ಚೆನ್ನೈ: ಖ್ಯಾತ ನಟ ಹಾಗೂ ನಿರ್ದೇಶಕರಾಗಿದ್ದ ಪ್ರತಾಪ್ ಪೋಥೆನ್ ಶುಕ್ರವಾರ ಚೆನ್ನೈನ ತಮ್ಮ ಅಪಾರ್ಟ್ಮೆಂಟ್ನಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. 69ವರ್ಷದ ಪೋಥೆನ್ ಮಲಯಾಳಂ ಸೇರಿದಂತೆ ತಮಿಳು, ತೆಲುಗು ಮತ್ತು ಹಿಂದಿ ಚಿತ್ರಗಳಲ್ಲಿ ನಟಿಸಿದ್ದಾರೆ.
ಎಂದಿನಂತೆ ಮನೆ ಕೆಲಸ ಮಾಡಲು ಕೆಲಸದವರು ಬಂದಾಗ ಪ್ರತಾಪ್ ಪೋಥೆನ್ ಅವರ ಮೃತ ದೇಹವನ್ನು ಬೆಡ್ರೂಮ್ನಲ್ಲಿ ಕಂಡು, ತಕ್ಷಣವೇ ಪೊಲೀಸರಿಗೆ ಮಾಹಿತಿ ಮುಟ್ಟಿಸಿದ್ದಾರೆ.
100ಕ್ಕೂ ಹೆಚ್ಚು ಮಲಯಾಳಂ ಸಿನಿಮಾಗಳಲ್ಲಿ ನಟಿಸಿದ್ದು, ಮಲಯಾಳಂ ಹಾಗೂ ತಮಿಳು ಭಾಷೆಯಲ್ಲಿ ಒಟ್ಟು 12 ಸಿನಿಮಾಗಳನ್ನು ಸಹ ನಿರ್ದೇಶಿಸಿದ್ದಾರೆ. 1979ರಲ್ಲಿ ಆರವ್ ಸಿನಿಮಾ ಮೂಲಕ ಪ್ರತಾಪ್ ಪೋಥೆನ್ ಅವರನ್ನು ನಿರ್ದೇಶಕ ಭರತ್ ಚಿತ್ರರಂಗಕ್ಕೆ ಕರೆತಂದರು. 1980ರಲ್ಲಿ ನಟಿಸಿದ್ದ ಲೋರಿ ಮತ್ತು ಚಮರಮ್ ಸಿನಿಮಾ ಪ್ರತಾಪ್ಗೆ ಖ್ಯಾತಿ ತಂದುಕೊಟ್ಟಿತು.
1952ರ ಆಗಸ್ಟ್ 13ರಂದು ಪ್ರತಾಪ್ ಜನನವಾಯಿತು.ಮದ್ರಾಸ್ನಲ್ಲಿ ಪ್ರತಾಪ್ ಶಿಕ್ಷಣ ಪಡೆದರು. 1985ರಲ್ಲಿ ಖ್ಯಾತ ನಟಿ ರಾಧಿಕಾ ಅವರನ್ನು ಪ್ರತಾಪ್ ಮದುವೆಯಾಗಿದ್ದರು.1986ರಲ್ಲೇ ಈ ಜೋಡಿ ದೂರವಾಯಿತು. ನಂತರ 1990ರಲ್ಲಿ ಅಮಲಾ ಸತ್ಯನಾಥ್ ಎಂಬುವವರನ್ನು ಪ್ರತಾಪ್ ಮದುವೆಯಾದರು. ಈ ದಂಪತಿಗೆ ಒಬ್ಬಳು ಮಗಳಿದ್ದಾರೆ.
ಹಲವು ಪ್ರಶಸ್ತಿಗಳನ್ನು ಪಡೆದಿರುವ ಪ್ರತಾಪ್, 1979ರಲ್ಲೇ ಉತ್ತಮ ನಟನೆಗಾಗಿ ಫಿಲ್ಮ್ ಫೇರ್ ಅವಾರ್ಡ್, ಸೈಮಾ, ಕೇರಳ ರಾಜ್ಯ ಚಲನಚಿತ್ರ ಪ್ರಶಸ್ತಿಯನ್ನು ಪಡೆದಿದ್ದಾರೆ. (ಏಜೆನ್ಸೀಸ್)