ಬೆಂಗಳೂರು: ರಾಜ್ಯದಲ್ಲಿ ಒಬ್ಬರಿಂದ ಒಬ್ಬರಿಗೆ ಕರೊನಾ ವೈರಸ್ ಹರಡುವಿಕೆ ಪ್ರಮಾಣದಲ್ಲಿ ಇಳಿಮುಖವಾಗುತ್ತಿದೆ. ಕಳೆದ ಏ.10 ರಿಂದ ಮೇ.10 ರ ನಡುವಿನ ಅವಧಿಯಲ್ಲಿ ರಾಜ್ಯದಲ್ಲಿ ಕರೊನಾ ಆರ್ ನಾಟ್ (R-Naught ಅಥವಾ R0) ವ್ಯಾಲ್ಯೂ 1.66 ಇತ್ತು. ಅದು ಈಗ 1 ರ ಅಸುಪಾಸಿನಲ್ಲಿದ್ದು, ದಿನೇ ದಿನೇ ವೈರಸ್ ಹರಡುವಿಕೆ ಪ್ರಮಾಣ ಕುಸಿಯುತ್ತಿದೆ ಎನ್ನಲಾಗಿದೆ.
2020 ರ ಡಿಸೆಂಬರ್ 9 ರಂದು ದೇಶದಲ್ಲಿ ಆರ್ ನಾಟ್ ವ್ಯಾಲ್ಯೂ 0.91 ಕ್ಕಿಂತ ಕಡಿಮೆ ಇತ್ತು. ಆ ಸಂದರ್ಭದಲ್ಲಿ ಕರ್ನಾಟಕದಲ್ಲಿ 1.0 ಇತ್ತು. ಆದರೆ, 2021 ರ ಮಾರ್ಚ್ 27 ರ ವೇಳೆಗೆ ದೇಶದಲ್ಲಿ ಆರ್ ನಾಟ್ ಮೌಲ್ಯ 1.53 ಇತ್ತು. ಅಲ್ಲದೆ, ದೇಶದ 19 ರಾಜ್ಯಗಳಲ್ಲಿ ಆರ್ ನಾಟ್ ಮೌಲ್ಯ 1 ಕ್ಕಿಂತ ಹೆಚ್ಚಿತು. ಕರ್ನಾಟಕದಲ್ಲಿ 1.0 ಯಿಂದ 1.66 ಕ್ಕೆ ಏರಿಕೆ ಆಯಿತು. ರಾಜ್ಯದಲ್ಲಿ ಒಬ್ಬರಿಂದ ಒಬ್ಬರಿಗೆ ವೇಗವಾಗಿ ವೈರಸ್ ಪಸರಿಸುತ್ತಿತ್ತು ಎಂಬ ಸೂಚನೆ ಸಿಕ್ಕಿತು. ಜೊತೆಗೆ, ದೇಶದಲ್ಲಿ ಸರಾಸರಿ ನಾಲ್ಕು ಲಕ್ಷದವರೆಗೆ ಕರೊನಾ ಸೋಂಕಿತ ಪ್ರಕರಣಗಳು ದಾಖಲಾಯಿತು. ಕರೊನಾ ನಿಯಂತ್ರಿಸಲು ಕಠಿಣ ಲಾಕ್ಡೌನ್ ಹೇರಿದ್ದರಿಂದ ಇದೀಗ ಸೋಂಕು ಇಳಿಕೆಯಾಗುತ್ತಿದೆ ಎಂದು ಇಂಟಿಗ್ರೇಟೆಡ್ ವೈದ್ಯ ಡಾ. ನಿರಂಜನ್ ಯೆಲ್ಲೂರು ತಿಳಿಸಿದ್ದಾರೆ.
ಇದನ್ನೂ ಓದಿ: ಕರೊನಾ ಲಸಿಕೆ ವಿರುದ್ಧ ಅಪಪ್ರಚಾರ ಮಾಡಿದ ಕಾಂಗ್ರೆಸ್ ದೇಶದ ಜನರ ಬಳಿ ಕ್ಷಮೆಯಾಚಿಸಲಿ
ಏನಿದು ಆರ್ ನಾಟ್ ವ್ಯಾಲ್ಯೂ? : ಸಾಂಕ್ರಾಮಿಕ ರೋಗವು ಪಸರಿಸುವ ಪ್ರಮಾಣವನ್ನು ಅಳೆಯುವುದನ್ನು ವೈದ್ಯಕೀಯ ಭಾಷೆಯಲ್ಲಿ ಆರ್ ನಾಟ್ ವ್ಯಾಲ್ಯೂ ಎಂದು ಕರೆಯಲಾಗುತ್ತದೆ. ಒಟ್ಟಾರೆ ಜನಸಂಖ್ಯೆಯಲ್ಲಿ ಓರ್ವ ಸೋಂಕಿತನಿಂದ 2 ರಿಂದ 3 ಜನರಿಗೆ ಈ ಕರೊನಾ ಸೋಂಕು ಹರಡುತ್ತದೆ ಎಂಬುದು ಜಾಗತಿಕವಾಗಿ ಕರೊನಾದ ಆರ್ ನಾಟ್ ವ್ಯಾಲ್ಯೂ ಎಂದು ನಿರ್ಧರಿಸಲಾಗಿದೆ. ಆರ್ ನಾಟ್ ಮೌಲ್ಯ ಹೆಚ್ಚಾದಷ್ಟು ಮತ್ತಷ್ಟು ಜನರಿಗೆ ಸೋಂಕು ತಗಲುತ್ತದೆ ಎಂಬ ಸೂಚನೆ ಕಂಡುಬರುತ್ತದೆ.
