ನವದೆಹಲಿ: ವಿಧಾನಸಭಾ ಚುನಾವಣೆಯ ಫಲಿತಾಂಶದ ದಿನ ಅರವಿಂದ್ ಕೇಜ್ರಿವಾಲ್ ಅವರಂತೆಯೇ ವೇಷ ಧರಿಸಿದ್ದ ಪುಟ್ಟ ಮಗುವಿನ ಫೋಟೋ ಕೂಡ ಸಿಕ್ಕಾಪಟೆ ವೈರಲ್ ಆಗಿತ್ತು.
ಅರವಿಂದ್ ಕೇಜ್ರಿವಾಲ್ರಂತೆ ತಲೆಗೆ ಕಪ್ಪು ಮಫ್ಲರ್ ಕಟ್ಟಿಕೊಂಡು, ಆಪ್ ಟೊಪ್ಪಿ ಹಾಕಿಕೊಂಡು, ಕೇಜ್ರಿವಾಲ್ ಧರಿಸುವ ತರಹದ್ದೇ ಕನ್ನಡಕ ಹಾಕಿಕೊಂಡು, ಸಾಲದ್ದಕ್ಕೆ ಮೀಸೆಯನ್ನೂ ಬಳಿದುಕೊಂಡು ದೆಹಲಿಯ ಆಪ್ ಕಚೇರಿ ಎದುರು ಅಂದು ಸಂಭ್ರಮಾಚರಣೆಯ ಹೊತ್ತಲ್ಲಿ ಪಾಲ್ಗೊಂಡಿದ್ದ ಪುಟ್ಟ ಬಾಲಕ ಇಂಟರ್ನೆಟ್ನಲ್ಲಿ ಸೆನ್ಸೇಶನ್ ಸೃಷ್ಟಿಸಿದ್ದ.
ಇದೇ ಮಫ್ಲರ್ ಬೇಬಿ, ಚೋಟಾ ಕೇಜ್ರಿವಾಲ್ ಇಂದು ಕೂಡ ದೆಹಲಿಯ ರಾಮಲೀಲಾ ಮೈದಾನದಲ್ಲಿ ಅರವಿಂದ್ ಕೇಜ್ರಿವಾಲ್ ಅವರ ಪ್ರಮಾಣವಚನ ಸ್ವೀಕಾರ ಸಮಾರಂಭದಲ್ಲಿ ಕಾಣಿಸಿಕೊಂಡಿದ್ದಾನೆ. ಆದರೆ ವಿಶೇಷವೆಂದರೆ ಆತ ಸುಮ್ಮನೆ ಬಂದಿಲ್ಲ.
ಚುನಾವಣಾ ಫಲಿತಾಂಶದ ದಿನ ಈ ಬಾಲಕನ ವೇಷಕ್ಕೆ ಜನ ಭಲೇ ಎಂದಿದ್ದರು. ಒಂದೇ ದಿನದಲ್ಲಿ ಇವನ ಪ್ರಸಿದ್ಧಿಯನ್ನು ಗುರುತಿಸಿದ ಆಮ್ ಆದ್ಮಿ ಪಕ್ಷ, ಅರವಿಂದ್ ಕೇಜ್ರಿವಾಲ್ ಮತ್ತು ಸಚಿವರ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಬಾಲಕನಿಗೆ ಅಧಿಕೃತ ಆಹ್ವಾನ ನೀಡಿತ್ತು.
ಇಂದು ಕೂಡ ಅರವಿಂದ್ ಕೇಜ್ರಿವಾಲ್ ಅವರ ವೇಷದಲ್ಲಿಯೇ ಈತ ಬಂದಿದ್ದಾನೆ. ಪುಟ್ಟ ಪುಟ್ಟ ಹೆಜ್ಜೆ ಹಾಕುತ್ತ ವೇದಿಕೆ ಸುತ್ತಮುತ್ತ ಓಡಾಡಿದ್ದಾನೆ. ಕೆಲವರು ಇವನೊಟ್ಟಿಗೆ ಸೆಲ್ಫೀ, ಫೋಟೋಗಳನ್ನು ತೆಗೆದುಕೊಂಡಿದ್ದಾರೆ. ಲಿಟ್ಲ್ ಮಫ್ಲರ್ಮನ್, ಬೇಬಿ ಅರವಿಂದ್ ಕೇಜ್ರಿವಾಲ್ ಎಂದು ಆತನನ್ನು ಕರೆಯುತ್ತಿದ್ದಾರೆ.
ಆಪ್ ಸಂಸದ ರಾಘವ್ ಚಾಧಾ ಕೂಡ ಪುಟ್ಟ ಹುಡುಗನೊಂದಿಗೆ ಫೋಟೋ ತೆಗೆದುಕೊಂಡು ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿದ್ದಾರೆ. (ಏಜೆನ್ಸೀಸ್)