ಬೆಂಗಳೂರು: ಚೀನಾ ನಿರ್ಮಿತ ಎಂದಾಗ ಅದರ ವಿಶ್ವಾಸಾರ್ಹತೆಯೇ ಪ್ರಶ್ನೆಗೊಳಗಾಗುತ್ತದೆ. ಹೀಗಿದ್ದರೂ ಜನರು ಅದರ ಬೆನ್ನು ಬೀಳುವುದನ್ನು ಬಿಡುವುದಿಲ್ಲ. ಸದ್ಯಕ್ಕೆ ಚೀನಾ ಮೂಲದ ಝೂಮ್ ಆ್ಯಪ್ ಕೂಡ ವಿವಾದಕ್ಕೊಳಗಾಗಿದೆ.
ಲಾಕ್ಡೌನ್ ಸಮಯದಲ್ಲಿ ಈ ಆ್ಯಪ್ ಬಳಕೆದಾರರ ಸಂಖ್ಯೆ ಒಂದು ಕೋಟಿಯಿಂದ 20 ಕೋಟಿಗೆ ಏರಿರುವುದು ಇದರ ಜನಪ್ರಿಯತೆಗೆ ಸಾಕ್ಷಿ. ಆದರೆ, ಆ್ಯಪ್ ಸುರಕ್ಷಿತವಲ್ಲ ಎಂದು ಕೇಂದ್ರ ಸರ್ಕಾರವೇ ಸ್ಪಷ್ಟಪಡಿಸಿದೆ. ಕೇಂದ್ರದ ಸೈಬರ್ ಸೆಕ್ಯುರಿಟಿ ನೋಡಲ್ ಏಜೆನ್ಸಿಯಾಗಿರುವ ಕಂಪ್ಯೂಟರ್ ಎಮರ್ಜೆನ್ಸಿ ರೆಸ್ಪಾನ್ಸ್ ಟೀಮ್- ಇಂಡಿಯಾ (CERT-IN) ಇದರಲ್ಲಿನ ಮಾಹಿತಿಗಳು ಸೋರಿಕೆಯಾಗುತ್ತಿವೆ. ಬಳಕೆಮಾಡುವ ಸಂದರ್ಭದಲ್ಲಿಯೇ ಇದನ್ನು ಹ್ಯಾಕ್ ಮಾಡಲಾಗುತ್ತಿದೆ ಎಂದು ಹೇಳಿದೆ. ಹೀಗಾಗಿ ಸರ್ಕಾರಿ ಉದ್ದೇಶಗಳಿಗೆ ಇದನ್ನು ಬಳಸದಿರುವಂತೆ ಸೂಚಿಸಿತ್ತು. ಜತೆಗೆ, ಅನಿವಾರ್ಯವಾಗಿ ಬಳಕೆ ಮಾಡುತ್ತಿರುವವರು ಕೆಲ ಮುನ್ನೆಚ್ಚರಿಕೆ ಕೈಗೊಳ್ಳುವಂತೆ ಮಾರ್ಗದರ್ಶಿ ಸೂತ್ರಗಳನ್ನು ಬಿಡುಗಡೆ ಮಾಡಿದೆ.
ಇದರ ಬೆನ್ನಲ್ಲೇ, ರಾಜ್ಯದ ತಾಂತ್ರಿಕ ಶಿಕ್ಷಣ ಇಲಾಖೆ ಕೂಡ ಸುತ್ತೋಲೆ ಹೊರಡಿಸಿದ್ದು, ಆನ್ಲೈನ್ ಪಾಠ, ಪಠ್ಯ ಸಾಮಗ್ರಿ ತಯಾರಿಕೆ ಹಂಚಿಕೆ ಮೊದಲಾದ ಉದ್ದೇಶಗಳಿಗಾಗಿ ಬೋಧಕರಿಗೆ ಝೂಮ್ ಆ್ಯಪ್ ಬಳಸದಂತೆ ನಿರ್ದೇಶಿಸಿದೆ. ಕೇಂದ್ರ ಸರ್ಕಾರದ ಸೂಚನೆಯನ್ವಯ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿಸಿದೆ.
ಇದರ ಬದಲಾಗಿ ದೇಶೀಯವಾಗಿ ತಯಾರಿಸಲಾಗಿರುವ ಟಿಸಿಎಸ್ ಐಆನ್ ಡಿಜಿಟಲ್ ಕ್ಲಾಸ್ ರೂಮ್ ಆ್ಯಪ್ ಬಳಸಬಹುದೆಂದು ಸೂಚಿಸಿದೆ.
ಬೋಧಕರು ಆನ್ಲೈನ್ನಲ್ಲಿ ಮಾಡುತ್ತಿರುವ ಪಾಠಗಳು, ವಿಷಯ, ಅದಕ್ಕೆ ಬಳಸುತ್ತಿರುವ ಆ್ಯಪ್ ಮೊದಲಾದವುಗಳ ಬಗ್ಗೆ ಇಲಾಖೆ ಮಾಹಿತಿ ಕೇಳಿತ್ತು. ಆಗ ಬಹುತೇಕರು ಝೂಮ್ ಆ್ಯಪ್ ಬಳಸುತ್ತಿರುವ ಬಗ್ಗೆ ವಿವರ ನೀಡಿದ್ದರು.
ಆನ್ಲೈನ್ ಪಾಠದ ಹೆಸರಲ್ಲಿ ಶುಲ್ಕ ವಸೂಲಿಗೆ ನಡೆಯುತ್ತಿದೆ ತಂತ್ರ, ಶಿಕ್ಷಣ ಸಂಸ್ಥೆಗಳಿಗೆ ಇಲಾಖೆ ನೀಡಿರುವ ಎಚ್ಚರಿಕೆ ಏನು?