ಆನೇಕಲ್: ಐವತ್ತಕ್ಕೂ ಅಧಿಕ ಜನರಿಂದ ಚೀಟಿ ಕಟ್ಟಿಸಿಕೊಂಡು, ಕೋಟಿಗಟ್ಟಲೆ ರೂ. ವಂಚನೆ ಮಾಡಿರುವ ಆರೋಪ ದಂಪತಿ ವಿರುದ್ಧ ಕೇಳಿ ಬಂದಿದ್ದು, ಪರಾರಿಯಾಗಿರು ಗಂಡ-ಹೆಂಡತಿ ವಿರುದ್ಧ ಪೊಲೀಸರಿಗೆ ದೂರು ಕೂಡ ಕೊಡಲಾಗಿದೆ.
ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಆನೇಕಲ್ ತಾಲೂಕಿನ ಬನ್ನೇರುಘಟ್ಟದಲ್ಲಿ ಈ ವಂಚನೆ ಪ್ರಕರಣ ನಡೆದಿದೆ. ಚೀಟಿ ವ್ಯವಹಾರ ನಡೆಸುತ್ತಿದ್ದ ಬನ್ನೇರುಘಟ್ಟ ನಿವಾಸಿ ಪೌಲಿನಾ ಹಾಗೂ ಮಂಜುನಾಥ್ ಪರಾರಿಯಾಗಿರುವ ದಂಪತಿ. ಇವರಿಬ್ಬರ ವಿರುದ್ಧ ಬನ್ನೇರುಘಟ್ಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಬಹುತೇಕ ಬಡವರಿಂದಲೇ ಚೀಟಿ ಹಾಕಿಸಿಕೊಂಡಿದ್ದ ಈ ದಂಪತಿ ಇದೀಗ ಪರಾರಿಯಾಗಿದ್ದು, ಸಂತ್ರಸ್ತ ಚೀಟಿದಾರರು ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ. ಹೂ ಮಾರುವವರು, ಅಂಗವಿಕಲರು, ಮನೆಗೆಲಸದವರು ಮುಂತಾದ 50ಕ್ಕೂ ಅಧಿಕ ಮಂದಿ ಇವರ ಬಳಿ ಚೀಟಿ ಹಾಕಿದ್ದು, ಈ ದಂಪತಿ ಸುಮಾರು 1 ಕೋಟಿ ರೂಪಾಯಿಗೂ ಅಧಿಕ ವಂಚನೆ ಮಾಡಿದ್ದಾರೆ ಎನ್ನಲಾಗಿದೆ.
ಚೀಟಿ ಹಣ ಕೇಳಿದರೆ ಧಮಕಿ ಹಾಕುತ್ತಿದ್ದ ದಂಪತಿ ಪರಾರಿಯಾಗಿದ್ದು, ಸಂತ್ರಸ್ತರು ಅವರ ಮನೆಗೆ ಬೀಗ ಜಡಿದು, ಮಂಜುನಾಥ್ ತಂದೆ-ತಾಯಿಯ ಮನೆಯ ಮುಂದೆ ಕಾದುಕುಳಿತ ಪ್ರಸಂಗ ನಡೆದಿದೆ. ಆದರೆ ನಮಗೂ ಪುತ್ರನಿಗೂ ಯಾವುದೇ ಸಂಬಂಧವಿಲ್ಲ ಎಂದು ಪಾಲಕರು ಉತ್ತರಿಸಿದ್ದಾರೆ ಎನ್ನಲಾಗಿದೆ. ಮಂಜುನಾಥ್ ವಿರುದ್ಧ ಇನ್ನೂ ಹಲವು ವಂಚನೆ ಪ್ರಕರಣಗಳು ದಾಖಲಾಗಿರುವ ಆರೋಪವೂ ಇದೆ.
ಶಾಸಕರ ಸ್ಟಿಕ್ಕರ್ ಇರುವ ಕಾರಿಗೆ ದ್ವಿಚಕ್ರ ವಾಹನ ಸವಾರ ಬಲಿ; ತಲೆ ಮೇಲೇ ಹರಿದು ಹೋದ ಕಾರು!