ನವದೆಹಲಿ: ಹಿಮಾಲಯದ ಗಡಿಗಳಲ್ಲಿ ನಡೆಯುತ್ತಿರುವ ಅಪ್ರಚೋದಿತ ಆಕ್ರಮಣಗಳು ಜಗತ್ತು ಬದಲಾಗುತ್ತಿರುವ ಸೂಚನೆಯಾಗಿದೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ವಿಶ್ಲೇಷಿಸಿದರು. ಇಡೀ ಇಂಡೊ-ಪೆಸಿಫಿಕ್ ವಲಯದಲ್ಲಿ ಹೇಗೆ ಅಧಿಕಾರದ ಪಾರಮ್ಯ ಸಾಧಿಸಲು ದರ್ಪವನ್ನು ಮೆರೆಯಲಾಗುತ್ತಿದೆ ಎನ್ನುವುದನ್ನೂ ಅವು ತೋರಿಸುತ್ತವೆ ಎಂದು ಚೀನಾ ವಿರುದ್ಧ ಚಾಟಿ ಬೀಸಿದರು. ಭಾರತೀಯ ವಾಣಿಜ್ಯೋದ್ಯಮದ ಮಹಾ ಒಕ್ಕೂಟದ (ಎಫ್ಐಸಿಸಿಐ) 95ನೇ ವಾರ್ಷಿಕ ಮಹಾ ಸಭೆಯಲ್ಲಿ ಸೋಮವಾರ ಮಾತನಾಡಿದ ಅವರು, ಪೂರ್ವ ಲಡಾಖ್ನಲ್ಲಿ ವಾಸ್ತವ ಗಡಿ ರೇಖೆಯಲ್ಲಿ (ಎಲ್ಎಸಿ) ಆಕ್ರಮಣ ನಡೆಸಿದ ಚೀನಾದ ಸೈನಿಕರನ್ನು ಭಾರತದ ಯೋಧರು ಅತ್ಯಂತ ದಿಟ್ಟತನದಿಂದ ಎದುರಿಸಿ ಹಿಮ್ಮೆಟ್ಟಿಸಿದ್ದಾರೆ. ಯಾವುದೇ ಸವಾಲು ಸ್ವೀಕರಿಸಲು ನಮ್ಮ ಸೇನೆ ಸಿದ್ಧವಿದೆ ಎಂದಿದ್ದಾರೆ.
ಜೂನ್ 15ರಂದು ಗಾಲ್ವನ್ ಕಣಿವೆಯಲ್ಲಿ ನಡೆದ ಕಾಳಗವನ್ನು ಉಲ್ಲೇಖಿಸಿದ ಸಿಂಗ್, ಈ ಸಂಘರ್ಷದಲ್ಲಿ ಭಾರತದ 20 ಯೋಧರು ಹುತಾತ್ಮರಾಗಿದ್ದಾರೆ. ನಮ್ಮ ಸಶಸ್ತ್ರ ಪಡೆಗಳು ಮಾಡಿದ ಸಾಧನೆ ಬಗ್ಗೆ ಮುಂದಿನ ತಲೆಮಾರಿನವರು ಹೆಮ್ಮೆ ಪಡಲಿದ್ದಾರೆ. ಲಡಾಖ್ನ ಎಲ್ಎಸಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಸಶಸ್ತ್ರ ಪಡೆಗಳು ಜಮಾವಣೆಗೊಂಡಿವೆ. ಇಂಥ ಪರೀಕ್ಷಾ ಸಮಯದಲ್ಲಿ ನಮ್ಮ ಯೋಧರು ಅಭೂತಪೂರ್ವ ಧೈರ್ಯ ತೋರಿದ್ದಾರೆ ಎಂದರು.
ಎದುರಾಗುವ ಯಾವುದೇ ಪರಿಸ್ಥಿತಿಯನ್ನು ನಿಭಾಯಿಸಲು ಭಾರತ ಸನ್ನದ್ಧವಾಗಿದೆ. ಪ್ರತಿಯೊಂದು ದೇಶವೂ ವ್ಯೂಹಾತ್ಮಕ ಹಿತದ ಆಧಾರದಲ್ಲಿ ಭದ್ರತೆಯನ್ನು ಖಾತರಿಪಡಿಸಿಕೊಳ್ಳುತ್ತವೆ.
| ಜನರಲ್ ಬಿಪಿನ್ ರಾವತ್ ಮೂರೂ ಪಡೆಗಳ ಪ್ರಧಾನ ದಂಡ ನಾಯಕ (ಸಿಡಿಎಸ್)