ನವದೆಹಲಿ: ವಿಶ್ವಾದ್ಯಂತ ಬಾಧಿಸುತ್ತಿರುವ ಕರೊನಾ ಸೋಂಕಿನ ಹಿನ್ನೆಲೆಯಲ್ಲಿ ಲಾಕ್ಡೌನ್ ಜಾರಿಯಾಗಿದ್ದರಿಂದ ಹಲವಾರು ಜನರು ತಾವಿದ್ದಲ್ಲೇ ಸಿಲುಕಿಕೊಂಡು, ಕುಟುಂಬದವರಿಂದ ದೂರಾಗಿ ಇನ್ನಿಲ್ಲದ ಸಂಕಟ, ಸಂಕಷ್ಟಗಳನ್ನು ಎದುರಿಸಿದ್ದರು. ಇದೀಗ ಕಠಿಣ ಲಾಕ್ಡೌನ್ ನಿಯಮಗಳು ಸಡಿಲಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಪರಸ್ಪರ ಭೇಟಿಯಾಗಲು, ಅಪ್ಪಿಕೊಂಡು, ಮುದ್ದಾಡಿ ಪ್ರೀತಿ ತೋರಲು ಅವಕಾಶ ದೊರೆಯುತ್ತಿದೆ. ಇದು ಅವರೆಲ್ಲರ ಪಾಲಿಗೆ ರೋಮಾಂಚಕಾರಿ ಅನುಭವ ನೀಡುತ್ತಿದೆ.
ಪ್ಲಾಸ್ಟಿಕ್ನ ತೆಳುವಾದ ಶೀಟ್ಗಳ ಬಳಕೆ: ಯಾರೇ ದಂಪತಿಯಾಗಿರಲಿ, ಅಪ್ಪ-ಮಗಳೇ ಆಗಿರಲಿ ಪರಸ್ಪರ ಅಪ್ಪಿಕೊಂಡು, ಮುದ್ದಾಡುವ ಮುನ್ನ ಪ್ಸಲಾಸ್ಟಿಕ್ನ ತೆಳುವಾದ ಶೀಟ್ಗಳನ್ನು ಬಳಸಲಾಗುತ್ತಿದೆ. ತನ್ಮೂಲಕ ಕರೊನಾ ಸೋಂಕು ಮತ್ತೊಮ್ಮೆ ಯಾರಿಗೂ ಹಬ್ಬದಂತೆ ಎಚ್ಚರವಹಿಸಲಾಗುತ್ತಿದೆ.
ಇದನ್ನೂ ಓದಿ: ಗಡಿಯಲ್ಲಿ ಡ್ರೋನ್ ಬಳಸಿ ನಿಗಾ; ರಾಷ್ಟ್ರೀಯ ತಾಂತ್ರಿಕ ಸಂಶೋಧನಾ ಸಂಸ್ಥೆ ಸಹಕಾರ
ಸ್ಪೇನ್ನ ಈ ಹಿರಿಯ ನಾಗರಿಕ ಜೋಡಿ ಸದ್ಯ ಬಾರ್ಸಿಲೋನಾದ ಹಿರಿಯ ನಾಗರಿಕರ ಕೇರ್ ಸೆಂಟರ್ನಲ್ಲಿ ಇದ್ದಾರೆ. ತಮ್ಮ 59 ವರ್ಷದ ದಾಂಪತ್ಯದಲ್ಲಿ ಇವರಿಬ್ಬರೂ ಒಮ್ಮೆಯೂ ಪರಸ್ಪರ ನೋಡದೆ, ಅಪ್ಪಿಕೊಳ್ಳದೆ ಕ್ಷಣವನ್ನು ಕಳೆದಿದ್ದೇ ಇಲ್ಲ. ಆದರೆ, ಕೋವಿಡ್-19ರಿಂದಾಗಿ ಬಾರ್ಸಿಲೋನಾದಲ್ಲಿ ಜಾರಿಗೊಳಿಸಲಾಗಿದ್ದ ಲಾಕ್ಡೌನ್ನಿಂದಾಗಿ ಇವರಿಬ್ಬರೂ ಪ್ರತ್ಯೇಕವಾಗಿ, ದೂರ, ದೂರವೇ ಇರಬೇಕಾಗಿ ಬಂದಿತ್ತು. 102 ದಿನಗಳ ಬಳಿಕ ಇದೀಗ ಬಾರ್ಸಿಲೋನಾದಲ್ಲಿ ಲಾಕ್ಡೌನ್ ನಿಯಮಗಳನ್ನು ಸಡಿಲಗೊಳಿಸಲಾಗಿದೆ.
ಸಿಕ್ಕ ಮೊದಲ ಅವಕಾಶದಲ್ಲೇ ಪರಸ್ಪರ ಭೇಟಿಯಾದ ದಂಪತಿ, ಪ್ಲಾಸ್ಟಿಕ್ನ ತೆಳುವಾದ ಶೀಟ್ ಅನ್ನು ಬಳಸಿ, ಪರಸ್ಪರ ಚುಂಬಿಸಿಕೊಂಡು, ದೀರ್ಘಅಗಲಿಕೆಯ ನೋವನ್ನು ಮರೆಯಲು ಯತ್ನಿಸಿದರು.
ಇವರಂತೆ ನಾಲ್ಕು ತಿಂಗಳ ಬಳಿಕ ಬಾರ್ಸಿಲೋನಾಕ್ಕೆ ಪ್ರಯಾಣಿಸಿ, ಅಪ್ಪನನ್ನು ನೋಡಲು ಅವಕಾಶ ಸಿಗುತ್ತಲೇ ಪುತ್ರಿ ಡೊಲೇರೆಸ್ ರೇಯೆಸ್ ತಮ್ಮ ತಂದೆ ಜೋಸ್ ರೇಯೆಸ್ ಅವರನ್ನು ಅಪ್ಪಿಕೊಂಡು ಸಂತೈಸಿದರು. ಇಂಥ ಹಲವು ಹೃದಯಸ್ಪರ್ಶಿ ದೃಶ್ಯಗಳು ಸ್ಪೇನ್ನ ಉದ್ದಗಲಕ್ಕೂ ನೋಡಬಹುದಾಗಿದೆ.