ಸಾಮಾನ್ಯವಾಗಿ ಗೇರುಬೀಜ ಬೆಳೆ ಮೂರು ಹಂತದಲ್ಲಿರುತ್ತದೆ. ಜನವರಿಯಲ್ಲಿ ಪ್ರಥಮ, ಮಾರ್ಚ್ - ಏಪ್ರಿಲ್ನಲ್ಲಿ ದ್ವಿತೀಯ, ಮೇ ಅಥವಾ ಮಳೆಗಾಲಕ್ಕೂ ಮುನ್ನ ಮೂರನೇ ಹಂತದ ಬೆಳೆ ಕೃಷಿಕರ ಕೈಗೆ ಸಿಗುತ್ತದೆ. ಪ್ರಸ್ತುತ ವ್ಯತಿರಿಕ್ತ ವಾತಾವರಣ ಗೇರು ಬೆಳೆಗಾರರನ್ನು ಅಲ್ಲೋಲ ಕಲ್ಲೋಲಗೊಳಿಸಿದೆ.
ಅಡಕೆ ಬೆಳೆಯ ಬೆಲೆ ಏರುತ್ತಿರುವುದರಿಂದ, ಕೆ.ಜಿ.ಗೆ ಉತ್ತಮ ಧಾರಣೆ ದೊರಕುತ್ತಿರುವುದರಿಂದ ಕೇವಲ ಕೆ.ಜಿ.ಗೆ 100 ರೂ. ಸಿಗುವ ಗೇರು ಬೀಜ ಮೂಲೆಪಾಲಾಗುತ್ತಿದೆ. ಬೆಳೆಗಾರರು ಗೇರು ಮರವನ್ನು ಕಡಿದು ಅಡಿಕೆ ಕೃಷಿಯತ್ತ ಮುಖ ಮಾಡುತ್ತಿದ್ದಾರೆ. ಇದು ಮುಂದಿನ ದಿನಗಳಲ್ಲಿ ವ್ಯವಹಾರದ ಮೇಲೆ ಪರಿಣಾಮ ಬೀರಲಿದೆ. ವೈಜ್ಞಾನಿಕವಾಗಿ ಗೇರು ಬೆಳೆ ಬೆಳೆಯಬೇಕಾದ ಅನಿವಾರ್ಯತೆ ಇದೆ.
