‘ರೆಬಲ್ ಸ್ಟಾರ್’ ಅಂಬರೀಷ್ ಮಗ ಅಭಿಷೇಕ್ ಅಂಬರೀಷ್, ‘ಮದಗಜ’ ಖ್ಯಾತಿಯ ಮಹೇಶ್ ನಿರ್ದೇಶನದಲ್ಲಿ ಚಿತ್ರ ಮಾಡುತ್ತಿದ್ದಾರೆ ಎಂಬ ಸುದ್ದಿ ಕೆಲವು ತಿಂಗಳ ಹಿಂದೆ ಕೇಳಿಬಂದಿತ್ತು. ಅಂಬರೀಷ್ ಹುಟ್ಟುಹಬ್ಬದ ಪ್ರಯುಕ್ತ ಈ ಚಿತ್ರದ ಘೋಷಣೆಯೂ ಆಗಿತ್ತು. ಈಗ ಚಿತ್ರದ ಮೋಷನ್ ಪೋಸ್ಟರ್ ಬಿಡುಗಡೆಯಾಗಿದೆ.
ಇದನ್ನೂ ಓದಿ: ಆ ಒಂದು ಕೆಟ್ಟ ಬೈಗುಳ: 5 ವರ್ಷದ ಬಳಿಕ ವಿಜಯ್ ದೇವರಕೊಂಡ ವಿರುದ್ಧ ಸೇಡು ತೀರಿಸಿಕೊಂಡ ಅನಸೂಯ!
ಶನಿವಾರ, ಸುಮಲತಾ ಅಂಬರೀಷ್ ಅವರ ಹುಟ್ಟುಹಬ್ಬ. ಈ ಸಂದರ್ಭದಲ್ಲಿ ಹುಟ್ಟುಹಬ್ಬ ಆಚರಿಸುವುದರ ಜತೆಗೆ ಅವರಿಂದಲೇ ಮೋಷನ್ ಪೋಸ್ಟರ್ ಬಿಡುಗಡೆ ಮಾಡಿಸಲಾಯಿತು. ಚಿತ್ರಕ್ಕೆ ಸದ್ಯಕ್ಕೆ ‘ಎಎ04’ ಎಂಬ ಹೆಸರನ್ನು ಇಡಲಾಗಿದೆ. ಚಿತ್ರವನ್ನು ರಾಕ್ಲೈನ್ ಪ್ರೊಡಕ್ಷನ್ಸ್ ಸಂಸ್ಥೆಯಡಿ ರಾಕ್ಲೈನ್ ವೆಂಕಟೇಶ್ ನಿರ್ಮಿಸುತ್ತಿದ್ದಾರೆ.
ಈ ಚಿತ್ರದ ಕುರಿತು ಮಾತನಾಡುವ ಮಹೇಶ್, ‘ಒಂಬತ್ತು ತಿಂಗಳ ಹಿಂದೆ ಅಭಿಷೇಕ್ ಅವರ ಬಳಿ ಒಂದು ಕಥೆ ತೆಗೆದುಕೊಂಡು ಹೋಗಿದ್ದು. ಅದೊಂದು ಆಕ್ಷನ್ ಥ್ರಿಲ್ಲರ್ ಆಗಿದ್ದು, ಅವರು ಒಪ್ಪಿಗೆ ಕೊಟ್ಟರು. ಅದಕ್ಕಿಂತ ದೊಡ್ಡದೇನಾದರೂ ಮಾಡಬೇಕು ಅಂತಂದುಕೊಂಡಾಗ, ಈ ಕಥೆ ಸಿಕ್ಕಿತು. ಟಿ.ಕೆ. ದಯಾನಂದ್ ಕೊಟ್ಟ ಕಥೆಗೆ ನಾನು ಚಿತ್ರಕಥೆ ಬರೆದಿದ್ದೇನೆ. ಈ ಕಥೆಯನ್ನು ರಾಕ್ಲೈನ್ ವೆಂಕಟೇಶ್ ಅವರಿಗೆ ಹೇಳಿದಾಗ, ಅವರು ಖುಷಿಯಿಂದ ಒಪ್ಪಿ ಗ್ರೀನ್ ಸಿಗ್ನಲ್ ಕೊಟ್ಟರು’ ಎನ್ನುತ್ತಾರೆ ಮಹೇಶ್.
ಇದು ಸಾವಿರ ವರ್ಷದ ಹಿಂದಿನ ಕಥೆಯಂತೆ. ‘ಇದೊಂದು ಐತಿಹಾಸಿಕ ಚಿತ್ರ. ಒಂದು ಸಾವಿರ ವರ್ಷಗಳ ಹಿಂದಿನ ಕಥೆ ಇಲ್ಲಿದೆ. ಇದೊಂದು ಕಾಲ್ಪನಿಕ ಕಥೆಯಾಗಿದ್ದು, ಯಾವುದೇ ಘಟನೆಯನ್ನೂ ಆಧರಿಸಿದಲ್ಲ. ಕರ್ನಾಟಕದಲ್ಲೇ ಚಿತ್ರೀಕರಣ ನಡೆಯಲಿದೆ. ಹೆಚ್ಚಾಗಿ ಸೆಟ್ಗಳನ್ನು ನಿರ್ಮಾಣ ಮಾಡಿ ಅದರಲ್ಲಿ ಚಿತ್ರೀಕರಣ ಮಾಡುತ್ತೇವೆ. ಈ ಚಿತ್ರದಲ್ಲಿ ಅಭಿಷೇಕ್ ಅವರಿಗೆ ಏಳೆಂಟು ಗೆಟಪ್ಗಳಿದ್ದು, ಆ ಪೈಕಿ ಈಗ ಬಿಡುಗಡೆಯಾಗಿರುವ ಗೆಟಪ್ ಸಹ ಒಂದು’ ಎನ್ನುತ್ತಾರೆ ಮಹೇಶ್.
ಇದನ್ನೂ ಓದಿ: ಬಾಲಿವುಡ್ನ ನಂಬರ್ 1 ನಟ ಯಶ್; ಕರಣ್ ಜೋಹರ್ ಪ್ರಶ್ನೆಗೆ ಶಾಹಿದ್ ಉತ್ತರ
ಈ ಚಿತ್ರವನ್ನು ವರ್ಷದ ಕೊನೆಗೆ ಪ್ರಾರಂಭಿಸಲಾಗುವುದು ಎನ್ನುವ ಮಹೇಶ್, ನವೆಂಬರ್ ಹೊತ್ತಿಗೆ ಚಿತ್ರದ ಹೆಸರು ಅನಾವರಣಗೊಳಿಸಲಾಗುತ್ತದೆ ಎನ್ನುತ್ತಾರೆ.