ಬೆಂಗಳೂರು: ನೀವು ಗೂಗಲ್ ತೆರೆದಾಗ ಅಲ್ಲೊಂದು ಡೂಡಲ್ ಕಾಣಿಸುತ್ತಲ್ವಾ? ಅದು ದಿನವೂ ಇರೋದಿಲ್ಲ. ಕೆಲವು ವಿಶೇಷ ಸಂದರ್ಭಗಳಲ್ಲಿ ಮಾತ್ರ ಇರುವುದು. ಇವತ್ತು (ನ.14) ಗೂಗಲ್ ನ ಡೂಡಲ್ ಕೊಲ್ಕತ್ತಾದ ಹುಡುಗ ಬಿಡಿಸಿದ್ದು ಇಡೀ ದಿನ ಕಾಣಿಸಲಿದೆ.
ಇತ್ತೀಚೆಗೆ ಗೂಗಲ್ ಸಂಸ್ಥೆ ಮಕ್ಕಳ ದಿನಾಚರಣೆ ಅಂಗವಾಗಿ ಭಾರತದಲ್ಲಿ ‘Doodle For Google’ ಎನ್ನುವ ಸ್ಪರ್ಧೆ ಏರ್ಪಡಿಸಿತ್ತು. ಸ್ಪರ್ಧೆಯ ವಸ್ತು ‘ಮುಂದಿನ 25 ವರ್ಷಗಳಲ್ಲಿ ನನ್ನ ಭಾರತ…’ ಎನ್ನುವುದಾಗಿತ್ತು. ಈ ಸ್ಪರ್ಧೆಯಲ್ಲಿ ಒಂದನೇ ತರಗತಿಯಿಂದ ಹತ್ತನೇ ತರಗತಿಯ ಮಕ್ಕಳಿಗೆ ಭಾಗವಹಿಸಲು ಅವಕಾಶ ಕಲ್ಪಿಸಲಾಗಿತ್ತು. ಅದರಲ್ಲಿ ದೇಶದ ನೂರಕ್ಕೂ ಹೆಚ್ಚು ನಗರಗಳಿಂದ ಒಂದು ಲಕ್ಷಕ್ಕೂ ಹೆಚ್ಚಿನ ಸಂಖ್ಯೆಯಲ್ಲಿ ಮಕ್ಕಳು ಭಾಗವಹಿಸಿದ್ದರು. ಅಷ್ಟು ಕಠಿಣ ಸ್ಪರ್ಧೆಯಲ್ಲಿ ಕೊಲ್ಕತ್ತಾದ ಶ್ಲೋಕ್ ಮುಖರ್ಜಿ ಎನ್ನುವ ಹುಡುಗ ಪ್ರಥಮ ಸ್ಥಾನವನ್ನು ಪಡೆದಿದ್ದಾನೆ.
ಶ್ಲೋಕ್ ಮುಖರ್ಜಿ ತಮ್ಮ ಚಿತ್ರದಲ್ಲಿ ಯೋಗ, ಮಾನವ ಮತ್ತು ತಂತ್ರಜ್ಞಾನ ನಡುವಿನ ಸಂಬಂಧ, ಬಾಹ್ಯಾಕಾಶದಲ್ಲಿ ಸಾಧನೆ, ಪ್ರಕೃತಿ, ಆಯುರ್ವೇದ ಮುಂತಾದ ವಿಷಯಗಳನ್ನು ತನ್ನ ಡೂಡಲ್ನಲ್ಲಿ ಸೇರಿಸಿದ್ದಾನೆ.
‘ಟಿಂಕಲ್ ಕಾಮಿಕ್ಸ್ನ ಸಂಪಾದಕರೂ ಸೇರಿದ್ದ ತೀರ್ಪುಗಾರರ ತಂಡ ಇಪ್ಪತ್ತು ಡೂಡಲ್ಗಳನ್ನು ಕೊನೆಯ ಹಂತಕ್ಕೆ ಆಯ್ಕೆ ಮಾಡಿತ್ತು. ಕಡೆಗೆ ಆನ್ಲೈನ್ ವೋಟಿಂಗ್ ಮುಖಾಂತರ ಅತ್ಯುತ್ತಮ ಚಿತ್ರವನ್ನು ಆಯ್ಕೆ ಮಾಡಲಾಯಿತು’ ಎಂದು ಗೂಗಲ್ ಸಂಸ್ಥೆ ಮಾಹಿತಿ ನೀಡಿತು. (ಏಜೆನ್ಸೀಸ್)