ನವದೆಹಲಿ: ಎರಡು ಚೀನೀ ಕಂಪನಿಗಳು ಪೂರೈಸುವ COVID19 ಟೆಸ್ಟ್ ಕಿಟ್ಗಳನ್ನು ಬಳಸಬೇಡಿ ಎಂದು ದ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ರಾಜ್ಯ ಸರ್ಕಾರಗಳಿಗೆ ತಿಳಿಸಿದೆ. ಒಂದೊಮ್ಮೆ ಈಗಾಗಲೇ ಈ ಕಂಪನಿಗಳಿಂದ ಟೆಸ್ಟ್ ಕಿಟ್ಗಳನ್ನು ತರಿಸಿಕೊಂಡಿದ್ದಲ್ಲಿ ಬಳಸಬೇಡಿ ಎಂದೂ ಎಚ್ಚರಿಸಿದೆ.
ಗುವಾಂಗ್ಝು ವೊಂಡ್ಫೋ ಬಯೋಟೆಕ್ ಮತ್ತು ಝುಹೈ ಲಿವ್ಝೋನ್ ಡಯಾಗ್ನಾಸ್ಟಿಕ್ಸ್ ಎಂಬ ಎರಡು ಕಂಪನಿಗಳ ವಿಚಾರವನ್ನು ಐಸಿಎಂಆರ್ ಪ್ರತ್ಯೇಕವಾಗಿ ಸೂಚಿಸಿದೆ. ಈ ಕಂಪನಿಗಳು ಪೂರೈಸುವ ರಾಪಿಡ್ ಆ್ಯಂಟಿಬಾಡಿ ಬ್ಲಡ್ ಟೆಸ್ಟ್ ಕಿಟ್ಗಳ ವಿಚಾರವನ್ನೂ ಐಸಿಎಂಆರ್ ಉಲ್ಲೇಖಿಸಿದೆ.
COVID19 ಡಯಾಗ್ನೋಸಿಸ್ ಮಾಡಲು ಆರ್ಟಿ-ಪಿಸಿಆರ್ ಥ್ರೋಟ್/ನಾಸಲ್ ಸ್ವೆಟ್ ಟೆಸ್ಟ್ ಅತ್ಯುತ್ತಮವಾದುದು. ಮುಂಚಿತವಾಗಿಯೇ ವೈರಸ್ನ ಇರುವಿಕೆಯನ್ನು ಈ ಟೆಸ್ಟ್ ಪತ್ತೆ ಹಚ್ಚುತ್ತದೆ. ಅಲ್ಲದೆ, ಸೋಂಕು ತಗುಲಿರುವ ವ್ಯಕ್ತಿಯನ್ನು ಮುಂಚಿತವಾಗಿಯೇ ಗುರುತಿಸಿ ಅವರನ್ನು ಪ್ರತ್ಯೇಕವಾಗಿ ಐಸೋಲೇಷನ್ ವಾರ್ಡ್ನಲ್ಲಿ ಇರಿಸಲು ಇದು ಸಹಕಾರಿ ಎಂದು ಐಸಿಎಂಆರ್ ಸಲಹಾ ಮಾರ್ಗಸೂಚಿಯಲ್ಲಿ ತಿಳಿಸಿದೆ.
ಅವರವರ ಬೇಡಿಕೆಗೆ ಅನುಗುಣವಾಗಿ ಆಯಾ ರಾಜ್ಯಗಳು ತಮಗೆ ಬೇಕಾದ ಆ್ಯಂಟಿಬಾಡಿ ಟೆಸ್ಟ್ ಕಿಟ್ಗಳನ್ನು ಸಂಗ್ರಹಿಸಿಕೊಂಡಿವೆ. ಐಸಿಎಂಆರ್ ಕೂಡ ಕೆಲವು ರಾಜ್ಯಗಳಿಗೆ ಇಂತಹ ಕಿಟ್ಗಳನ್ನು ಪೂರೈಸಿದೆ. ಈ ಕಿಟ್ಗಳನ್ನು ನಿಗಾ ಉದ್ದೇಶಕ್ಕೆ ಮಾತ್ರವೇ ಬಳಸಬೇಕೆಂಬ ಸೂಚನೆಯನ್ನೂ ಐಸಿಎಂಆರ್ ನೀಡಿದೆ. ಟೆಸ್ಟಿಂಗ್ ಸಂದರ್ಭದಲ್ಲಿ ಉಂಟಾಗಿರುವ ಸಮಸ್ಯೆಗಳ ಕುರಿತು ಕೆಲವು ರಾಜ್ಯಗಳು ಸ್ವರ ಎತ್ತಿವೆ. ಈ ಹಿನ್ನೆಲೆಯಲ್ಲಿ ಕಿಟ್ಗಳನ್ನು ಪರಿಶೀಲಿಸಲಾಗಿದ್ದು, ಇದರಂತೆ ಗುವಾಂಗ್ಝು ವೊಂಡ್ಫೋ ಬಯೋಟೆಕ್ ಮತ್ತು ಝುಹೈ ಲಿವ್ಝೋನ್ ಡಯಾಗ್ನಾಸ್ಟಿಕ್ಸ್ ಎಂಬ ಎರಡು ಕಂಪನಿಗಳ ಕಿಟ್ಗಳು ನಿಗಾ ವ್ಯವಸ್ಥೆಗೆ ಪೂರಕವಾಗಿ ಬಳಸಲು ಸೂಕ್ತವಲ್ಲ ಎಂಬುದು ಪತ್ತೆಯಾಗಿದೆ ಎಂದು ಐಸಿಎಂಆರ್ ತಿಳಿಸಿದೆ. (ಏಜೆನ್ಸೀಸ್)