ಬೆಂಗಳೂರು: ನಮ್ಮ ಮೆಟ್ರೋ ನಿಲ್ದಾಣಗಳಿಗೆ ಹೆಸರಿಡುವ ಹಕ್ಕನ್ನು 5 ವರ್ಷಗಳ ಅವಧಿಗೆ ನೀಡಲು ಬೆಂಗಳೂರು ಮೆಟ್ರೋ ರೈಲು ನಿಗಮ ಮುಂದಾಗಿದ್ದು, ಈ ಮೂಲಕ ಹೆಚ್ಚಿನ ಆದಾಯ ಗಳಿಸಿಲು ಚಿಂತನೆ ನಡೆಸಿದೆ.
ಹೆಸರಿಡುವುದು, ಮಾರಾಟ ಪ್ರದೇಶ ಒದಗಿಸುವುದು, ಜಾಹೀರಾತು ಪ್ರದರ್ಶನಕ್ಕೆ ಸ್ಥಳಾವಕಾಶ, ನಿಲ್ದಾಣದ ಪೇಂಟಿಂಗ್ ಹಕ್ಕು ವರ್ಗಾವಣೆ ಇತ್ಯಾದಿಗೆ ಅವಕಾಶ ನೀಡಲಾಗುವುದು ಎಂದು ಬಿಎಂಆರ್ಸಿಎಲ್ ವೆಬ್ಸೈಟ್ನಲ್ಲಿ ತಿಳಿಸಿದೆ.
ಸದ್ಯದ ನೀತಿ ಪ್ರಕಾರ, 30 ವರ್ಷಗಳ ಅವಧಿಗೆ ಹೆಸರಿನ ಹಕ್ಕು, ಸ್ಟೇಷನ್ಗೆ ನೇರ ಪ್ರವೇಶ, ವಾಣಿಜ್ಯ ಸ್ಥಳ ಬಳಕೆಗೆ ಬಿಎಂಆರ್ಸಿಎಲ್ ಕಾಪೋರ್ರೇಟ್ ಕಂಪನಿಗಳಿಂದ 100 ಕೋಟಿ ರೂ. ಪಡೆಯುತ್ತಿದೆ. ಈಗಾಗಲೇ ಹಳದಿ ಮಾರ್ಗದಲ್ಲಿ ಮೂರು ಸಂಸ್ಥೆ ಹಾಗೂ ಗುಲಾಬಿ ಮಾರ್ಗದಲ್ಲಿ 1 ಸಂಸ್ಥೆ ಜತೆಗೆ ಹೆಸರಿಡುವ ಹಕ್ಕು ವರ್ಗಾಯಿಸುವ ಸಂಬಂಧ ಒಪ್ಪಂದ ಮಾಡಿಕೊಂಡಿದೆ.
ಸುದೀರ್ಘ ಅವಧಿಗೆ ದೊಡ್ಡ ಮೊತ್ತ ಕೊಟ್ಟು ಒಪ್ಪಂದ ಮಾಡಿಕೊಳ್ಳಲು ಕಂಪನಿಗಳು ಹಿಂದೇಟು ಹಾಕುತ್ತಿರುವ ಹಿನ್ನೆಲೆ 5 ವರ್ಷದ ಅವಧಿಗೆ ಒಪ್ಪಂದ ಮಾಡಿಕೊಳ್ಳಲು ಉದ್ದೇಶಿಸಲಾಗಿದೆ. ಈಗಾಗಲೇ ಕಾರ್ಯಾರಂಭಿಸಿರುವ ಹಾಗೂ ಮುಂಬರುವ ನಿಲ್ದಾಣಗಳಿಗೆ ಇದು ಅನ್ವಯಿಸಲಿದೆ. ಉನ್ನತ ಅಧಿಕಾರ ಸಮಿತಿ ಈ ಬಗ್ಗೆ ತೀರ್ಮಾನ ಕೈಗೊಳ್ಳಲಿದೆ ಎಂದು ಬಿಎಂಆರ್ಸಿಎಲ್ ಮೂಲಗಳು ತಿಳಿಸಿವೆ.
ಬ್ರ್ಯಾಂಡ್ ಮೌಲ್ಯ ಹೆಚ್ಚಳ:
ಹೆಸರಿನ ಹಕ್ಕು ಪಡೆಯುವುದರಿಂದ ಕಾಪೋರ್ರೇಟ್ ಸಂಸ್ಥೆಗಳ ಬ್ರ್ಯಾಂಡ್ ಮೌಲ್ಯ ಹೆಚ್ಚುತ್ತದೆ. ಕೋನಪ್ಪನ ಅಗ್ರಹಾರ ಮೆಟ್ರೋ ನಿಲ್ದಾಣವನ್ನು ಇನ್ಫೋಸಿಸ್ ಫೌಂಡೇಶನ್ (100 ಕೋಟಿ ರೂ.), ಹೆಬ್ಬಗೋಡಿ ಮೆಟ್ರೋ ನಿಲ್ದಾಣವನ್ನು ಬಯೋಕಾನ್ ಫೌಂಡೇಶನ್ (65 ಕೋಟಿ ಕೋಟಿ ರೂ.), ಬೊಮ್ಮಸಂದ್ರ ಮೆಟ್ರೋ ನಿಲ್ದಾಣವನ್ನು ಡೆಲ್ಟಾ ಎಲೆಕ್ಟ್ರಾನಿಕ್ಸ್ ಫೌಂಡೇಶನ್ (75 ಕೋಟಿ ರೂ.) ನಾಮಕರಣ ಒಪ್ಪಂದ ಮಾಡಿಕೊಂಡಿದೆ. ಲಕ್ಕಸಂದ್ರ ನಿಲ್ದಾಣದಿಂದ ಬಾಷ್ ಲಿಮಿಟೆಡ್ಗೆ ನೇರ ಸಂಪರ್ಕ ಕಲ್ಪಿಸಲು 10 ಕೋಟಿ ರೂ. ಒಪ್ಪಂದ ಮಾಡಿಕೊಂಡಿದೆ.