ನವದೆಹಲಿ: ಬೆಂಗಳೂರಿನ ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ಸದ್ಯಕ್ಕೆ ಜೊಮ್ಯಾಟೋ ಮತ್ತು ಸ್ವಿಗ್ಗಿ ಮುಂಚೂಣಿಯಲ್ಲಿದ್ದು, ಇವರೆಡಕ್ಕೆ ಪ್ರತಿಸ್ಪರ್ಧಿಯಾಗಿ ಈಗ ಆನ್ಲೈನ್ ಮಾರ್ಕೆಟ್ ದಿಗ್ಗಜ ಸಂಸ್ಥೆ ಅಮೆಜಾನ್ ಕೂಡ ಕಾಲಿಡುತ್ತಿದೆ. ಅಮೆಜಾನ್ ಇಂಡಿಯಾಗ ಗುರುವಾರ ಈ ವಿಷಯವನ್ನು ಪ್ರಕಟಿಸಿದ್ದು, ಬೆಂಗಳೂರಿನ ಆಯ್ದ ಭಾಗಗಳಲ್ಲಿ ಫುಡ್ ಡೆಲಿವರಿಯನ್ನು ಮಾಡುವುದಾಗಿ ಘೋಷಿಸಿದೆ.
ಜೊಮ್ಯಾಟೋ ಮತ್ತು ಸ್ವಿಗ್ಗಿ ಕೋವಿಡ್ 19 ಲಾಕ್ಡೌನ್ ಕಾರಣಕ್ಕೆ 1,600ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ವಜಾಗೊಳಿಸಿದ ಬೆನ್ನಿಗೇ ಅಮೆಜಾನ್ನ ಈ ನಡೆ ಹೊಸ ಆಶಾಕಿರಣವನ್ನೂ ಉದ್ಯೋಗ ವಲಯದಲ್ಲಿ ಮೂಡಿಸಿದೆ. ಕೆಲವು ತಿಂಗಳುಗಳ ಮಟ್ಟಿಗೆ ಇದು ಪ್ರಾಯೋಗಿಕವಾಗಿರಲಿದೆ ಎಂಬುದನ್ನೂ ಅದು ಘೋಷಿಸಿದೆ. ಅಗತ್ಯ ವಸ್ತುಗಳ ಜತೆಗೆ ಆಹಾರವನ್ನೂ ಆರ್ಡರ್ ಮಾಡಲು ಬಯಸುತ್ತಿರುವುದಾಗಿ ಅನೇಕ ಗ್ರಾಹಕರು ಅಮೆಜಾನ್ಗೆ ತಿಳಿಸಿದ್ದು, ಅದನ್ನು ಈಡೇರಿಸಲು ಪ್ರಯತ್ನಿಸುವುದಕ್ಕೆ ಇದು ಸಕಾಲ ಎಂದು ಕಂಪನಿ ಮನಗಂಡಿದೆ. ಹೀಗಾಗಿಯೇ ಸ್ಥಳೀಯ ಆಹಾರೋದ್ಯಮಗಳನ್ನು ಗುರುತಿಸಿ ಅವುಗಳ ಜತೆಗೆ ಒಪ್ಪಂದ ಮಾಡಿಕೊಂಡು ಬೆಂಗಳೂರಿನ ಆಯ್ದ ಭಾಗಗಳಲ್ಲಿ ಫುಡ್ ಡೆಲಿವರಿ ಮಾಡಲು ಮುಂದಾಗಿದ್ದೇವೆ ಎಂದು ಅಮೆಜಾನ್ ಇಂಡಿಯಾದ ವಕ್ತಾರ ತಿಳಿಸಿದ್ದಾರೆ.
