ನವದೆಹಲಿ: ವಾಹನೋದ್ಯಮದ ಒಂದು ಮಹತ್ವದ ಬೆಳವಣಿಗೆಯಲ್ಲಿ, 2025 ಅಕ್ಟೋಬರ್ 1ರಿಂದ ಉತ್ಪಾದಿಸಲಾಗುವ ಎಲ್ಲ ಎನ್2 ಮತ್ತು ಎನ್3 ವಾಣಿಜ್ಯ ವಿಭಾಗದ ಟ್ರಕ್ಗಳಲ್ಲಿ ಚಾಲಕರಿಗೆ ಹವಾನಿಯಂತ್ರಿತ ಕ್ಯಾಬಿನ್ ಕಡ್ಡಾಯಗೊಳಿಸಿ ರಸ್ತೆ, ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯ ಅಧಿಸೂಚನೆ ಹೊರಡಿಸಿದೆ.
ಚಾಲಕರಿಗೆ ಫ್ಯಾಕ್ಟರಿ-ಫಿಟ್ಟೆಡ್ ಎಸಿ ಕ್ಯಾಬಿನ್ಗಳನ್ನು ಅಳವಡಿಸುವಂತೆ ಅದು ಸೂಚಿಸಿದೆ. ಚಾಲಕರ ಆರೋಗ್ಯದ ದೃಷ್ಟಿಯಿಂದ ಅನುಕೂಲವಾಗುವ ಈ ಕ್ರಮದಿಂದ ಟಾಟಾ, ಅಶೋಕ್ ಲೈಲ್ಯಾಂಡ್ ಮತ್ತು ಮಹೀಂದ್ರಾ ಮುಂತಾದ ಟ್ರಕ್ ಉತ್ಪಾದಕರ ಮೇಲೆ ಹೆಚ್ಚುವರಿ ಆರ್ಥಿಕ ಹೊರೆ ಬೀಳಲಿದೆ. ಜುಲೈ 10ರಂದು ಈ ಅಧಿಸೂಚನೆ ಹೊರಡಿಸಲಾಗಿದೆ.
ಟ್ರಕ್ ಚಾಲಕರು ಸತತ ಸುದೀರ್ಘ ಅವಧಿಗೆ ವಾಹನ ಚಾಲನೆ ಮಾಡಬೇಕಾಗಿದ್ದು, ಕ್ಯಾಬಿನ್ ಬಿಸಿಯೇರುತ್ತದೆ. ಸರಕು ಸಾಗಣೆಯಲ್ಲಿ ಮಹತ್ವದ ಪಾತ್ರ ವಹಿಸುವ ಇವರ ಯೋಗಕ್ಷೇಮ ಮುಖ್ಯ ಎಂದು ಮನಗಂಡಿರುವ ಸರಕಾರ ಇದು ವೆಚ್ಚದಾಯಕ ಎಂಬ ಆಕ್ಷೇಪಗಳ ನಡುವೆ ಈ ತೀರ್ಮಾನ ಕೈಗೊಂಡಿದೆ.