ನವದೆಹಲಿ: ಆಗಸ್ಟ್ನಲ್ಲಿ ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿದ ಚಂದ್ರಯಾನ-3 ಮಿಷನ್ನ ಲ್ಯಾಂಡರ್ ಮಾಡ್ಯುಲ್ ವಿಕ್ರಂ, ಚಂದ್ರನ ಮೇಲ್ಮೆಯ ಸುಮಾರು 2.06 ಟನ್ ಮಣ್ಣನ್ನು ನೆಲೆತಪ್ಪಿಸಿದೆ ಎಂದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ತಿಳಿಸಿದೆ. ಇದರ ಪರಿಣಾಮವಾಗಿ ವಿಕ್ರಂ ಇಳಿದ ಜಾಗದಲ್ಲಿ “ಇಜೆಕ್ಟಾ ಹ್ಯಾಲೋ’ ಎಂಬ ಚಂದ್ರನ ವಸ್ತುಗಳ ಬೃಹತ್ ಪ್ರಭಾವಲಯ ಉಂಟಾಗಿತ್ತು.
ಆಗಸ್ಟ್ 23ರಂದು ಚಂದ್ರಯಾನ-3 ಮಿಷನ್ ಚಂದ್ರನ ದಣ ಧ್ರುವದ ಮೇಲೆ ಯಶಸ್ವಿಯಾಗಿ ಇಳಿದಿತ್ತು. ಅದಕ್ಕೆ ಶಿವಶಕ್ತಿ ಪಾಯಿಂಟ್ ಎಂದು ಹೆಸರಿಸಲಾಗಿದ್ದು ಅಲ್ಲಿ ಲ್ಯಾಂಡರ್ ವಿಕ್ರಂ ಮತ್ತು ರೋವರ್ ಪ್ರಜ್ಞಾನ್ ಚಂದ್ರನ ಮೇಲ್ಮೆಯನ್ನು ಸ್ಪರ್ಶಿಸಿದ್ದವು. ಚಂದ್ರನ ಮೇಲ್ಮೆಯನ್ನು ವಿಕ್ರಂ ಸ್ಪರ್ಶಿಸಿದ ವೇಳೆ ಅದರ 2.06 ಟನ್ ರೆಗೋಲಿತ್ಅನ್ನು (ಬಂಡೆ ಮತ್ತು ಮಣ್ಣು) ನೆಲೆ ತಪ್ಪಿಸಿದೆ ಎಂದು ಇಸ್ರೋ ವಿವರಿಸಿದೆ. ಇಸ್ರೋದ ಒಂದು ಭಾಗವಾಗಿರುವ ರಾಷ್ಟ್ರೀಯ ದೂರ ಸಂವೇದಿ ಕೇಂದ್ರದ (ಎನ್ಆರ್ಎಸ್ಸಿ) ವಿಜ್ಞಾನಿಗಳು ಈ ವಿದ್ಯಮಾನವನ್ನು ಸೆರೆಹಿಡಿದು ವಿಶ್ಲೇಷಿಸಿದ್ದಾರೆ. ವಿಕ್ರಂ ಲ್ಯಾಂಡರ್ ಸ್ಪರ್ಶದಿಂದ ಮೇಲೆದ್ದ ರೆಗೋಲಿತ್ ಸುಮಾರು 108.4 ಚದರ ಮೀಟರ್ ಪ್ರದೇಶದಲ್ಲಿ ಹರಡಿದೆ ಎಂದು ವಿಜ್ಞಾನಿಗಳ ವಿಶ್ಲೇಷಣೆ ತಿಳಿಸಿದೆ. ಚಂದ್ರಯಾನ-3 ಮಿಷನ್, ಚಂದ್ರಯಾನ&2 ಮಿಷನ್ನ ಫಾಲೋಅಪ್ ಆಗಿದೆ.
ಇಜೆಕ್ಟಾ ಹ್ಯಾಲೋ ಎಂದರೇನು?
ಲ್ಯಾಂಡರ್ ವಿಕ್ರಂ ಇಳಿಯುವ ಮುಂಚಿನ ಹಾಗೂ ಇಳಿದ ನಂತರದ ಹೈ ರಿಸಲ್ಯೂಶನ್ ದೃಶ್ಯಗಳನ್ನು ವಿಜ್ಞಾನಿಗಳು ಹೋಲಿಸಿದ್ದಾರೆ. ಚಂದ್ರಯಾನ-2 ಆರ್ಬಿಟರ್ನ ಆರ್ಬಿಟರ್ ಹೈ-ರಿಸಲ್ಯೂಶನ್ ಕ್ಯಾಮರಾದಿಂದ (ಒಎಚ್ಆರ್ಸಿ) ಅದನ್ನು ತೆಗೆಯಲಾಗಿತ್ತು. ಇಳಿಯುವ ಮುನ್ನ ಹಾಗೂ ನಂತರದ ಹಲವು ಗಂಟೆಗಳ ಅಂತರದಲ್ಲಿ ಈ ಚಿತ್ರಗಳನ್ನು ಸೆರೆಹಿಡಿಯಲಾಗಿತ್ತು. ಲ್ಯಾಂಡರ್ನ ಸುತ್ತ ಒಂದು ಅನಿಯಮಿತವಾದ ಪ್ರಕಾಶಮಾನ ಅಂಶ ಕಂಡು ಬಂದಿದ್ದು ಅದನ್ನೇ ‘ಇಜೆಕ್ಟಾ ಹ್ಯಾಲೋ’ ಎಂದು ಕರೆಯಲಾಗುತ್ತದೆ. ‘ಇಜೆಕ್ಟಾ ಹ್ಯಾಲೋ’ ವಿದ್ಯಮಾನದ ವಿಸ್ತ್ರತ ವಿಶ್ಲೇಷಣೆ ‘ಜರ್ನಲ್ ಆಫ್ ದಿ ಇಂಡಿಯನ್ ಸೊಸೈಟಿ ಆಫ್ ರಿಮೋಟ್ ಸೆನ್ಸಿಂಗ್’ನಲ್ಲಿ ಪ್ರಕಟವಾಗಿದೆ. ಈ ಅಧ್ಯಯನವು ಚಂದ್ರನ ಮೇಲ್ಮೆ ಮೇಲೆ ಇಳಿಯುವುದರಿಂದಾಗುವ ಪರಿಣಾಮ ಕುರಿತು ಅಮೂಲ್ಯವಾದ ಒಳನೋಟಗಳನ್ನು ಒದಗಿಸುತ್ತದೆ.