ನವದೆಹಲಿ: ಸಿಡಿಲು, ಗುಡುಗುಗಳೆಂದರೆ ಸಾಮಾನ್ಯವಾಗಿ ಭಯ ಉಂಟಾಗುತ್ತದೆ. ಆದರೆ, ಇವೇ ಗುಡುಗು, ಸಿಡಿಲುಗಳು ದಾಖಲೆಗೂ ಕಾರಣವಾಗುತ್ತವೆ. ಅತೀ ದೂರಕ್ಕೆ ಚಾಚಿಕೊಂಡ ಸಿಡಿಲು ಹಾಗೂ ಅತಿ ಹೆಚ್ಚು ಕಾಲ ಕಾಣಿಸಿಕೊಂಡ ಸಿಡಿಲಿನ ಹೆಸರಿನಲ್ಲೀಗ ಹೊಸ ದಾಖಲೆಗಳು ನಿರ್ಮಾಣವಾಗಿವೆ.
ಬ್ರೆಜಿಲ್ನಲ್ಲಿ 2018ರ ಅಕ್ಟೋಬರ್ 31ರಂದು ಕಾಣಿಸಿಕೊಂಡ ಸಿಡಿಲು ಅತಿ ಹೆಚ್ಚು ದೂರಕ್ಕೆ ಚಾಚಿಕೊಂಡ ಸಿಡಿಲು ಎಂಬ ಖ್ಯಾತಿಗೆ ಪಾತ್ರವಾಗಿದೆ. ಅಂದಹಾಗೆ ಇದು 709 ಕಿಲೋ ಮೀಟರ್ವರೆಗೆ ವಿಸ್ತರಿಸಿಕೊಂಡಿತ್ತು. ಅಂದರೆ ಬೆಂಗಳೂರಿನಿಂದ ಬೀದರ್ಗಿಂತಲೂ ಹೆಚ್ಚು ದೂರಕ್ಕೆ ಚಾಚಿಕೊಂಡ ಸಿಡಿಲು ಇದಾಗಿತ್ತು ಎಂದು ವಿಶ್ವ ಸಂಸ್ಥೆಯ ಹವಾಮಾನ ಇಲಾಖೆ ಅಧಿಕಾರಿಗಳ ಖಚಿತ ಪಡಿಸಿದ್ದಾರೆ.
ಇದನ್ನೂ ಓದಿ; ಭಾರತದ ನೆರವಿಗೆ ಬರಲಿದೆ ಅಮೆರಿಕ ಸೇನೆ; ಚೀನಾ ಸವಾಲು ಎದುರಿಸಲು ನಿಯೋಜನೆ
ಅದೇ ರೀತಿ ಅತಿ ಹೆಚ್ಚು ಕಾಲ ಕಾಣಿಸಿಕೊಂಡ ಸಿಡಿಲು ಎಂಬ ಖ್ಯಾತಿ ಮತ್ತೊಂದು ಸಿಡಿಲಿನದ್ದಾಗಿದೆ. ಕಳೆದ ವರ್ಷ ಮಾರ್ಚ್ 4ರಂದು ಉತ್ತರ ಅರ್ಜೆಂಟೀನಾದಲ್ಲಿ ಕಾಣಿಸಿಕೊಂಡ ಸಿಡಿಲು 16.73 ಸೆಕೆಂಡ್ವರೆಗೆ ಪ್ರಕಾಶಮಾನವಾಗಿತ್ತು. ಇದು ಕೂಡ ಮತ್ತೊಂದು ವಿಶ್ವದಾಖಲೆಯಾಗಿದೆ ಎಂದು ವಿಶ್ವ ಹವಾಮಾನ ಇಲಾಖೆ ತಿಳಿಸಿದೆ.
ಇವುಗಳ ಹೆಗ್ಗಳಿಕೆ ಏನೆಂದರೆ ಈ ಹಿಂದಿನ ದಾಖಲೆಗಳಿಗೆ ಹೋಲಿಸಿದಲ್ಲಿ ಎರಡು ಹೆಚ್ಚು ದೂರ ಹಾಗೂ ಅವಧಿಯದ್ದಾಗಿವೆ. ಹಿಂದಿನ ದಾಖಲೆ ಒಕ್ಲಹಾಮಾದ 321 ಕಿ.ಮೀ ಚಾಚಿಕೊಂಡ ಸಿಡಿಲಿನದ್ದಾಗಿತ್ತು. ದಕ್ಷಿಣ ಫ್ರಾನ್ಸ್ನಲ್ಲಿ ಅತಿ ಹೆಚ್ಚು ಅವಧಿಗೆ ಕಾಣಿಸಿಕೊಂಡ ಸಿಡಿಲಿನ ದಾಖಲೆ 7.74 ಸೆಕೆಂಡ್ ಆಗಿತ್ತು.
ಇದನ್ನೂ ಓದಿ; ಕರೊನಾಗೆ ಚುಚ್ಚುಮದ್ದಿಗಿಂತ ಮೂಗಿನ ಔಷಧವೇ ಉತ್ತಮ; ಆಕ್ಸ್ಫರ್ಡ್ ವಿವಿ ಸಂಶೋಧಕರ ಅಭಿಮತ
ಅಷ್ಟಕ್ಕೂ ಇದನ್ನು ಅಳೆಯುವುದು ಹೇಗೆ ಗೊತ್ತೆ?: ತಾಂತ್ರಿಕತೆ ಮುಂದುವರಿದಂತೆ ಸಿಡಿಲು ಪತ್ತೆ ವ್ಯವಸ್ಥೆಯನ್ನೇ ರೂಪಿಸಲಾಗಿದೆ. ಸಿಡಿಲಿನಿಂದ ಹೊರಹೊಮ್ಮುವ ವಿದ್ಯುತ್-ಆಯುಸ್ಕಾಂತೀಯ ಕಣಗಳನ್ನು ಆಧರಿಸಿ ಅವುಗಳನ್ನು ಗುರುತಿಸಲಾಗುತ್ತದೆ.
ಸಿಡಿಲಿನಿಂದಾದ ದುರಂತಗಳದ್ದು ಮತ್ತೊಂದು ಬಗೆಯ ದಾಖಲೆ. 1975ರಲ್ಲಿ ಒಂದೇ ಸಿಡಿಲಿನಿಂದಾಗಿ 21 ಜನರು ಮೃತಪಟ್ಟಿದ್ದರು. ಅವರೆಲ್ಲ ನಿಂತದ್ದ ಗುಡಿಸಲಿಗೆ ಸಿಡಿಲು ಬಡಿದಿತ್ತು. ಮತ್ತೊಂದೆಡೆ, 1994ರಲ್ಲಿ ಈಜಿಪ್ತ್ನ ಡ್ರೊಂಕಾದಲ್ಲಿ ತೈಲ ಟ್ಯಾಂಕರ್ಗೆ ಸಿಡಿಲು ಬಡಿದು ಉಂಟಾದ ದುರಂತದಲ್ಲಿ 469 ಮಂದಿ ಪ್ರಾಣ ಕಳೆದುಕೊಂಡಿದ್ದರು. ಎರಡು ದಿನಗಳ ಹಿಂದಷ್ಟೇ ಬಿಹಾರದ ವಿವಿಧೆಡೆ ಸಂಭವಿಸಿದ ಸಿಡಿಲಿನ ದುರಂತದಲ್ಲಿ ನೂರಕ್ಕೂ ಅಧಿಕ ಜನರು ಮೃತಪಟ್ಟಿದ್ದರು.