ನವದೆಹಲಿ: ವಿಮಾನ ನಿಲ್ದಾಣದ ಮಾದರಿಯಲ್ಲಿ ಮರು ಅಭಿವೃದ್ಧಿ ಪಡಿಸಿದ ರೈಲ್ವೆ ನಿಲ್ದಾಣಗಳಲ್ಲೂ ಶೀಘ್ರವೇ ಬಳಕೆದಾರ ಅಭಿವೃದ್ಧಿ ಶುಲ್ಕವನ್ನು ಪ್ರಯಾಣಿಕರು ಪಾವತಿಸಬೇಕಾಗುತ್ತದೆ. ಪರಿಣಾಮ ಪ್ರಯಾಣದರದಲ್ಲಿ ಸಾಂಕೇತಿಕವಾದ ಏರಿಕೆ ಉಂಟಾಗಬಹುದು ಎಂದು ರೈಲ್ವೆ ಮಂಡಳಿ ಚೇರ್ಮನ್ ವಿ.ಕೆ.ಯಾದವ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಈ ಸಂಬಂಧ ಶೀಘ್ರವೇ ಅಧಿಸೂಚನೆಯನ್ನು ರೈಲ್ವೆ ಸಚಿವಾಲಯ ಪ್ರಕಟಿಸಲಿದೆ. ಬಳಕೆದಾರ ಅಭಿವೃದ್ಧಿ ಶುಲ್ಕವನ್ನು ಆಯಾ ನಿಲ್ದಾಣಗಳ ಜನಸಂದಣಿ ಅನುಸರಿಸಿ ನಿರ್ಧರಿಸಲಾಗುತ್ತಿದೆ. ಹೀಗಾಗಿ ಶುಲ್ಕದಲ್ಲಿ ವ್ಯತ್ಯಯ ಇದ್ದೇ ಇರುತ್ತದೆ ಎಂದು ಯಾದವ್ ಸ್ಪಷ್ಟಪಡಿಸಿದ್ದಾರೆ.
ಅಮೃತಸರ, ನಾಗಪುರ, ಗ್ವಾಲಿಯರ್, ಸಾಬರ್ಮತಿ ರೈಲ್ವೆ ನಿಲ್ದಾಣಗಳನ್ನು ಅಂದಾಜು 1,296 ಕೋಟಿ ರೂಪಾಯಿ ವೆಚ್ಚದಲ್ಲಿ ಮರು ಅಭಿವೃದ್ಧಿಪಡಿಸಲು ರೈಲ್ವೆ ಪ್ರಸ್ತಾವನೆ ಸಿದ್ಧಪಡಿಸಿದೆ. ಸರ್ಕಾರ ಕೂಡ ಭಾರತೀಯ ರೈಲ್ವೆ ನಿಲ್ದಾಣ ಮರು ಅಭಿವೃದ್ಧಿ ನಿಗಮದ ಮೂಲಕ 50 ನಿಲ್ದಾಣಗಳನ್ನು ಮರು ಅಭಿವೃದ್ಧಿ ಪಡಿಸಲು ಬಿಡ್ಗಳನ್ನು ಆಹ್ವಾನಿಸಲು ಸಿದ್ಧತೆ ನಡೆಸಿದೆ. 2020-21ರಲ್ಲಿ ಈ ಯೋಜನೆಯ ಮೂಲಕ ಅಂದಾಜು 50,000 ಕೋಟಿ ರೂಪಾಯಿ ಹೂಡಿಕೆಯನ್ನು ಸರ್ಕಾರ ನಿರೀಕ್ಷಿಸುತ್ತಿದೆ. (ಏಜೆನ್ಸೀಸ್)