ಮುಂಬೈ: ರೈಲಿನಲ್ಲಿ ಟಿಕೆಟ್ ರಹಿತ ಪ್ರಯಾಣ ಮಾಡುವವರಿಂದ ದಂಡ ವಸೂಲಿ ಮಾಡುವುದನ್ನು ರೈಲ್ವೆಯ ಟಿಕೆಟ್ ಚೆಕ್ಕರ್ಗಳು ಮಾಡುತ್ತಲೇ ಇರುತ್ತಾರೆ. ಪ್ರಯಾಣಿಕರು ಸ್ಥಳೀಯ ಪ್ರಯಾಣ, ದೂರ ಪ್ರಯಾಣವನ್ನೂ ಕೆಲವೊಮ್ಮೆ ಟಿಕೆಟ್ ರಹಿತವಾಗಿ ಮಾಡುತ್ತಾರೆ. ಇಂತಹವರ ಸಂಖ್ಯೆ ಕಡಿಮೆಯೇನಲ್ಲ!
ರೈಲ್ವೆಯ ಟಿಕೆಟ್ ಚೆಕ್ಕರ್ ಒಬ್ಬರು ಕಳೆದ ಒಂದೇ ವರ್ಷದ ಅವಧಿಯಲ್ಲಿ (2019) ಈ ರೀತಿ ಟಿಕೆಟ್ ರಹಿತ ಪ್ರಯಾಣ ಮಾಡಿದ 22, 680 ಪ್ರಯಾಣಿಕರಿಂದ ಸಂಗ್ರಹಿಸಿದ ದಂಡದ ಪ್ರಮಾಣ ಬರೋಬ್ಬರಿ 1.51 ಕೋಟಿ ರೂಪಾಯಿ ಎಂದು ಅಧಿಕಾರಿಯೊಬ್ಬರು ಗುರುವಾರ ತಿಳಿಸಿದ್ದಾರೆ.
ಈ ಸಾಧನೆ ಮಾಡಿದ ಟಿಕೆಟ್ ಚೆಕ್ಕರ್ ಹೆಸರು ಎಸ್.ಬಿ.ಗಲಾಂಡೆ. ಕೇಂದ್ರೀಯ ರೈಲ್ವೆಯ ಫ್ಲೈಯಿಂಗ್ ಸ್ಕ್ವಾಡ್ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಕಳೆದ ವರ್ಷ ಕೇಂದ್ರೀಯ ರೈಲ್ವೆಗೆ ದಂಡದ ಮೂಲಕ ಗರಿಷ್ಠ ಆದಾಯ ಒದಗಿಸಿದ ಕೀರ್ತಿಗೆ ಗಲಾಂಡೆ ಭಾಜನರಾಗಿದ್ದಾರೆ.
ಇವರಲ್ಲದೆ, ಕೇಂದ್ರೀಯ ರೈಲ್ವೆಯಲ್ಲಿ ಇನ್ನೂ ಮೂವರು ಟಿಕೆಟ್ ಚೆಕ್ಕರ್ಗಳು ಟಿಕೆಟ್ ರಹಿತ ಪ್ರಯಾಣ ಮಾಡುತ್ತಿದ್ದವರಿಂದ ಸಂಗ್ರಹಿಸಿದ ದಂಡದ ಮೊತ್ತ 1 ಕೋಟಿ ರೂಪಾಯಿಗೂ ಅಧಿಕ ಇದೆ. ಎಂ.ಎಂ.ಶಿಂಧೆ 16,035 ಪ್ರಯಾಣಿಕರಿಂದ 1.07 ಕೋಟಿ ರೂಪಾಯಿ, ಡಿ.ಕುಮಾರ್ 15,234 ಪ್ರಯಾಣಿಕರಿಂದ 1.02 ಕೋಟಿ ರೂಪಾಯಿ ದಂಡ ವಸೂಲಿ ಮಾಡಿದರೆ, ಮುಂಬೈ ಡಿವಿಷನ್ನ ಚೀಫ್ ಟಿಕೆಟ್ ಇನ್ಸ್ಪೆಕ್ಟರ್ ರವಿ ಕುಮಾರ್ ಜಿ 20,657 ಪ್ರಯಾಣಿಕರಿಂದ 1.45 ಕೋಟಿ ರೂಪಾಯಿ ದಂಡ ವಸೂಲಿ ಮಾಡಿದ್ದಾರೆ.
2019ರಲ್ಲಿ ಸೆಂಟ್ರಲ್ ರೈಲ್ವೆ ಟಿಕೆಟ್ಲೆಸ್ ಮತ್ತು ಇರ್ರೆಗ್ಯುಲರ್ ಪ್ರಯಾಣದ 37.64 ಲಕ್ಷ ಕೇಸ್ಗಳನ್ನು ದಾಖಲಿಸಿದ್ದು, 192.51 ಕೋಟಿ ರೂಪಾಯಿ ಗಳಿಸಿದೆ. 2018ರಲ್ಲಿ 34.09 ಲಕ್ಷ ಕೇಸ್ಗಳ ಮೂಲಕ 168.30 ಕೋಟಿ ರೂಪಾಯಿ ಸಂಗ್ರಹಿಸಿತ್ತು. (ಏಜೆನ್ಸೀಸ್)