ಲಂಡನ್: ದೇಹದಲ್ಲಾಗುವ ಸಣ್ಣ ಬದಲಾವಣೆಯನ್ನು ನಿರ್ಲಕ್ಷಿಸಿದರೆ ಏನೆಲ್ಲಾ ಆರೋಗ್ಯ ಸಮಸ್ಯೆ ಎದುರಿಸಬೇಕಾತ್ತದೆ ಎಂಬುದಕ್ಕೆ ಇಂಗ್ಲೆಂಡ್ನ ಸ್ಟಾಫೊರ್ಡ್ಶೈರ್ನ ಟನ್ಸ್ಟಾಲ್ ನಿವಾಸಿಯೊಬ್ಬರು ಜೀವಂತ ಉದಾಹರಣೆಯಾಗಿದ್ದಾರೆ.
ನರ್ಸರಿ ಉದ್ಯೋಗಿ ಆಗಿರುವ ಪೈಗೆ ಹೀಲ್ಯಾಂಡ್ (19) ಇದೀಗ ಹಾಡ್ಜ್ಕಿನ್ ಲಿಂಪೋಮಾ ಕ್ಯಾನ್ಸರ್ನಿಂದ ಬಳಲುತ್ತಿದ್ದು, ಆರು ತಿಂಗಳ ನಿರಂತರ ಕಿಮೋಥೆರಪಿಯನ್ನು ಎದುರಿಸುವಂತಾಗಿದೆ. ನಾಲ್ಕನೇ ಹಂತದ ಕ್ಯಾನರ್ ಆಗಿದ್ದು, ಹಿಲ್ಯಾಂಡ್ಳ ಸಣ್ಣ ನಿರ್ಲಕ್ಷ್ಯದಿಂದಾಗಿ ಇದೀಗ ಭಾರಿ ಬೆಲೆ ತರುವಂತಾಗಿದೆ.
ಜನವರಿಯಲ್ಲಿ ಹೀಲ್ಯಾಂಡ್ನ ಕುತ್ತಿಗೆಯ ಬಲಭಾಗದಲ್ಲಿ ಒಂದು ಸಣ್ಣ ಗಡ್ಡೆ ಕಾಣಿಸಿಕೊಂಡಿತ್ತು. ಆರಂಭದಲ್ಲಿ ಸರಿಹೋಗಬಹುದು ಎಂದು ನಿರ್ಲಕ್ಷಿಸಿದ್ದಳು. ಆದರೆ, ಮಾರ್ಚ್ನಲ್ಲಿ ಗಡ್ಡೆ ಸ್ವಲ್ಪ ದೊಡ್ಡದಾಗಿ ಬೆಳೆದಿತ್ತು. ಈ ಹಿಂದೆ ವೈದ್ಯರು ಸಹ ಅದರ ಬಗ್ಗೆ ಗಮನವಹಿಸು ಎಂದು ಎಚ್ಚರಿಸಿದ್ದರು. ಆದರೂ, ಸುಮ್ಮನಿದ್ದ ಹೀಲ್ಯಾಂಡ್ ಗಡ್ಡೆ ದೊಡ್ಡದಾಗುತ್ತಿದ್ದಂತೆ ಕಳೆದ ತಿಂಗಳ ವೈದ್ಯರ ಮೊರೆ ಹೋಗಿದ್ದಾರೆ. ಈ ವೇಳೆ ಪರೀಕ್ಷಿಸಿದಾಗ ಆಕೆಗೆ ಕ್ಯಾನ್ಸರ್ ಇರುವುದು ಪತ್ತೆಯಾಗಿದೆ.
ತನ್ನ ರೋಗದ ಬಗ್ಗೆ ತಿಳಿದುಕೊಂಡ ಹೀಲ್ಯಾಂಡ್, ನಿಮ್ಮ ದೇಹದಲ್ಲಿ ಒಂದು ಸಣ್ಣ ಬದಲಾವಣೆಯಾದರೂ ಮೊದಲ ವೈದ್ಯರನ್ನು ಸಂಪರ್ಕಿಸಿ, ನನ್ನ ರೀತಿ ಮಾಡಬೇಡಿ ಎಂದು ಮನವಿ ಮಾಡಿಕೊಂಡಿದ್ದಾಳೆ.