ಒಂದಕ್ಕಿಂತ ಕಡಿಮೆ ಆರ್ ನಾಟ್ ಕಂಡುಬಂದರೆ ವೈರಾಣು ಪಸರಿಸುವ ಪ್ರಮಾಣ ಕಡಿಮೆಯಾಗಿದೆ ಅಥವಾ ಸುರಕ್ಷಿತ ಎಂದರ್ಥ. ಒಂದಕ್ಕಿಂತ ಜಾಸ್ತಿ ಇದ್ದರೆ ವೈರಸ್ ಹರಡುವಿಕೆ ಹೆಚ್ಚಾಗಿದೆ ಎಂದು ತಿಳಿಯುತ್ತದೆ. ದೇಶದ ಒಟ್ಟಾರೆ ಜನಸಂಖ್ಯೆ, ರೋಗ ಶರೀರದಲ್ಲಿ ಇರುವ ಅವಧಿ, ಸಾಮಾಜಿಕ ಸ್ಥಿತಿಗತಿ ಹಾಗೂ ರಾಜಕೀಯ ನಿರ್ಣಯ ಸೇರಿದಂತೆ ಇನ್ನಿತರ ಅಂಶಗಳನ್ನು ಪರಿಗಣಿಸಿ ಕರೊನಾ ಆರ್ ನಾಟ್ ವ್ಯಾಲ್ಯೂ ನಿರ್ಧರಿಸಲಾಗುತ್ತದೆ ಎನ್ನಲಾಗಿದೆ.
ಇದನ್ನೂ ಓದಿ: ಡಿಎಲ್ಎಫ್ ಲಂಚ ಪ್ರಕರಣದಲ್ಲಿ ಲಾಲು ಪ್ರಸಾದ್ ಯಾದವ್ಗೆ ಕ್ಲೀನ್ ಚಿಟ್
ಅಮೆರಿಕದಲ್ಲಿ 2.30 ಇತ್ತು : ಕರೊನಾ ಮೊದಲನೇ ಅಲೆಗೆ ಅಮೆರಿಕ ತತ್ತರಿಸಿತ್ತು. ಲಕ್ಷಾಂತರ ಪ್ರಕರಣಗಳು ದಾಖಲಾಗಿದ್ದವು. ಚಿಕಿತ್ಸೆ ಫಲಕಾರಿಯಾಗದೆ ಸಾವಿರಾರು ಜನರು ಮೃತಪಟ್ಟಿದ್ದರು. ನ್ಯೂಯಾರ್ಕ್ ಮತ್ತು ನ್ಯೂಜಸಿರ್ಯಲ್ಲಿ ಆಗ 2.30 ಆರ್ ನಾಟ್ ವ್ಯಾಲ್ಯೂ ಕಂಡುಬಂದಿತ್ತು. ಆ ಸಂದರ್ಭದಲ್ಲಿ ಒಬ್ಬರಿಂದ ಇನ್ನೊಬ್ಬರಿಗೆ ವೈರಸ್ ಹರಡುವಿಕೆ ಪ್ರಮಾಣ ಹೆಚ್ಚಾಗಿತ್ತು. ಕ್ರಮೇಣ ಲಾಕ್ಡೌನ್ ಹಾಗೂ ಪರಿಣಾಮಕಾರಿ ಚಿಕಿತ್ಸೆ ಅಭಿಯಾನ ಜಾರಿಗೆ ತಂದಿರುವುದರಿಂದ ವೈರಸ್ ಹರಡುವಿಕೆ ಪ್ರಮಾಣ ಕುಸಿಯಿತು ಎಂದು ಡಾ. ಯೆಲ್ಲೂರು ತಿಳಿಸಿದ್ದಾರೆ.