ಬೆಂಗಳೂರು: ರಾಜ್ಯಾದ್ಯಂತ ಲಾಕ್ಡೌನ್ ಘೋಷಣೆಯಾದ ಬೆನ್ನಲ್ಲೇ ನಗರದಲ್ಲಿ ಆನ್ಲೈನ್ ಜೂಜಾಟದ ಕ್ರೇಜ್ ಹೆಚ್ಚಾಗಿದ್ದು, ಕಾಮಾಕ್ಷಿಪಾಳ್ಯದಲ್ಲಿ ಪೋಕರ್ ಹೆಸರಿನ ಜೂಜಾಟ ಆಡಿಸುತ್ತಿದ್ದ ಬುಕ್ಕಿಯನ್ನು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಕಾಮಾಕ್ಷಿಪಾಳ್ಯ ಮಾರುತಿನಗರದ ನಿವಾಸಿ ಪುನೀತ್ (31) ಬಂಧಿತ. ಆರೋಪಿ ಬಳಿಯಿದ್ದ 52,300 ರೂ.ಗಳನ್ನು ಪೊಲೀಸರು ಜಪ್ತಿ ಮಾಡಿದ್ದಾರೆ. ಮೊಬೈಲ್ನಲ್ಲಿ ಗ್ರೂಪ್ ಮಾಡಿಕೊಂಡು ಜೂಜಾಡುವ ಪಂಟರ್ಗಳಿಂದ ಹಣವನ್ನು ಪಣವಾಗಿ ಕಟ್ಟಿಸಿ ಕೊಂಡು ಲೈಸೆನ್ಸ್ ಇಲ್ಲದೆ ಆನ್ಲೈನ್ ಪೋಕರ್ ಗೇಮ್ ಆಡುತ್ತಿದ್ದ ಬಗ್ಗೆ ಸಿಸಿಬಿ ಪೊಲೀಸರಿಗೆ ಮಾಹಿತಿ ಲಭ್ಯವಾಗಿತ್ತು. ಏ.4ರಂದು ಕೆಲ ಪಂಟರ್ಗಳಿಗೆ ಯೂಸರ್ ಐಡಿ ಮತ್ತು ಪಾಸ್ವರ್ಡ್ ನೀಡಲು ಆರೋಪಿ ಮನೆ ಮುಂದೆ ಕಾಯುತ್ತಿರುವ ಬಗ್ಗೆ ಖಚಿತ ಮಾಹಿತಿ ಸಂಗ್ರಹಿಸಿದ ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಆರೋಪಿಯು ಆಪ್ ಮತ್ತು ವೆಬ್ಸೈಟ್ ಮೂಲಕ ಪಂಟರ್ಗಳಿಗೆ ಯೂಸರ್ ಐಡಿ ಹಾಗೂ ಪಾಸ್ವರ್ಡ್ ನೀಡಿ ಪೋಕರ್ ಎಂಬ ಅದೃಷ್ಟದ ಜೂಜಾಟ ಆಡಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಮತ್ತೊಬ್ಬ ಆರೋಪಿ ಕೆ.ವಿ.ಜಾನ್ಸನ್ ವಸಂತನಗರದಲ್ಲಿ ಇನ್ ಪ್ಲೇ ಗೇಮಿಂಗ್ ಎಂಬ ಕಚೇರಿ ತೆರೆದಿದ್ದು, ಪಂಟರ್ಗಳಿಗೆ ಆಪ್ ಹಾಕಿ ಕೊಟ್ಟು ಆನ್ಲೈನ್ನಲ್ಲಿ ಜೂಜಾಟ ಆಡಿಸುತ್ತಿದ್ದ ಎಂಬ ವಿಚಾರ ಪುನೀತ್ ವಿಚಾರಣೆ ವೇಳೆ ತಿಳಿಸಿದ್ದಾನೆ. ಆರೋಪಿಯು ಪೋಕರ್ ಜೂಜಾಡಿಸುವ ಬುಕ್ಕಿಯಾಗಿದ್ದು, ತನ್ನ ಬಳಿ ಇರುವ ಪಂಟರ್ಗಳಿಗೆ ಫೋನ್ ಪೇ ಮತ್ತು ಗೂಗಲ್ ಪೇ ಮೂಲಕ ಹಣ ಹಾಕಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಹೋದ್ಯೋಗಿಗೆ ಲೈಂಗಿಕ ಕಿರುಕುಳ ನೀಡಿದವನೀಗ ಪೊಲೀಸರ ಅತಿಥಿ: ಆಡಳಿತ ಮಂಡಳಿಗೆ ದೂರು ಕೊಟ್ಟರೂ ಆಗಿರಲಿಲ್ಲ ಪ್ರಯೋಜನ