ಲಂಡನ್: ಬ್ರಿಟನ್ನ ಮಾಜಿ ಪ್ರಧಾನಿ ಡೇವಿಡ್ ಕ್ಯಾಮರೂನ್ ಅವರ ಪಾಸ್ಪೋರ್ಟ್ ಮತ್ತು ಲೋಡೆಡ್ ಪಿಸ್ತೂಲ್ ಒಂದನ್ನು ವಿಮಾನದಲ್ಲಿ ಪ್ರಯಾಣಿಕರೊಬ್ಬರು ಪತ್ತೆ ಹಚ್ಚಿದ್ದು, ಕ್ಯಾಮರೂನ್ ಅವರ ಬಾಡಿಗಾರ್ಡ್ ಅವುಗಳನ್ನು ಮರೆತು ಹೋಗಿದ್ದ ಎಂದು ಬ್ರಿಟೀಷ್ ಮಾಧ್ಯಮಗಳು ಬುಧವಾರ ವರದಿ ಮಾಡಿವೆ.
ಬ್ರಿಟನ್ ಮೆಟ್ರೋಪಾಲಿಟನ್ ಪೊಲೀಸ್ ಭದ್ರತಾ ಅಧಿಕಾರಿಯೊಂದಿಗೆ ನ್ಯೂಯಾರ್ಕ್ನಿಂದ ಲಂಡನ್ಗೆ ಮರಳುವಗ ಈ ಘಟನೆ ನಡೆದಿದೆ.
ಟೇಕಾಫ್ ಆಗಲು ಕಾಯುತ್ತಿದ್ದ ಬ್ರಿಟೀಷ್ ಏರ್ವೇಸ್ ವಿಮಾನದಲ್ಲಿದ್ದ ಪ್ರಯಾಣಿಕನೊಬ್ಬ ಶೌಚಗೃಹದಲ್ಲಿದ ಗನ್ ಅನ್ನು ಪತ್ತೆ ಹಚ್ಚಿದ್ದಾನೆ. ಇದರಿಂದಾಗಿ ಕೆಲಕಾಲ ವಿಮಾನದಲ್ಲೇ ಗದ್ದಲ ಉಂಟಾಯಿತು. ಇದೇ ವೇಳೆ ವಿಮಾನದ ಕ್ಯಾಪ್ಟನ್ ಗನ್ ಇರುವುದನ್ನು ಖಚಿತಪಡಿಸುತ್ತಿದ್ದಂತೆ ಮತ್ತಷ್ಟು ಗದ್ದಲಕ್ಕೆ ಎಡೆಮಾಡಿಕೊಟ್ಟಿತು ಎಂದು ಪ್ರಯಾಣಿಕರೊಬ್ಬರು ನೀಡಿದ ಹೇಳಿಕೆಯನ್ನು ಸನ್ ನ್ಯೂಸ್ಪೇಪರ್ ವರದಿ ಮಾಡಿದೆ.
ಕ್ಯಾಮರೂನ್ ಅವರ ಭದ್ರತಾ ಅಧಿಕಾರಿ ಗನ್ ಅನ್ನು ವಿಮಾನದೊಳಕ್ಕೆ ತಂದು ಮರೆತು ಹೋಗಿದ್ದಾರೆ. ಅದನ್ನು ಅವರಿಗೆ ಹಿಂದಿರುಗಿಸಲಾಗುವುದು ಎಂದು ವಿಮಾನದ ಕ್ಯಾಪ್ಟನ್ ಹೇಳಿದರಾದರೂ ಅನೇಕ ಪ್ರಯಾಣಿಕರು ಇದನ್ನು ವಿರೋಧಿಸಿದರು. ಟೇಕಾಫ್ ಆಗುವ ಮುನ್ನ ಗನ್ ಅನ್ನು ತೆಗೆಯುವಂತೆ ಒತ್ತಾಯಿಸಿದರು.
ಈ ಬಗ್ಗೆ ಮಾತನಾಡಿರುವ ಮೆಟ್ರೋಪಾಲಿಟನ್ ಪೊಲೀಸ್, ಈ ವಿಚಾರವನ್ನು ತುಂಬಾ ಗಂಭೀರವಾಗಿ ತೆಗೆದುಕೊಂಡಿದ್ದು, ಆಂತರಿಕ ತನಿಖೆ ನಡೆಸುವುದಾಗಿ ತಿಳಿಸಿದ್ದು, ಭದ್ರತಾ ಅಧಿಕಾರಿಯನ್ನು ಸದ್ಯ ಕರ್ತವ್ಯದಿಂದ ತೆಗೆದು ಹಾಕಿರುವುದಾಗಿ ಮಾಹಿತಿ ನೀಡಿದೆ. (ಏಜೆನ್ಸೀಸ್)