ವಾಷಿಂಗ್ಟನ್: ಕರೊನಾ ವೈರಸ್ ಚೀನಾದಲ್ಲಿ ಹುಟ್ಟಿದ್ದರೂ ಅತಿಹೆಚ್ಚಾಗಿ ಬಾಧಿಸುತ್ತಿರುವುದು ಅಮೆರಿಕದಲ್ಲಿ. ಅಲ್ಲಿ ಸದ್ಯ 1.23 ದಶಲಕ್ಷಕ್ಕಿಂತಲೂ ಹೆಚ್ಚು ಕರೊನಾ ಸೋಂಕಿತರು ಇದ್ದಾರೆ. ಹಾಗೇ ಸಾವಿನ ಸಂಖ್ಯೆ 72 ಸಾವಿರವನ್ನು ಮೀರಿಸಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪ್ರತಿನಿತ್ಯ ತಮ್ಮ ವೈಟ್ ಹೌಸ್ನಲ್ಲಿ ಸುದ್ದಿಗೋಷ್ಠಿ ನಡೆಸಿ, ಆ ದಿನದ ಬೆಳವಣಿಗೆಗಳನ್ನು ಹೇಳುತ್ತಿದ್ದಾರೆ. ಈಗಾಗಲೇ ಕರೊನಾದಿಂದ ಅಷ್ಟೆಲ್ಲ ಜನರ ಸಾವಾಗಿದೆ. ಆದರೆ ಇದು ಇಲ್ಲಿಗೇ ನಿಲ್ಲುವುದಿಲ್ಲ. ಮತ್ತೂ ಅನೇಕರು ಪ್ರಾಣ ಕಳೆದುಕೊಳ್ಳುತ್ತಾರೆ ಎಂದು ಟ್ರಂಪ್ ಹೇಳಿದ್ದಾರೆ.
ಇದನ್ನೂ ಓದಿ: ಅಮೆರಿಕದಲ್ಲಿ ಬಡವರಿಗೆ ಉಚಿತ ಊಟ
ದೇಶದಲ್ಲಿ ಕರೊನಾ ವೈರಸ್ ಪ್ರಮಾಣ ಹೆಚ್ಚಳವಾಗುತ್ತಿರುವುದರಿಂದ, ಸಾವಿನ ಸಂಖ್ಯೆ ನಿಯಂತ್ರಣ ಸಾಧ್ಯವಾಗುತ್ತಿಲ್ಲದಿರುವುದರಿಂದ ಟ್ರಂಪ್ ಹೈರಾಣಾಗಿದ್ದಾರೆ. ಈ ಕರೊನಾ ದಾಳಿ, 1941ರ ಪರ್ಲ್ ಹಾರ್ಬರ್ ದಾಳಿ ಮತ್ತು 2001ರ ಸೆಪ್ಟೆಂಬರ್ 11ರಂದು ಯುಎಸ್ ಮೇಲೆ ನಡೆದ ಉಗ್ರ ದಾಳಿಯನ್ನು ಮೀರಿಸುವಂತಿದೆ ಎಂದಿದ್ದಾರೆ.
1941ರಲ್ಲಿ ಜಪನೀಸ್ ನೇವಿ ಹಡಗು ಯುಎಸ್ ಮೇಲೆ ಅಚಾನಕ್ ಆಗಿ ದಾಳಿ ಮಾಡಿತ್ತು. ಹಾಗೇ 2001 ಸೆಪ್ಟೆಂಬರ್ 11ರಂದು ಅಮೆರಿಕದ ಮೇಲೆ ಅಲ್ ಕೈದಾ ಉಗ್ರಸಂಘಟನೆಯ ನಾಲ್ಕು ಗುಂಪುಗಳು ಭೀಕರ ದಾಳಿ ನಡೆಸಿದ್ದವು. ವರ್ಲ್ಡ್ ಟ್ರೇಡ್ ಸೆಂಟರ್ನ್ನು ಉರುಳಿಸಿದ್ದವು. ಈ ದಾಳಿಗಳಲ್ಲಿ ಅಪಾರ ಸಾವು, ನಷ್ಟ ಆಗಿತ್ತು. ಆದರೆ ಟ್ರಂಪ್ ಹೇಳುವ ಪ್ರಕಾರ ಅದೆರಡೂ ದಾಳಿಗಿಂತ ಈ ಕರೊನಾ ತಂದೊಡ್ಡಿದ ಅಪಾಯ ಇನ್ನೂ ಕೆಟ್ಟದಾಗಿದೆ. ದೇಶಕ್ಕೆ ಮಾರಕವಾಗಿದೆ.
ಹಾಗೇ, ಈ ಕರೊನಾ ಮತ್ತು ಇದರಂತಾ ವೈರಸ್ಗಳ ದಾಳಿ ಇನ್ಯಾವತ್ತೂ ಜಗತ್ತಿನ ಮೇಲೆ ಆಗದೆ ಇರಲಿ ಎಂದಿದ್ದಾರೆ. (ಏಜೆನ್ಸೀಸ್)
ಇದನ್ನೂ ಓದಿ: ಅಮೆರಿಕದಲ್ಲಿ ಶೇ.47ರಷ್ಟು ಉದ್ಯೋಗಿಗಳು ಪ್ಯಾಂಟೇ ಹಾಕಲ್ವಂತೆ, ಉಳಿದವರು ಇನ್ನೇನು ಮಾಡ್ತಾರೆ ನೋಡಿ…