೋಟಿ ರೂ. ಲಾಭ

ಮಸ್ಕ್​ ಅವರು ಹೊಸ ಕೃತಕ ಬುದ್ಧಿಮತ್ತೆ ಕಂಪನಿ xAI ಘೋಷಣೆ ಮಾಡಿದ ದಿನದ ಬೆನ್ನಲ್ಲೇ ಟ್ವಿಟರ್​ ರೀಬ್ರ್ಯಾಂಡ್​ ಮಾತನ್ನು ಆಡಿದ್ದಾರೆ. OpenAI ಮತ್ತು Google ನಂತಹ ಕಂಪನಿಗಳು ಮಾನವರಿಗೆ ಆಗುವ ಅಪಾಯಗಳನ್ನು ಪರಿಗಣಿಸದೇ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುತ್ತಿವೆ ಎಂದು ಆರೋಪಿಸಿದ ಬೆನ್ನಲ್ಲೇ xAI ಕಂಪನಿಯನ್ನು ಘೋಷಿಸಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಈ xAI ಬ್ರಹ್ಮಾಂಡವನ್ನು ಅರ್ಥಮಾಡಿಕೊಳ್ಳಲು ನೆರವಾಗುತ್ತದೆ ಎಂದಿದ್ದಾರೆ. (ಏಜೆನ್ಸೀಸ್​)

https://www.vijayavani.net/demonstration-of-people-troubled-by-new-traffic-rules-and-e-challan-in-patna-cremation-of-bike

https://www.vijayavani.net/8-patients-die-in-andhra-government-hospital-kin-claim-lack-of-oxygen-supply

https://www.vijayavani.net/failed-in-sslc-started-farming-reaped-a-profit-of-rs-1