ಆರಂಭಿಕ ಹಂತದಲ್ಲಿ ಬೆಂಗಳೂರಿನ ಆಯ್ದ ಪಿನ್ಕೋಡ್ಗಳಲ್ಲಿ ಅಂದರೆ ಮಹದೇವಪುರ, ಮಾರತ್ತಹಳ್ಳಿ, ವೈಟ್ಫೀಲ್ಡ್, ಬೆಳ್ಳಂದೂರು ವ್ಯಾಪ್ತಿಯಲ್ಲಿ ಲಭ್ಯವಿರಲಿದೆ. ಇಲ್ಲಿನ ಬಾಕ್ಸ್8, ಚಾಯ್ ಪಾಯಿಂಟ್, ಫಸ್ಸೋಸ್, ಮಾಡ್ ಓವರ್ ಡೋನಟ್ಸ್, ರಾಡಿಸ್ಸನ್, ಮ್ಯಾರಿಯಟ್ ಸೇರಿ 100ಕ್ಕೂ ಹೆಚ್ಚು ರೆಸ್ಟೋರೆಂಟ್ಗಳ ಜತೆಗೆ ಅಮೆಜಾನ್ ಒಪ್ಪಂದ ಮಾಡಿಕೊಂಡಿದೆ. ಅಮೆಜಾನ್ ಆ್ಯಪ್ ಬಳಕೆದಾರರು ಈ ಪಿನ್ ಕೋಡ್ ವ್ಯಾಪ್ತಿಗೆ ಬಂದಾಗ ಅಥವಾ ಇಲ್ಲಿರುವ ಅಮೆಜಾನ್ ಬಳಕೆದಾರ ಆ್ಯಪ್ನಲ್ಲಿ ಫುಡ್ ಆರ್ಡರ್ ಆಪ್ಶನ್ ಕಾಣಿಸಕೊಳ್ಳಲಿದೆ. ಮುಂದಿನ ಆರು ತಿಂಗಳ ಅವಧಿಗೆ ಈ ಪ್ರಾಯೋಗಿಕ ಸೇವೆ ಮುಂದುವರಿಯಲಿದ್ದು, ತೃಪ್ತಿಕರವೆನಿಸಿದಲ್ಲಿ ದೇಶಾದ್ಯಂತ ಈ ಸೇವಾಜಾಲ ವಿಸ್ತರಣೆಗೊಳ್ಳಲಿದೆ. ಆದರೆ, ಯಾವ ರೀತಿ ವಿಸ್ತರಣೆ ಆಗಲಿದೆ ಎಂಬುದನ್ನು ಕಂಪನಿ ವಕ್ತಾರರು ತಿಳಿಸಿಲ್ಲ.
ಇದನ್ನೂ ಓದಿ: ಕಾನೂನುಗಳನ್ನು ಮುರಿದು ಉದ್ಯೋಗ ಸೃಷ್ಟಿಸುವ ಅವಶ್ಯಕತೆ ಇಲ್ಲ: ಅಮೆಜಾನ್ಗೆ ಪಿಯೂಷ್ ಗೋಯೆಲ್ ಪ್ರತಿಕ್ರಿಯೆ
ಇದಕ್ಕೂ ಮುನ್ನ ಈ ಕ್ಷೇತ್ರದಲ್ಲಿ ಜೊಮ್ಯಾಟೋ ಭಾರತದಲ್ಲಿ ತನ್ನ ಪ್ರಾಬಲ್ಯ ಹೆಚ್ಚಿಸುವ ಸಲುವಾಗಿ ಉಬರ್ ಈಟ್ಸ್ ಅನ್ನು ಖರೀದಿಸಿತ್ತು. ಆದಾಗ್ಯೂ ಮಾರ್ಚ್ 25ರಿಂದ ಚಾಲ್ತಿಯಲ್ಲಿರುವ ಲಾಕ್ಡೌನ್ ಕಾರಣ ಜೊಮ್ಯಾಟೋ ಮತ್ತು ಸ್ವಿಗ್ಗಿಗಳ ವಹಿವಾಟಿಗೆ ಹೊಡೆತ ಉಂಟಾಗಿದೆ. (ಏಜೆನ್ಸೀಸ್)
‘ಫೇಸ್ಬುಕ್ ಶಾಪ್ಸ್’ನಲ್ಲಿ Buy ಗೆ ಮಾರ್ಪಾಡಾಗುತ್ತೆ Like; ಆನ್ಲೈನ್ ಶಾಪಿಂಗ್ನಲ್ಲಿ ಅಮೆಜಾನ್ ವಿರುದ್ಧ ಸೆಣಸು