ಚೀನಾದ ಟಿಕ್​ಟಾಕ್ ಜಾಗವನ್ನು ನಮ್ಮ ಬೆಂಗಳೂರಿನ ಚಿಂಗಾರಿ ತುಂಬಿತು...

ಬೆಂಗಳೂರು: ಟಿಕ್​ ಟಾಕ್ ಆ್ಯಪ್​ ನಿಷೇಧಕ್ಕೆ ಒಳಗಾದ ಕೂಡಲೇ ಪರ್ಯಾಯ ಆ್ಯಪ್ ಯಾವುದೆಂದು ಹುಡುಕಿದ್ರು ಭಾರತೀಯರು. ಇನ್ನೊಂದೆಡೆ ಟಿಕ್​ಟಾಕ್ ಬ್ಯಾನ್ ಆದ ಕಾರಣ, ಜನ ಮೆಚ್ಚುಗೆಗಾಗಿ ಇನ್ನಿಲ್ಲದಂತೆ ಪ್ರಯತ್ನಿಸುತ್ತಿದ್ದ ಯುವತಿಯೊಬ್ಬಳು ಕಣ್ಣೀರು ಹಾಕಿದ ವಿಡಿಯೋ ವೈರಲ್ ಆಗಿತ್ತು. ಇವೆಲ್ಲದರ ನಡುವೆ ಗಮನ ಸೆಳೆಯಿತು ಬೆಂಗಳೂರಿನ ಚಿಂಗಾರಿ.

ಬೆಂಗಳೂರಿನ ಕೋರಮಂಗಲದಲ್ಲಿ ಕಚೇರಿ ಹೊಂದಿರುವ ಚಿಂಗಾರಿ ಆ್ಯಪ್​ - ಶಾರ್ಟ್​ ವಿಡಿಯೋ ಆ್ಯಪ್ ಆಗಿ ಗಮನಸೆಳೆದಿದೆ. ಬೆಂಗಳೂರಿನ ಚಿಂಗಾರಿ ಆ್ಯಪ್​ ನಲ್ಲಿ ಟಿಕ್​ಟಾಕ್​ನಲ್ಲಿರುವಂಥದ್ದೇ ಫೀಚರ್​ ಇದ್ದ ಕಾರಣ ಬಹುಬೇಗನೆ ಎಲ್ಲರ ಮೆಚ್ಚುಗೆ ಪಾತ್ರವಾಯಿತದು. ಗೂಗಲ್ ಪ್ಲೇಸ್ಟೋರ್​ನಲ್ಲಿ 25 ಲಕ್ಷಕ್ಕೂ ಅಧಿಕ ಡೌನ್​ಲೋಡ್ ಆಗಿದೆ. ಜೂನ್ 27ರಂದು ಅಪ್ಡೇಟ್ ಆಗಿರುವ ಆ್ಯಪ್​, ಜೂನ್ 29ರಂದು ಚೀನಾ ಮೂಲದ 59 ಆ್ಯಪ್​ಗಳು ಬ್ಯಾನ್​ ಆಗುತ್ತಿದ್ದಂತೆ ಟಿಕ್​ಟಾಕ್​ಗೆ ಪರ್ಯಾಯವೆಂಬಂತೆ ಬೇಡಿಕೆ ಪಡೆದುಕೊಂಡಿದೆ.

ಇದನ್ನೂ ನೋಡಿ: ಟಿಕ್​ಟಾಕ್​ಗಾಗಿ ಕಣ್ಣೀರಿಟ್ಟ ಮಹಿಳೆ

ಈ ಆ್ಯಪನ್ನು ವಿಶ್ವಾತ್ಮ ನಾಯಕ್​ ಮತ್ತು ಸಿದ್ಧಾರ್ಥ ಗೌತಮ್ ಎಂಬ ಇಬ್ಬರು ಪ್ರೋಗ್ರಾಮರ್​ಗಳು ಇದನ್ನು ಅಭಿವೃದ್ಧಿಪಡಿಸಿದ್ದು, ಒಂದೇ ತಿಂಗಳಲ್ಲಿ 1 ಲಕ್ಷ ಡೌನ್​ಲೋಡ್ ದಾಟಿತ್ತು. ಇದು ಇಂಗ್ಲಿಷ್​, ಹಿಂದಿ, ಬಾಂಗ್ಲಾ, ಗುಜರಾತಿ, ಮರಾಠಿ , ಕನ್ನಡ, ಪಂಜಾಬಿ, ಮಲಯಾಳಂ, ತಮಿಳು ಮತ್ತು ತೆಲುಗುಭಾಷೆಯಲ್ಲಿ ಲಭ್ಯವಿದೆ. ಚಿಂಗಾರಿಯ ಸಹಸಂಸ್ಥಾಪಕ ಸುಮಿತ್ ಘೋಷ್​ ಅವರು ಆಂಗ್ಲ ಭಾಷಾ ಟಿವಿ ಚಾನೆಲ್ ಜತೆಗೆ ಮಾತನಾಡುತ್ತ, ಚಿಂಗಾರಿ ಆ್ಯಪ್ ಗಂಟೆಗೆ 3-4 ಲಕ್ಷ ಡೌನ್​ಲೋಡ್ ಆಗತೊಡಗಿದೆ ಈಗ ಎಂದು ಹೇಳಿದ್ದಾರೆ. (ಏಜೆನ್ಸೀಸ್​)

https://www.vijayavani.net/like-demonetisation-mp-nusrat-jahan-says-tiktok-ban/