ಇದನ್ನೂ ಓದಿ: ಮಾಜಿ ಗಂಡನಿಗೆ ತಿಂಗಳಿಗೆ 2 ಸಾವಿರ ರೂ. ಜೀವನಾಂಶ ನೀಡಲು ಮಹಿಳೆಗೆ ಕೋರ್ಟ್ ಆದೇಶ..!
ಇದೇ ವೇಳೆ ತನ್ನ ಘಟನೆ ಬಗ್ಗೆ ವಿವರಿಸಿರುವ ಹೀಲ್ಯಾಂಡ್ ತನ್ನ ಬಾಯ್ಫ್ರೆಂಡ್ನೊಂದಿಗೆ ಇದ್ದಾಗ ಜನವರಿಯಲ್ಲಿ ಮೊದಲ ಬಾರಿಗೆ ಸಣ್ಣ ಗಡ್ಡೆ ಕುತ್ತಿಗೆಯಲ್ಲಿ ಕಾಣಿಸಿಕೊಂಡಿತು. ಸಣ್ಣದಾಗಿದ್ದರಿಂದ ನಿರ್ಲಕ್ಷಿಸಿದೆ. ಇದರ ನಡುವೆ ಕರೊನಾ ವೈರಸ್ ಲಾಕ್ಡೌನ್ ಇದ್ದರಿಂದ ವೈದ್ಯರ ಬಳಿಗೆ ಹೋಗಲಿಲ್ಲ. ಕೊನೆಗೊಮ್ಮೆ ಆನ್ಲೈನ್ ಮೂಲಕ ಸಮಯ ನಿಗದಿ ಪಡಿಸಿದೆ. ಆದರೆ, ಗಡ್ಡೆ ಕುರಿತು ಸ್ಪಷ್ಟವಾಗಿ ಪರೀಕ್ಷಿಸಲು ಸಾಧ್ಯವಾಗಲಿಲ್ಲ. ರೋಗ ಪರೀಕ್ಷೆ ಮಾಡಿಸಲು ಸುಮಾರು 6 ತಿಂಗಳು ತೆಗೆದುಕೊಂಡಿತು ಅಷ್ಟರಲ್ಲಿ ಗಡ್ಡೆ ದೊಡ್ಡದಾಗಿ ಬೆಳೆದಿದ್ದರಿಂದ ಕೊನೆಗೂ ಕಳೆದ ತಿಂಗಳು ವೈದ್ಯರ ಬಳಿ ತೆರಳಿದೆ. ಈ ವೇಳೆ ಪರೀಕ್ಷಿಸಿದ ವೈದ್ಯರು ಕ್ಯಾನ್ಸರ್ ಇರುವುದಾಗಿ ಹೇಳಿದರು. ಅದರಲ್ಲೂ ನಾಲ್ಕನೇ ಹಂತದ ಕ್ಯಾನ್ಸರ್ ಎಂಬುದನ್ನು ಕೇಳಿ ನಿಜಕ್ಕೂ ಶಾಕ್ ಆಯಿತು ಎನ್ನುತ್ತಾರೆ ಹೀಲ್ಯಾಂಡ್.
ರೋಗದ ಬಗ್ಗೆ ತಿಳಿದಕೂಡಲೇ ನಾನು ಮತ್ತು ನನ್ನ ತಾಯಿ ಕುಸಿದು ಬಿದ್ದೆವು. ಗುಣಪಡಿಸಬಹುದು ಎಂದು ವೈದ್ಯರು ಹೇಳಿದ್ದಾರೆ. ನಾನು ಪಾಸಿಟಿವ್ ಆಗಿ ಉಳಿಯಲು ಯತ್ನಿಸಿದರೂ ಸಹ ಒಮ್ಮೊಮ್ಮೆ ತುಂಬಾ ದುಃಖವಾಗುತ್ತದೆ. ಸದ್ಯ ನಾನು ಕಿಮೋಥೆರಪಿಯಲ್ಲಿ ತೊಡಗಿಕೊಂಡಿದ್ದೇನೆ. ಇದಕ್ಕಾಗಿ ನಾನು ನನ್ನ ಕೆಲಸವನ್ನು ಬಿಟ್ಟಿದ್ದೇನೆ ಎಂದು ತಿಳಿಸಿದ್ದಾರೆ. ಜತೆಗೆ ನನ್ನಂತೆ ಮಾಡಬೇಡಿ ಎಂದು ಜನರನ್ನು ಎಚ್ಚರಿಸಿದ್ದಾರೆ. (ಏಜೆನ್ಸೀಸ್)