ಚೆನ್ನೈ: ಆನ್ಲೈನ್ ಕ್ಲಾಸ್ ಅಟೆಂಡ್ ಆಗಲು ಸ್ಮಾರ್ಟ್ಫೋನ್ ಇಲ್ಲದ ಬಾಲಕ ಮೊಬೈಲ್ ಫೋನ್ ಕಳವು ಮಾಡಿದ್ದಷ್ಟೇ ಅಲ್ಲ, ಪೊಲೀಸರ ಕೈಗೂ ಸಿಕ್ಕಿಬಿದ್ದಿದ್ದಾನೆ. ಆದರೆ ಆಮೇಲಾಗಿದ್ದೇ ಬೇರೆ…
ಹದಿಮೂರು ವರ್ಷದ ಶಾಲಾ ವಿದ್ಯಾರ್ಥಿಗೆ ಆನ್ಲೈನ್ ಕ್ಲಾಸ್ ಅಟೆಂಡ್ ಆಗಲೇಬೇಕಿತ್ತು. ಆದರೆ ಬಡವರಾಗಿರುವ ಪಾಲಕರು ಆತನಿಗೆ ಮೊಬೈಲ್ಫೋನ್ ಕೊಡಿಸಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ ಆತ ಸ್ಮಾರ್ಟ್ಫೋನ್ ಕದ್ದು ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾನೆ.
ಚೆನ್ನೈನ ಕಾರ್ಪೋರೇಷನ್ ಶಾಲೆಯೊಂದರ ಈ ವಿದ್ಯಾರ್ಥಿ, ಇನ್ನಿಬ್ಬರು ಗೆಳೆಯರ ಜತೆ ಸೇರಿ ತಿರುವಟ್ಟಿಯೂರ್ ಎಂಬಲ್ಲಿ ಟ್ರಕ್ ಚಾಲಕನೊಬ್ಬನ ಸ್ಮಾರ್ಟ್ಫೋನ್ ಎಗರಿಸಿ ಪರಾರಿಯಾಗಿದ್ದ. ಬಳಿಕ ವಿಷಯ ತಿಳಿದ ಪೊಲೀಸರು ಆತನನ್ನು ಬಂಧಿಸಿದ್ದರು.
ಮೂವರನ್ನೂ ಬಂಧಿಸಿದ್ದ ಪೊಲೀಸ್ ಇನ್ಸ್ಪೆಕ್ಟರ್ ಭುವನೇಶ್ವರಿ ಅವರಿಗೆ ಈತನ ಪರಿಸ್ಥಿತಿ ಅರ್ಥವಾಗಿದೆ. ಮೊಬೈಲ್ ಫೋನ್ ಇಲ್ಲದಿದ್ದರೆ ಶಿಕ್ಷಣ ಮುಂದುವರಿಕೆ ಕಷ್ಟವಾದ್ದರಿಂದ ವಿದ್ಯಾರ್ಥಿ ಈ ಕೃತ್ಯವೆಸಗಿದ್ದಾನೆ ಎಂಬುದನ್ನು ತಿಳಿದ ಇನ್ಸ್ಪೆಕ್ಟರ್, ತನ್ನ ಪುತ್ರಿಗೆ ಸ್ಮಾರ್ಟ್ಫೋನ್ ಕೊಡಿಸಲು ಎತ್ತಿಟ್ಟುಕೊಂಡಿದ್ದ ಹಣದಲ್ಲೇ ಈ ಬಾಲಕನಿಗೆ ಹೊಸ ಮೊಬೈಲ್ಫೋನ್ ಕೊಡಿಸಿದ್ದಾರೆ. ಅಲ್ಲದೆ ಈತನ ವಿರುದ್ಧ ಕ್ರಮಕೈಗೊಂಡರೆ ಇವನ ಭವಿಷ್ಯಕ್ಕೇ ಧಕ್ಕೆ ಆಗುತ್ತದೆ ಎಂಬ ಕಾರಣಕ್ಕೆ ಮುಂದೆ ಹಾಗೆ ಮಾಡದಂತೆ ಎಚ್ಚರಿಕೆ ನೀಡಿ ಬಿಟ್ಟು ಕಳುಹಿಸಿದ್ದಾರೆ. (ಏಜೆನ್ಸೀಸ್)