ನವದೆಹಲಿ: ಪ್ರಧಾನಮಂತ್ರಿಯವರ ಪ್ರಿನ್ಸಿಪಲ್ ಸೆಕ್ರೆಟರಿ ಪಿ.ಕೆ.ಮಿಶ್ರಾ ಅವರ ಹೆಸರು ಹೇಳಿದ ವ್ಯಕ್ತಿಯೊಬ್ಬ, ಪುದುಚೇರಿಯ ಮಾಹೆಯಲ್ಲಿರುವ ಪ್ರಾದೇಶಿಕ ಆಡಳಿತಾಧಿಕಾರಿಗೆ ಕರೆ ಮಾಡಿ ಫೇವರ್ ಕೇಳಿದ ಪ್ರಕರಣ ಬೆಳಕಿಗೆ ಬಂದಿದೆ. ಈ ಗುರುತು ಪತ್ತೆಯಾಗದ ವ್ಯಕ್ತಿಯ ವಿರುದ್ಧ ಸಿಬಿಐ ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಆರಂಭಿಸಿದೆ ಎಂದು ಪಿಎಂಒ ಅಧಿಕಾರಿಗಳು ಸೋಮವಾರ ತಿಳಿಸಿದ್ದಾರೆ.
ಕರೆ ಸ್ವೀಕರಿಸಿದ ಆಡಳಿತಾಧಿಕಾರಿ ಹೆಸರು ಅಮನ್ ಶರ್ಮಾ. ಅವರಿಗೆ ಗುರುತಿಲ್ಲದ ನಂಬರ್ನಿಂದ ಕರೆ ಬಂದಿದ್ದು, ನಾನು ಪ್ರಧಾನಿಯವರ ಪ್ರಿನ್ಸಿಪಲ್ ಸೆಕ್ರೆಟರಿ ಪಿ.ಕೆ.ಮಿಶ್ರಾ ಮಾತನಾಡುತ್ತಿದ್ದೇನೆ. ನನ್ನ ಮಗಳು JIPMERನಲ್ಲಿ ಕಲಿಯುತ್ತಿದ್ದು, ಸ್ವಲ್ಪ ಫೇವರ್ ಆಗಬೇಕಾಗಿದೆ ಎಂದು ಕೇಳಿಕೊಂಡಿದ್ದ.
ಈ ಸಂಬಂಧ ಅಮನ್ ಶರ್ಮಾ ಅವರು ಪಿಎಂಒ ಕಚೇರಿಯನ್ನು ಸಂಪರ್ಕಿಸಿದಾಗ ವಂಚನೆ ಬೆಳಕಿಗೆ ಬಂದಿದೆ. ಈ ಪ್ರಕರಣವನ್ನು ಸಿಬಿಐಗೆ ವಹಿಸಿ ಪಿಎಂಒ ಆದೇಶ ನೀಡಿದೆ.ಈ ಘಟನೆ ನಡೆದು ಎರಡೂವರೆ ತಿಂಗಳಾಗಿದ್ದು, ಅನಾಮಧೇಯನ ವಿರುದ್ಧ ಐಪಿಸಿಯ ವಿವಿಧ ಸೆಕ್ಷನ್ ಅಡಿಯಲ್ಲಿ ಅಪರಾಧಿಕ ಪಿತೂರಿ, ವಂಚನೆ ಇತ್ಯಾದಿ ಪ್ರಕರಣಗಳನ್ನು ದಾಖಲಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.(ಏಜೆನ್ಸೀಸ್)