ಎಡಿನ್ಬರ್ಗ್: ಎಲ್ಲರ ನಡುವೆ ಸುಂದರವಾಗಿ ಕಾಣಬೇಕೆಂಬ ಆಸೆ ಎಲ್ಲರಿಗೂ ಇದ್ದೇ ಇರುತ್ತದೆ. ಅದಕ್ಕಾಗಿ ನಾನಾ ಪ್ರಯತ್ನ ಮಾಡುವುದನ್ನು ಸಹ ನೋಡಿದ್ದೇವೆ. ಆದರೆ, ಕೆಲವೊಮ್ಮೆ ತಿಳಿಯದೇ ಮಾಡುವ ಕೆಲಸ ಎಂಥಾ ಅವಾಂತರ ಸೃಷ್ಟಿಸುತ್ತದೆ ಎಂಬುದಕ್ಕೆ ಈ ಒಂದು ಘಟನೆ ಉದಾಹರಣೆಯಾಗಿದೆ.
ಇಡೀ ಮುಖಕ್ಕೆ ಪೀಲ್-ಆಫ್ ಫೇಸ್ ಮಾಸ್ಕ್ ಹಚ್ಚಿಕೊಂಡ ವ್ಯಕ್ತಿಯೊಬ್ಬ ಕೊನೆಗೆ ಮಾಸ್ಕ್ ತೆಗೆಯುವಾಗ ಕಣ್ಣಿನ ರೆಪ್ಪೆಗಳು ಮತ್ತು ಕಣ್ಣಿನ ಹುಬ್ಬು ಕೂಡು ಕಿತ್ತುಬಂದಿದ್ದು, ಅದನ್ನು ನೋಡಿದ ಆತನ ಪತ್ನಿ ಮತ್ತು ಮಗಳು ಕಣ್ಣಲ್ಲಿ ನೀರು ಬರುವಷ್ಟು ನಗೆಗಡಲಲ್ಲಿ ತೇಲಾಡಿದ್ದಾರೆ.
ಅಂದಹಾಗೆ ಈ ಅನಿರೀಕ್ಷಿತ ಪ್ರಸಂಗ ನಡೆದಿರುವುದು ಸ್ಕಾಟ್ಲ್ಯಾಂಡ್ನ ಇರ್ವಿನ್ ನಗರದಲ್ಲಿ. ಇಲ್ಲಿನ ನಿವಾಸಿ ಜಾನ್ ಮೀಚನ್, ಫೇಸ್ ಮಾಸ್ಕ್ ಹಚ್ಚಿಕೊಳ್ಳಲು ಸಹಾಯ ಮಾಡುವಂತೆ ಪತ್ನಿ ಟ್ರೇಸಿ ಡೌಗಲ್ ಸಹಾಯ ಕೇಳಿದ್ದಾರೆ. ಆದರೆ, ಆಕೆ ನಿರಾಕರಿಸಿದಾಗ ತಾನೇ ಹಚ್ಚಿಕೊಳ್ಳಲು ಮುಂದಾಗಿದ್ದಾರೆ.
ಇದನ್ನೂ ಓದಿ: ಪೊಲೀಸ್ ಎಂದು ಜೀಪ್ನಲ್ಲಿ ಬಂದ ಆರು ಜನ ಮಾಡಬಾರದ್ದನ್ನ ಮಾಡಿ ಸಿಕ್ಕಿಬಿದ್ದರು!
ಕಣ್ಣಿನ ರೆಪ್ಪೆ ಮತ್ತು ಹುಬ್ಬು ಬಿಟ್ಟು ಹುಷಾರಾಗಿ ಹಚ್ಚಿಕೊಳ್ಳುವಂತೆ ಪತ್ನಿ ಸಲಹೆ ನೀಡಿದರೂ ಅದನ್ನು ಅರ್ಥ ಮಾಡಿಕೊಳ್ಳದ ವ್ಯಕ್ತಿ ಇಡೀ ಮುಖಕ್ಕೆ ಕಪ್ಪು ಬಣ್ಣದ ಫೇಸ್ ಮಾಸ್ಕ್ ಹಚ್ಚಿದ್ದಾರೆ. ತುಂಬಾ ಹೊತ್ತು ಫೇಸ್ ಮಾಸ್ಕ್ ಮುಖದಲ್ಲಿ ಬಿಟ್ಟು ಸಮಯವಾದ ಬಳಿಕ ಅದನ್ನು ತೆಗೆಯಲು ಮುಂದಾದಾಗ, ಜಾನ್ ಕೈಯಲ್ಲಿ ಸಾಧ್ಯವಾಗಿಲ್ಲ. ಬಳಿಕ ಪತ್ನಿ ಮತ್ತು ಮಗಳ ಸಹಾಯದಿಂದ ಮಾಸ್ಕ್ ತೆಗೆದಿದ್ದಾರೆ.
ತೆಗೆಯುವಾಗ ಮಾಸ್ಕ್ ಜತೆಯಲ್ಲೇ ಕಣ್ಣಿನ ರೆಪ್ಪೆಗಳು ಮತ್ತು ಹುಬ್ಬು ಸಹ ಕಿತ್ತುಕೊಂಡು ಬಂದು ಇಡೀ ಮುಖ ಮರೂಭೂಮಿಯಂತೆ ಒಂದು ಕೂದಲಿಲ್ಲದೆ ಕಾಣುವುದನ್ನು ನೋಡಿ ಪತ್ನಿ, ಮಗಳು ಹೊಟ್ಟೆ ಹುಣ್ಣಾಗುವಷ್ಟು ನಕ್ಕಿದ್ದಾರೆ. ಅಲ್ಲದೆ, ತನ್ನ ಮುಖ ತಾನೇ ನೋಡಿಕೊಂಡ ಜಾನ್ಗೆ ಒಂದು ರೀತಿಯ ಶಾಕ್ ಜತೆಗೆ ಏನು ಮಾಡಬೇಕೆಂದು ತಿಳಿಯದೇ ಮಾಸ್ಕ್ ತೆಗೆಯುವಾಗ ಆದ ನೋವಿನಿಂದಲೇ ಪತ್ನಿ, ಮಗಳನ್ನು ನೋಡಿ ಸುಮ್ಮನಾದ ವಿಡಿಯೋ ವೈರಲ್ ಆಗಿದೆ.
ಕೊನೆಯಲ್ಲಿ ನೀರಿನಿಂದ ಮುಖವನ್ನು ಸಂಪೂರ್ಣ ತೊಳೆದುಕೊಂಡು ಕನ್ನಡಿಯಲ್ಲಿ ಮುಖವನ್ನು ನೋಡಿ ತುಂಬಾ ವಿಚಿತ್ರ ಅನಿಸಿತು. ಆದಷ್ಟು ಬೇಗ ಹುಬ್ಬು ಮತ್ತು ಕಣ್ಣಿನ ರೆಪ್ಪೆಗಳು ಬೆಳೆದರೆ ಸಾಕೆನಿಸಿತು ಎಂದು ಜಾನ್ ತಿಳಿಸಿದ್ದಾರೆ. (ಏಜೆನ್ಸೀಸ್)
(ವಿಡಿಯೋ ಕೃಪೆ: ಡೈಲಿ ಮಿರರ್)
VIDEO| ಈ ರೀತಿಯ ಮ್ಯಾಜಿಕ್ ಶೋ ನೀವು ಖಂಡಿತ ನೋಡಿರುವುದಿಲ್ಲ, ಮಿಸ್ ಮಾಡ್ಬೇಡಿ!